سيراتو وصيانة الـ 5000 - توكيل محمد زكى

**wae.abdelmohsenl** · 23-12-2008 04:35 PM

اتصلت بالتوكيل يوم الخميس على الرقم 0100075302 الموجود فى خطاب الضمان على اساس احجز يوم السبت. لكن قلولى تعال علطول يوم السبت ومتتأخرش عن الساعة 9:30
رحت فعلا يوم السبت الساعة 9:30 وكان قبلى تقريبا 3عربيات.
ركنت العربية امام معرض محمد ذكى ولقيت واحد منتظر من الصيانة امام المكتب علشان يرشدك .
المهم دخلت المكتب وطلبوا من خطاب الصيانة والرخصة وسألونى عن اى حاجة فى العربية غير صيانة ال 5000 . قولتلهم على موضوع تريح العربية لأمام او الخلف حتى لو الأرض مستوية و عن زر غلق الزجاج الموجود فى الكونسول لايضئ ونعومة فى الهاند بريك.

اخدوا كل الملاحظات ودونوها وخدو المفتاح وقوللى حضرتك تنتظر فى الكافيتريا فى الدور التانى. فسألت هانتظر كتير قوللى ساعة ان شاء الله.

طلعت الكافيتريا فى الدور التانى وكان فى كل المشاريب ولكن مش مجانا وموجود بانوراما بتوضح الصيانة اللى بتم فى العربيات وممكن تشوف عربيتك.
خلال الساعة رحت اتجول فى المعرض واشوف العربيات السيراتو و الرينو ورجعت تانى للكافيتريا و الساعة 11 نادوا على اسمى ونزلت لقيت العربية امام المكتب بتلمع ومستنينى مسئول الصيانة وبيقولى اتفضل فى المكتب "طبعا علشان ادفع" ثم شوف الملاحظات.

دفعت تغير زيت98 جنيه و 40 فلتر زيت و ضريبة 13.8 المهم الكلى 152 جنيه.
العربية كانت مغسولة وكل الملاحظات تمام لكن لمبة قفل الزجاج لسه مبتنورش. المهم قولتلهم ونادولى المهندس محمد اللى عمل صيانتها وقللى ديه مبتنورش واللى بينور لمبة السنتر بس .فحس انى مش مقتنع راح وراهانى فى عربية تانية وطلعت مبتنورش فعلا.
سألته على اللى تم فى العربية قاللى تم تربيط العفشة ورجلاش للعجل الخلفى وتغير الزيت والفلتر وفتح الكبوت وقللى اتغسل بالفوم بس الشنطة مبتتغسلش من الداخل علشان لو فيها اغراض شخصية قولت ماشى مدقش ع الشنطة. واعطانى رقم اسعاف الطريق0103437499 لو قبلتنى اى مشكلة ع الطريق.

بعد كدة طلعت على الطريق وفتحت على الطريق وكنت شفت فيديو ان السيراتو بتقفل ال 200 حبيت اجرب وفعلا جبت ال 200 ومردتش ازود علشان الطريق فى نقل بس نفسى اعرف هاتقفل الأمبير220 والا لأ .

المهم يا جماعة الأنطباع العام عند محمد ذكى ان شايف جيد جداز

ملحوظة نسيت اقولهلكوا ان مفيش سمكرة عند محمد ذكى للأسف وموجوده فى ابو رواش.

**wildwest100** · 23-12-2008 06:15 PM

عقبال ال 500000 إن شاء الله

**lolly136** · 23-12-2008 06:53 PM

tamam tamam

**princemady** · 23-12-2008 10:58 PM

ألف مبروك يا باشا على صيانة ال5000 وعقبال صيانة ال100000 إن شاء الله
بالنسبة لأقصى سرعة أنا وصلت بيها لحد 180 وكان الثبات أكتر من رائع يا ترى الثبات عند ال200 عامل ازاى .. وبالنسبة لأقصى سرعة أنا شفت فيديو على اليوتيوب السرعة وصلت فيه لحد 210
وأشكرك على التقرير المتميز عن رحلة الصيانة

**wae.abdelmohsenl** · 24-12-2008 11:11 AM

الله يبارك فيكو يا جماعة
بالنسبة للثبات على ال 200 يا استاذ احمد رائع ومشيت حوالى 5 كيلو وكان نفسى ازود "فضول يعنى" بس للأسف الطريق مساعدنيش "طريق مصر السويس" كله نقل وترلات لكن كنت ماشى بين 180 و 160 وفى مناطق الردار كنت 100 .

وائل عبد المحسن