الموضوع: الحمد لله عملت صيانه الالف

الحمد لله عملت صيانه الاف كيلو وخلصت فتره التليين بكل ما فيها من شروط وقلق والبحث عن اى مشوار اروحه علشان اعدى الالف كيلو وبعدين اختيار الميعاد المناسب مع ظروف شغلى للتفرغ ليوم الصيانه

اخذت طريق كورنيش المعادى وبعدين المحور من 15مايو ثم نزلت على الصحراوى ودخلت على عز العرب من الباب الرئيسى المدخل اللى على اليمين وكانت الساعه 7:50 صباحا ... ايه ده؟ مفيش حد ؟ ولا أمن ولا طابور ولا حتى واحد مستنى.. امال فين الناس؟ مش معقول انا أول واحد؟؟؟؟ هيهههه حخلص بدرى بدرى..

دخلت لجوه على الجراج عشان اسأل اى حد هى صيانه الجين من هنا ولا منين لغايه ملقيت واحد طالع والفوطه على وشه.. انت دخلت هنا ازاى؟ قولتله عادى يعنى ..انا بسأل على صيانه الجين2.. قاللى اتفضل من الناحيه التانيه من السور هناك المدخل بتاع الصيانه..

المهم رحت طالع راكب العربيه وقلت خلاص بقه انا وحظى ورحت واخذ يمين ولقيت طابوووور طويييل جنب السور .. حوالى عشره سيارات ما بين جين2 و واجا وواحده ويرا وجت بعدى كام عربيه كمان ... طبعا عشان العيد لسه خلصان
قولت بس هو ده ورحت واخذ مكان فى الصف ومحاذى ..وكانت الساعه 8:05 ..
ابتدت الناس بتاعه التوكيل تيجى وبعدين ابتدى دخول العربيات على الساعه 9 وشويه ..وكل ده تمام..

جه المهندسين والفنيين وعملو الاتى:
المهندس هانى وزع اوراق الصيانه على كل عربيه وقال حنملاها مع بعض حسب طلبات وظروف كل عربيه
الفنيين جابوا اكياس مشمع وحطوها على الكراسى بتاعه السائق لكل عربيه علشان يحافظوا عليها ولفوا قزاز على طاره الدركسيون لنفس السبب وحطوا فى الدواسه ورقه كبيره مطبوعه من بتاعه التوكيل

جه المهندس هانى حسب الدور بتاعى وشاف الرخصه وقاللى ايه الاخبار .. قولتلو:
1- صيانه الالف
2- تربيط عفشه والكشف على الكاوتش ..كنت قاريتها هنا .. (قاللى .. دول بيتعملوا كده كده)
3- الفرامل كويسه بس واطيه شويه
4- عندى لمبه ورا شمال مش بتنور بتاعه المارشدير
5- كنت كسرت مقاس الزيت بتاع الماتور وعاوز واحد جديد
6- عندى خربوش ورا على اليمين من بتوع العيال وكام نقطه دهان بحجم راس الدبوس عايز اعملهم (قاللى لو مشيت ورا الحاجات دى مش حتخلص صيانه وانا ممكن اعملهوملك .. قولتله خلاص انا مش متضايق منهم دلوقتى ممكن بعدين )

المهم قاللى على الساعه 2:30 تعالى استلم .. قولتله شكرا ورحت ماشى

اخذت نفسى ورحت طالع على أ/ محسن وسالته على الضمان والمانيول قاللى موجودين ... انبسط جدا لماقاللى كده ..و قاللى روح هاتهم من امين المخزن وهاتهم عشان نختملك الضمان من مدام / ساميه فى الدور الاول

رحت جبتهم من امين المخزن بس للاسف مدام ساميه بتيجى الساعه 11
طلعت على الاستراحه فوق ضربت واحد نسكافيه وقعدت افر فى المانيوال ولقيت فيه شويه معلومات مش ممكن .. كتيره جدا عايزه زهن صافى وروقان بس الملخص ان العربيه دى فيها كميه كونترول ولا مجمع التحرير خصوصا موضوع الحقن الالكترونى فى المطالع والمنازل حسب العزم المطلوب ... والباقى .. بعدين

رحت ختمت الضمان على الساعه 11 وحت رايح على داندى ضربت غدوه وبعدين نزلت كاريفور اتمشيت شويه واتفرجت على شويه حاجات .. رجعت كانت الساعه 1.30 وشفت العربيه وهما بيشتغلو فيها هى والعربيات التانيه .. الساعه 2.00 سالت م/هانى ايه الاخبار قاللى خلاص طالعه تتجرب
لقيت شخص قاعد جوه العربيه وحيطلع بيها وابتديت اتكلم معاه فى الفنيات .. وكان محترم جدا جدا وذوق جدا جدا وقاللى اركب جانبى تعالى نجربها .. هيييه...
وراح طالع الصحراوى وهاتك يا حرق .. وجرب الفرامل وورانى عمل الـabs وطمنى على العربيه والحمد لله
رجعنا التوكيل ودفعت 234.5 لان مقاس الزيت بــ 34 جنيه + 189 صيانه الالف + 5 جنيه لمبه + الباقى مصنعيات وضريبه واخذت أزن الخوج وعلى امارات مصر فولت 92

وسلام مؤقت علشان مطولش عليكوا.. ولنا بقيه ..

تحياتى

مبروووووووووووووووووووووو وك
وعقبال 250000 ان شاء الله
ربنا يباركلك فيها
ويارب عقبال كل اللي بيحلم يجيب جين 2
وانا اولهم