نيسان ليفينا المميزة بالصوره والتقييم عن تجربة Nissan Livina
السلام عليكم وكل عام وانتم بخير...
بالنسبه للسياره النيسان ليفينا:
بصراحة انا كنت متردد جدا قبل شراء السياره بسبب تقفيلها فى مصنع نيسان الصين ولعدم وجود السياره فى الشوارع المصريه حتى اتمكن من سؤال من جربها من قبل.
ولكن نظرا لانى لدى اسرة واطفال فكنت محدد تفكيرى فى سياره فئة ال (إس يو فى) او المينى فان..
عموما، هاتكلم شويه عن النيسان ال ليفينا فى نقاط: (علما بان السياره حتى الان قطعت 1100 كيلو فقط يعنى انطباعى لم يكتمل بعد)
ميزات:
- نفس محرك التيدا ونفس ناقل الحركه
- صوت المحرك هادئ جدا حتى مع زياده التحميل على المحرك.
- عزم قوى جدا فى اول سرعتين و عزم طبيعى فى السرعتين الاخيرتين.
- عدم شعور الركاب بنقلات الفتيس نهائيا حتى مع الكيك داون.
- حتى الان لم اسافر بالسياره ، أقصى سرعه وصلت ليها حتى الان 120 كيلو على الدائرى ، حتى هذه السرعه اشعر بأنها ثابته الى حد كبير جدا يعنى مش خفيفه زى عربيات كتير، سوف أعرفكم بأخبارها على السرعات العاليه لاحقاً.
- شكلها الخارجى جميل جدا بشهادة كل من شاهدها.
- المفتاح الذكى : بصراحة دا اختراع هايل جدا ، خلى المفتاح فى جيبك و اقفل وافتح و دور العربيه على راحتك دون استخدام المفتاح نهائيا، حتى البابين الاماميين والشنطه فيهم زرار صغير جدا يمكنك من فتح السياره بلمسه بسيطه ما دام المفتاح الذكى فى جيبك.
- فيها اثنين إير باج للمقعدين الاماميين.
- جنوط مقاس 15 (اربعه فقط) والاستبن جنط اسود عادى بنفس المقاس.
- بها حساس لاضائة الانوار اوتوماتيكيا عند الوجود فى مكان غير مضئ.
- سقف السياره عالى جدا بالنسبه لارتفاع رأس جميع الركاب.
- مساحة تخزين واسعه جداً من غير الحاجه لثنى الكنبه الخلفيه.
- على الرغم انها تقفيل مصنع نيسان الصين الا ان ادق التفاصيل فيها لا توحى بانها صينى على الاطلاق ، تقفيلها متقن وخالى تماما من العيوب الواضحه فى السيارات صينيه الصنع.
- بصفه عامة .. توكيل نيسان ومراكز الخدمة هى من احسن الموجود فى مصر.
- فيه ميزه اخيره وغريبه شويه بالنسبه لحضراتكو وهى ان السياره غير معروفه فى الشوارع المصريه ، يعنى الناس بتتفرج عليها فى الشارع باهتمام شديد وفى ناس كتيربتسألنى عنها والبعض فاكر انى جايبها معايا من خارج مصر.يعنى قدامى حوالى سنه هاكون راكب عربيه مميزه ومش منتشره فى الشوارع وانا شايف ان دى ميزه الى حدٍ ما. :)
ندخل على العيوب:
- سعر اعادة البيع ، طبعا هو غير معروف حاليا لكن من المتوقع انه يكون (ضايع) نظرا لحداثة السياره فى السوق المصرى و نظرا لانها ليست (كورولا او لانسر) زى ما حضراتكو فاهمين طبعا :)
- تجهيزات غير موجودة فى السياره ، مثل: مصابيح القرائه فى مقدمة السقف الداخلى ، مسند يد فى الكونسول بين المقعدين الاماميين ، مفتاح التحكم فى مستوى الاضائه الاماميه للسياره ، مصدر كهرباء ثانى (غير ولاعة السجائر) ، مخدع بالكنبه الخلفيه ، صندوق التابلوه لاتوجد فيه لمبة اضائه ، لا توجد فتحة سقف.
- بمنتهى الامانه ، هذة هى فقط عيوب السياره.
بصفه عامه :
انا مقتنع بهذة السياره مش بس علشان انا اشتريت واللى حصل حصل ، بس هى فعلا سياره مقنعه فى ادائها واناقتها وعزم محركها القوى فعلاً.
عموما ارجو ان اكون قد اعطيت فكره واضحة عن النيسان ليفينا ، واذا فى اى حد مهتم بالموضوع ده وعنده اى اسئله اخرى فأنا مستعد للمزيد من التوضيحات.
وهذة مجموعة صور للسياره أرجو أن تكون شامله ووافيه
مع الشكر والتقدير لكل من قرأ هذا الموضوع.
و سلام الله عليكم جميعاً.
http://www.postimage.org/Pq10My0J.jpg
http://www.postimage.org/aV14QXvr.jpg
http://www.postimage.org/aV14RPnA.jpg
http://www.postimage.org/aV14RUmS.jpg
http://www.postimage.org/gx1PFm1r.jpg
http://www.postimage.org/aV14Siji.jpg