-
أفيدوني : سيات 133
السلام عليكم ورحمة الله
أنا الحقيقة دي اول مرة اشترك في المنتدي واعجبت جدا بصراحة باهتمام الناس ببعض وسرعة الافاده والرد علي الاسئلة, ربنا ياجر كل اللي بيفيدونا بخبرتهم في مجال السيارات....
الحقيقة انا محرج من سؤالي جدا :shyy: لانه ممكن يخنق الناس .... اصلي لقيت كل الناس بتتكلم في سيات ابيزا وموضيلاتها وغيرها من السيت الحديثة بس انا بقي النهارده بسال علي السيت القديمة الخنيقة.... سيت 133
انا بصراحة عايز اجيب واحده لان امكانياتي محدده اوي وممكن توصل مثلا ل 8000 جنية.... وكنت سمعت انها وصلت دلوقتي ل4500 و5000 ... وكنت بقول اجيب واحده واصرف عليها الف او الفين لاني سمعت ان في تعديلات بتتعمل في الموتور والكبالن عشان تستحمل سفر وماتسخنش وكده...
فهل في حد يقدر يفيدني في الموضوع ده وينصحني اعمل اية؟؟؟ وجزاكم الله خيرا
-
سفر؟؟!!
تقصد كام كيلو و كام مرة في الشهر؟؟!!
دي مش بتاعة سفر خالص.
اقتنيتها لمدة 10شهور سنه 2005. هي كانت آخر موديل (82) و مش راشة دواخل. الموتور كان حلو( وصل ل100 كم/س) قليل الأعطال. لم أشعر بأى سخونة لكن بصراحة عفشتها ضعيفة فوق الوصف.
الفلنشات اللي الناس بتلغيها و تركب كبالن 128 ده اختراع كويس خصوصا ان الكبالن مش هايبقى عليها ضغط (مش هاتلف لأنها في الخلف)
ده حكم متواضع
-
بالمناسبة أنا ماسافرتش بيها مشوار اطول من 40 كم (20 رايح 20جاي صد رد )وكان معايا 4 في العربية غيري. ماسخنتش و ماكانش فيها أي مراوح اضافية. لكن انكسر فيها 2مساعد خلفي!!
الله يرحم ايامها. عملت اللى عليها برضه.
-
جزاكم الله خيرا علي الرد السريع
أنا شاكر جدا لردك وأهتمامك...
بس أنا كده مش عارف ... طب يعني رايك اجيبها واعمل التعديلات دي... وممكن تادي الغرض مع الاهتمام بيها كويس من وقت لاخر ولا طيب في حاجة ممكن اجيبها في نفس الرينج ده وتكون احسن منها ولا اية؟؟؟
-
الموضوع يرجع الي معدل استهلاكك و حالة العربية. انت ها تسافر قد ايه؟
-
شوف انتا هتعمل بيها ايه وهتسافر بيها اد ايه لو سفرك هيبقا كتير ومتكرر بيها منصحكش
العربية اوكيه بتستحمل لاكن انتا كدا هتكون بتهلكها كل حاجة وليها طاقة معينة
لو سفرياتك كتير حاول تستنى شوية وتشوف 127 بحالة نضيفة
هتبقا كويسة معاك واريح نسبيا بفرق واضح عن السيات
وشوف انتا وزي متحب
-
أنا المفروض اني ممكن اسافر بيها مرة في الشهر حوالي 120 رايح و120 جاي... ويدوبك هستخدمها اروح بيها شغل بيني وبينة 15 دقيقة... واقضي طبعا المشاوير اللي بتجي فين وفين مرة كل اسبوع اواسبوعين.... يعني متهياءلي ممكن تستحمل معا الاهتمام بيها
جزاكم الله خيرا علي الاهتمام يا جماعة:verygood:
-
نصيحة لوجه الله بلاش السيات دي خالص لانها حتكلفك كتير اوي في صيانتها يعني مش حتبقي عملية خالص
انت بتقول عاوز تسافر بيها 120كم رايح وزيهم جاي كتير برضه مش قليل ..... احنا كان عندنا سيات زمان كنا عاوزين نروح بيها مصيف في قرية مراقية اللي في الساحل الشمالي يعني مشورا حاجة و خمسين كيلو من اسكندرية و احنا في منتصف الطريق لقينا الموتور كان حيولع من السخونة ...
انا من رايي استني شوية لغاية ما تحوش 3الاف او 4الاف كمان و جيبلك حتة 127 باب واحد حالتها كويسة حتبقي برقبة السيات
-
طيب يا جماعة ال 127 توب اللي حالتها كويسة مش عايزة شغل كتير ممكن تعمل كام تقريبا؟ هضطر ازود فلوس كتير؟ وهل سعرها نزل مع نزلة الأسعار اللي بيقولوا عليها؟؟
-
زي ما فيه سيات ما تقدرش على السفر فيه سيات تقدر (فرق حالة العربية)
لكن ده ما يمنعش ان فعلا ال127 توب اختيار احسن بكتير. انا شوفت واحدة كويسة من شهرين كانت عاملة 11ألف. شوف متوسط السعر من car100100.com و ممكن تعمل search في قسم البيع و الشراء هنا في المنتدى.
Content Relevant URLs by
vBSEO 3.6.0 PL2