المحور ينهار من جديد

**abzoabzo** · 31-12-2008 02:11 PM

تتحاسب فى ميدان عام علشان تبقى عبرة
امال لو الطريق ده بيمشى عليه نقل ثقيل
هايعمال ازاى
عمار يا مصر
2009 ومش عارفين نعمل طريق

**farahat** · 31-12-2008 02:29 PM

المشاركة الأصلية كتبت بواسطة migomax

اهاااا .... انا عديت هناك من فترة بس مش فاكر فين بالظبط وكانوا معلقين اعلانات على عواميد النور .. كاتبين عليها 500000 ساعة عمل انجزنا معرفش ايه وايه وايه ..
80000 رجل انجزوا معرفش ايه وايه برده ...
و 600 طن حديد عملنا وسوينا ...

وفى الاخر بعد 1000 ساعة باظ كل حاجة ..

بمناسبة الكلام دة و ع بعدي عليه كل يوم تقريباً ، فكرت مرة أحسبها كدة لو هما ٥٠٠ ألف ساعة عمل و إشتغل في المشروع دة ٨٠ ألف شخص ، يعني كل شخص إشتغل كام ساعة تقريباً ؟ ...
حوالي ٦ ساعات و ربع !!!
شفتو الإنجاز بقى

**hesham_tawfiq** · 31-12-2008 03:06 PM

انا بؤوول نبعت للصين تعمللنا محور بربع التكلفه واهو ينفع يتفك ويتركب فى ميت حته حسب الاحتياج

**a_tantawy7** · 31-12-2008 05:53 PM

يا اخواننا ده في شوارع وطرق الواحد بيقى ماشي يضرب كف على كف من سوء الطريق, خد عندك مثلا, كوبري العاسية(خصوصا الحارة الشمال.), بعد ماتخلص كوبري 15 مايو وقبل ماتنزل ميدان لبنان. وغيرهم كتير. اللي مجنني ازاي اللي أستلم الطرق دي وافق على استلامها بهذه الصورة المزرية.
حسبي الله ونعم الوكيل.

**M!NA** · 31-12-2008 05:58 PM

فين بالظبط الجزء اللي انهار؟
لو أنا مثلا رايح من 15 مايو و نازل نزلة اسكندرية الصحراوي... هعدي على الحتة ديه؟
ولا هي بعد كدا في اتجاه أكتوبر؟

**mero78** · 31-12-2008 07:10 PM

المشاركة الأصلية كتبت بواسطة Terrible_DaRsH

مفيش غير المقاولون العرب .... هما الحل الوحيد ..
الناس دى اى حاجة غلط بتتعمل بتبقى كارثة لان ليهم اسم كبير اوووى..

المقاولون العرب بتدى عملية الصيانه الى شركات المقاولات الصغيره من الباطن وهى دى المصيبه

**Mostafa Hessen** · 31-12-2008 08:05 PM

هى دى مصر

لا تعليق

**MohabSaeed** · 31-12-2008 10:27 PM

للاسف فعلا حصل هبوط فى طريق المحور " فى الاتجاهين " و هما دلوقتى حاطين علامات تحذيريه مكان الهبوط ده الى ان يتم الاصلاح
بجد حزنت جدا جدا لما شوفت المنظر ده الطريق الى مبقالوش كام شهر يحصل فيه كده
الحاجه التانيه الى بدأت الاحظها قبل النفق فى اتجاه ميدان لبنان ... الاسفلت بدأ يتموج نتيجه لان كل السيارات بتفرمل و هى نازله المنزل " علاشان فى رادار فى اخر المنزل " و ده سبب ان الاسفلت فى الحته ديه تحديدا مبقاش مستوى و على دخول الصوف القادم حالته حتبقى سيئه جدا . ربنا يستر
الحاجه التالته زى ما " صديق الكفاح فى 6 اكتوبر و المحور " ممدوح موتورايزر قال ... تقسيم الحارات يعتبر تهريج لان الحاره الاخيره الى عند الفواصل الخراسانيه ضيقه جدا جدا يعنى العربيه الى حتمشى فيها بينها و بين الفواصل اقل من 20 سم !!!!! بأنهى منطق اتقسمت الحارات التقسيمه العجيبه ديه !!!!!! و ليه من الاول ماقسموش الطريق صح !!!
يعنى فى البدايه ازالو الرصيف الى فى النص الى مالوش لازمه ...و قولنا خير , قوجئنا انهم عملو رصيف اعرض من القديم و خلو الطريق تلات حارات ... قولنا ماشى , و بعدين لما تيقنو ان الرصيف مالوش لازمه فى طريق زى ده و اهدار لمساحه كبيره فى الطريق شالوه تانى و عملوة بلوكات خراسانيه ... بس بعد ما كانو قسمو الحارات على اساس تلات حارات حبو يخلوها اربعه ضربت منهم الحسبه ... و الحاره الرايعه ديه ماتنفعش غير للعربيات الصغيره جدا و الموتوسكلات !!!

مشكلتنا انن لما نيجى نعمل حاجه مش بتخططلها صح ... ازاى الموضوع ده متعملوش حساب من الاول .
و دلوقتى ربنا يستر من موضوع هبوط الطريق و مايمتدش لاكتر من مكان .