الموضوع: اسباب عدم انخفاض اسعار السيارات فى مصر

يا جماعة عايزين تعرفو ايه اللى حيحصل اسألو نفسكو فيه ايه فى البلد ديه عمره رخص فعلاً؟؟؟ الدنيا كلها بيحصل فيها تقلبات سياسيه و اقتصاديه و الأسعار شوية تطلع و شويه تنزل ماعدا احنا... الأقتصاد بطاعنا ما شاء الله عليه واخد اتجاه و ثابت عليه (لتحت طبعاً) و الأسعار عندتا مابتعملش حاجه غير انها تطلع - بسبب أو بدون - و عمرها ما بتنزل... و لو حصل زى ما الناس بتقول الأيام ديه ان فى مثلاً بعض العربيات رخصت 10 و 15 الف فده بيبقى حاجه من اثنين... يا أما نزول مؤقت فى صوره أوفر و أجرى و الحق قبل ما يخلص و يبقى لفترة محدوده جداً (نسبياً طبعاً) ياأما نزول كاذب - أسماً فقط - و لما تيجى تشترى فعلاً (و عادة بعد أما تدبس بعربون أو مقدم) يقولولك أصل الكميه خلصت و مستنيين الشحنة الجديده و طبعاً ديه ماحدش عارف سعرها و يجروك ورا المقدم بتاعك ده شهور لما تبقى خلاص قرفت و طهقت و عايز تخلص بأى شكل... ساعتها يكونو هما كومو أضعاف أضعاف الطلبات عن عدد الشحنه الجديده و يقولولك مع الأسف السعر زاد قدامك حل من أثنين:
- تأخذ فلوسك (و طبعاً هما ياخدو فايدة ركنتها فى البنك الشهور ديه) و مع السلامه... ماهو أصلهم مستغنيين عنك لأن عندهم طلبات بزياده
- أو ترضى بالسعر الجديد و اللى زاد 5 ولا 10 و يدوك طقم دواسات ب100 جنيه هديه منهم علشان خلوك تستنى

فكرو كده حتلاقو ان هو ده حالنا على ألأقل فى ال20 سنه اللى فاتت... و لو حد يعرف سلعة فعلاً رخصت يريت يقوللنا و أتمنى أكون غلطان! :-(

و على فكرة موضوع المقاطعة ده فعلاً حاجه جميله جداً لاكن مع الأسف مابتنفعش عندنا... عارفين ليه... أولاً علشان خاطر احنا مابنعرفش نشتغل مع بعض (Teamwork يعنى) و لما بيحصل و فعلاً بنشتغل مع بعض بيطلع نفسنا قصييييييييييييييييييييييي يييييير و مع أول تهويشه بس تلاقى عقدنا اتفرط و كل واحد جرى ورا حاله... يا جماعه المقاطعه ديه (أو أى نوع من انواع المعارضه) مشوار طويل و زيها زى الحرب لازم فيها خسائر للجانبين و اللى يصبر و يكون نفسه أطول هو اللى بينتصر فى ألأخر... ماتفتكروش ان احنا أول ما نقاطع الأسعار حتنزل... ده ممكن يحصل العكس تماماً و الأسعار تغلى فى محاوله لإرهاب المعارضين على طريقة "أنتو مش عاجبكم السعر كده طيب خده بقى السعر الجديد و انا حاواريكم"... طبعاً تصرفنا ساعتها بيكون "الله يخرب بيت اللى قال مقاطعه و حترخص، أهيه غلييت اهيه، الحق بقى أشترى دلوقتى قبل ما تغلى تانى" و تنتهى المعرضه و يبقى زى مابيقولو... أعترف مع أول قلم، فى البوكس و قبل حتى ما يوصل القسم!!!

على العموم أتمنى ان اكون غلطان، فعلاً فى ديه بالزات حاكون مبسوت جداً لو طلعت غلطان و ربنا يستر علينا و على عيالنا.

ربنا لا تؤاخذنا إن نسينا أو أخطأنا،
ربنا و لا تحمل علينا إصراً كما حملته على الذين من قبلنا
ربنا و لا تحملنا ما لا طاقة لنا به و اعف عنا و اغفر لنا و ارحمنا
أنت مولانا فانصرنا على القوم الكافرين