الموضوع: المشكلة عندى ولا عند خبراء المنتدى

المشاركة الأصلية كتبت بواسطة MMamdouh

مهى الفكرة ان زمن الفتح دة ملوش دعوة بالرشاشات... دة امر من الكونترول و بيتم تعديل الزمن دة حسب متطلبات لقيادة و حسب قراءة حساس الاكسجين

يعنى لو مثلا انت جبت رشاش اكبر شوية من الاصلى و ركبتة... الكونترول حيفتح الرشاش نفس الزمن اللى هو متعود علية فى السلانسية و بالتالى حيرش بنزين اكتر من اللازم

فى الحالة دى حساس الاكسجين حيحس ان فيه بنزين زيادة غير كامل الاحتراق فى العادم و بالتالى الكونترول حيبداء يعدل من زمن فتح الرشاش و يقللة لحد ما توصل نسبة البنزين للهواء الى 1 الى 14.7

من هنا يتضح ان الكونترول دايما بيحاول يوصل للنسبة المثلى للاستهلاك من خلال تعديل زمن فتح الرشاش و بالتالى الرشاش شخصيا مش حيفرق فى الاستهلاك الا لو جبت رشاش كبير جدا جدا لدرجة ان حتى مع اقل زمن فتح يقدر يوصلة الكونترول برضة فيه بنزين كتير بيدخل للموتور و بالتالى الاستهلاك حيزيد

القصة مش زى بيكات الكربراتير فى عربيات زمان... لما كان البك الاوسع بيسبب استهلاك بنزين زيادة... زمان كان قطر فتحة البك هو اللى بيحدد كمية البنزين اللى بيستهلكها الموتور لكن فى الانجكشن اللى بيتحكم فى الموضوع دة هو الكونترول

حد يسالنى طيب ليه فيه رشاشات بعدلات سريان مختلفة طالما مش فارقة فى حاجة و القصة كلها من الكونترول؟؟

اقولة ان الموضوع يفرق عند لفات موتور عالية لما يبقى فيه ضرورة لرش بنزين كتير... لو الرشاش اصغر من اللازم مش حيقدر يدى الموتور احتياجاتة من البنزين و العربية حتتخنق (الكونترول برضة له حدود لاكبر زمن فتح للرشاش زى ما له حدود لاقل زمن)

عشان كدة تلاقى عربيات سعتها اللترية قريبة من بعض بتستعمل نفس الرشاشات زى كدة ما مواتير الBMW ال3000 سى سى بتستعمل نفس رشاشات ال3500 سى سى لان الفرق فى السعة اللترية ممكن تغطى من خلال تعديل زمن فتح الرشاشات

و على فكرة... انا شوفت عربيات دايو ريسر من القديم كان فيها نفس الرشاشات البوش اللى انا مركبها و كانوا زرق برضة بالرغم من ان الرشاشات دى من عربية اصلا 1600 سى سى

موضوع معدل الاستهلاك و كدة بيعتمد على طريقة السواقة و ظروف الطريق اكتر من اى حاجة تانية و بالتالى مينفعش ناخد تجربة حد و نعممها على الناس كلها... الاختبار الصح هو انك تجيب طقم بوش و طقم بتاع هيونداى و تركب دة مرة و دة مرة و تمشى نفس المشوار فى نفس ظروف التشغيل و تحسب الاستهلاك و تشوف لو فيه فرق

MMamdouh

كلام سليم / مقنع / علمى / منظم //// ناقص حاجة
قبل اى حاجة كلنا اتعلمنا من محمد ممدوح يعنى ايه نظام الوقود وانا واحد من الناس عرفت معنى كلمة رشاشات وانجيكشن على ايد محمد ممدوح
يا ممدوح باشا اكيد فى حاجة ناقصة ازاى كل الناس اللى بتركب رشاشات بى ام متفقة انه مفيش فرق غير فى الدواره والكلام ده بنسبة 90%
والناس برضو متفقة على ان رشاشات الهيونداى وده بنسبة 90%
من خبرتى بحضرتك كلامك دائما صح واسف لتعبيرى انت مش بتفتى لكن اللى انا متأكد منه ان فى حاجة ناقصة
ياريت نعمل استفتاء على الرشاشات ال بى ام والرشاشات الهيونداى
وياريت كل واحد غير الرشاشات بتاعته يقول نوعها ايه ونتيجتها ايه
صدقنى يا محمد باشا فى ناس كتير نفسيا بتقول ان العربية اتظبطت بعد رشاشات ال بى ام لمجرد انها قطعة غيار لسيارات من فئة اعلى
على العموم ان شاء الله انا هاشترى رشاشات هيونداى ولو تحب قبل تركيبها تجرب عربيتى بنفسك علشان موضوع السحب وبعد تركيبها برضو تجربها ده طبعا شئ يشرفنى / على فكرة انا تقريبا بكتب كل حاجة خاصة بعربيتى يعنى عندى History كامل للعربية حتى كل تفويلة بنزين بكتب كانت يوم ايه وكمية البنزين قد ايه والاستهلاك ده مقابل كام كيلو واعتقد ان ده هايفرق فى تقييم الرشاشات