الموضوع: لهذه الأسباب تخلصت من الاسبيرانزا !! (وائل عطية)

ياجماعة بمنتهى الهدوء والموضوعية كده،
بلاش تعتقدوا وتقولوا حاجات أنا ماقولتهاش، وبالتالي استنتاج نتائج خاطئة
يعني الأخ الفاضل اللي بيقول اللادا أحسن منها، عايز أسأله إزاي يعني اللادا أحسن منها؟؟!! لأ طبعاً وألف لأ، دا حتى لو حضرتك تقصد الكالينا يبقى برده في كلام مش على الإطلاق،
ياأخواني، أوضح تاني: العربية ماقلتش بأصلها معايا، بل والله بعد ما سلمتها لصاحبها الجديد وأنا نازل منها حطيت إيدي على التابلوه بتاعها وكأني باسلم عليها وباشكرها على الفترة إللي قعدتها معايا وشالتني أنا وأولادي فيها ولم تُقصر،
التوكيل بتاعها هو السبب الرئيسي في بيعي لها قبل مسافة 30000كم لأني كده ولا كده كنت هابيعها عند قطع المسافة دي.
وبعدين من ناحية تانية، الأخوة اللي عمالين يقولوا رداءة الخامات وعدم جودتها، أولاً كلمة رداءة كبيرة شوية على وصف الخامات، ولكن بص ياسيدي وشوف أنا كنت دافع كام وخدت بيه إيه ، أنا كنت دافع 60000 ألف جنية وخدت بيهم خامات ليست بالسوء الذي يصوره البعض، وإنما أستطيع أن أقول ومن موقف محايد أنها جيدة، ماهو مش هابقى دافع 60000 ألف جنيه في عربية ومنتظر يكون التابلوه مثلاً من الجلد الطبيعي أو البلاستيك الفاخر طبعاً مش ممكن.
للمرة الأخير ياجماعة وكيل العربية كان سبب رئيسي في أن أبيعها، أما العربية في حد ذاتها في معقولة بالمقارنة مع سعر شرائها وأيضاً سعر إعادة بيعها في الوقت الحالي وهنا أذكر بأنني لم أخسر في سيارتي تقريباً بعد استعمالها لمدة سنة كاملة (وبالمناسبة ماكنتش مأمن عليها وإن شاء الله برده مش هاأمن على اللي هاجيبها برده)