لـــو انا كنت تاجر عربيات كنت هعمل العرض دا

**dr_abooody** · 18-12-2008 10:55 PM

احنا هنا في مصر بلد العجائب
كل حاجة بتتباع باضعاف اضعاف ثمنها
و التاجر عايز يكسب 200 %

انا بصراحة لو تاجر عربيات
كنت بقيت اكتر واحد بيبيع سيارات
ازاي؟
المفروض ان التاجر هنا في مصر بيكسب في العربية الواحدة 20 الف
انا بقى هخلى ال 20 الف دول 10 الاف بس

و اتفرجوا على الزباين اللي مش هلاحق عليها
و العربية مش هتستنى يوم في المخزن

مش هحتاج مخازن اصلا و ابقى كدا و فرت فلوس تأجير المخزن اللي بتكون غالية

و هيبقى معرض العربيات علية طوابير اطول من طوابير العيش و ممكن الناس تموت بعضها كمان في الطوابير دة
بس للأسف التاجر المصري مش بيفكر غير انة يكسب كتير بجشع و خلاص

لو باع كتير و لو بمكسب قليل في العربية هيكسب اكتر

و دة الاعلان اللي هنزلة في الجرنال

بمناسبة الازمة العالمية و انخفاض مبيعات السيارات تقدم لكم شركة عبودي موتورز المحدودة

ABOOODY MOTORS LTD

الاسعار الجديدة

الاسعار كاش
و لو قسط يبقى 5 % بس

و دة قائمة بالأسعار

الفرنا تبقى ب55 الف
الالنترا ب 84 الف
الافيو ب 65 الف
شيفورلية لانوس ب 55 الف
سوزوكي ماروتي 27 الف
هيونداي i 30 ب99 الف
كيا سيراتو 80 الف
كيا بيكانتو 49 الف
مازدا M 3 ب 109 الف
لانسر 1600 ب 88 الف
لانسر 1500 115 الف

و كل ازمة عالمية و انتم طيبين
و انشا الله ما حد حوش

للأستعلام عن باقى الأسعار اتصل على الخط الساخن
112233

العنوان
على الناصية جنب القهوة

الرجاء مراعاة الدور

المعرض غير مسؤال عن اي حوادث تدافع

**NaviGator_13** · 18-12-2008 11:16 PM

انا لو تاجر بقا بصراحة كدا
بعد مالشعب المصرى يحتفل بالكريسماس ويتبسط
يعنى فى شهر واحد وبما ان البشرية كلها مستنين الاسعار ترخص
وكلهم عاينين القرشين اللى تحت البلاطة
وهيطلعوهم علشان يشتروا ....
اقوم طبعا اغلى العربيات بالذات اللى عليها جر جامد زى ال لانسر البوما والشارك والالنترا والجين و الفيرنا ...
يعنى من 5000 لحد 10000 مش هتفرق مع الناس
ماهما كدا كدا بيشتروا وهيشتروا !!
ولا تقولى بقا اسعار عالمية ولا محلية ملناش فيه :k39:
دا هيبقى اتفاق ودى بين التجار
مش منطقى برده التفكير دا

**mahmoud_magdy** · 18-12-2008 11:35 PM

اظن ان الاسعار في مصربتتحكم فيها جهه معينه
حتى لو تلاحظ ان اسعار التوكيل نفس اسعار المعارض
على سبيل المثال
يبقى مش انت اللي هتحكم السوق
في ناس اكبر منك حاكمينو ولازم تبيع زيهم
عشان السوق ميتضربش
وفي الاساس محدش هيسمحلك انك تبيع اسعار اقل من التوكيل
ولو مفيش توكيل مش هتقدر تبيع بسعر ارخص
عشان اصلا السعر متفق عليه
حسبنا الله ونعم الوكيل

**novocaine** · 19-12-2008 01:46 AM

مالفكرة ان المكسب اللي انتا بتتكلم عليه ده عند الوكيل مش الموزع
فبالتالي عبده لازم يجمع أو يستورد عشان يعمل كده
و بعجين انتا طيب أوي
هوا حد عايز يبيع كاش اليومين دول :)

**SeiffoZ** · 19-12-2008 01:58 AM

طبعا السوق ليه حيتانه ..
يعنى مش هتقدر تبيع بسعر أقل عشان هتتاكل ..
لازم عشان تعمل ده على الأقل يكون عندك إمبراطورية صناعية
ز نفوذ
و 15 ألف مقاتل + كميات أسلحة مدرعة و خفيفة عشان تبقى فى السيف سايد
(بهزر لكن الواقع مش بعيد عن كده)

**Terrible_DaRsH** · 19-12-2008 02:23 AM

الله عليك ...
بس الكلام ده مش هينفع يا راجل يا طيب ...
لو عملت كده التجار هيقضوا عليك فورا وكمان ده موضوع كبير جدا وليه حسابات كبيرة جدا مش بالسهولة دى ..
كان اى واحد معاه ملايين كان بقي تاجر سيارات وكسب الضعف ..

**magyver** · 19-12-2008 02:50 AM

مش بالسهوولة دة يعني كاان زماان اي تااجر عمل كدة وخلاص

**TheInfernal** · 19-12-2008 09:11 AM

حتى على افتراض انك نزلت السعر و الناس جريت عليك...ما المنافسين هم كمان هينزلوا الأسعار و بالتالي هتبقى بتبيع نفس الكمية بس بسعر أقل...و في الآخر انت الخسران...

اللي بيحصل دلوقتي ده اسمه احتكار للسوق.

**shanodaa** · 20-12-2008 07:10 PM

الموضوع غير كده خالص
سعر السياره يساوي
السعر الاصلي مع الجمارك مع مكسب الوكيل مع مكسب التاجر
اللي يخلي سعر السياره مبالغ فيه الضرايب العاليه اللي بتوصل لغايه 150 في الميه