السلام عليكم ورحمه الله وبركاته، تحياتي للجميع و بعد، العربية كان لها فترة المياه بتنقص مني و كنت بزودها و مؤشر الحرارة مش بيعلي و من أسبوع تقريبا لقيت المياه بتنقص بطريقة زائدة عن الحد فحضرت طقم جوان وش سلندر احتياطي و كنت ناوي اوديها للميكانيكي لكن حصل النصيب و جابت جوان و هي تحت البيت و الحمد لله علي كل حال و نظرا لبعد الميكانيكي و ما اعرفش أخبار الميكانيكية في المنطقة اللي أنا فيها ( القلج) استعنت بالله و قررت اعملها بنفسي و اخدت معايا تقريبا ٣ أيام شغل براحتي و نضافة لكل جزء بيتفك و بعد التقفيل دارت و الحمد لله و لاحظت خروج دخان أبيض و قرات بعض التفاصيل عن موضوع خروج الدخان الأبيض و لقيت كذا تفسير منهم وجود كمية زيت في الشكمان و هي سبب الدخان الأبيض و البعض قال إنه عيب في التقفيل، المهم النهاردة الصبح دورت العربية و لقيت الدخان الأبيض منع والعربية دايرة تمام و لما ضغطت علي دواس الفرامل لقيت الدخان الأبيض خرج تاني و بكثافة عالية واستنتجت فيه علاقة بين الضغط علي الفرامل و خروج الدخان الأبيض و عشان اتأكد قمت بنزع الخرطوم الواصل من مجموعة الفرامل الي المانيفولد و طبعا العربية برجلت ووضعت اصبعي علي فتحة دخول الهواء في المنايفولد و لاحظت كمية الدخان الأبيض بدأت تقل، أتمني لو حد عنده تفسير للي حصل دا ياريت يقدم النصيحة و لكم جزيل الشكر، بكرة إن شاء الله حقوم بفك مجموعة الماستر العمومي و اكشف عليها واللي فيه الخير ربنا يقدمه إن شاء الله و دمتم جميعا بخير.