لو سمحتوا أيه الفرق بين الفرق بين الزيت العادة والزيت السوبر وأيهما أفضل للسيارات الزيرو؟
لو سمحتوا أيه الفرق بين الفرق بين الزيت العادة والزيت السوبر وأيهما أفضل للسيارات الزيرو؟
الزيت العاده عدد كيلومتر أقل و لزوجة أعلى و يفضل حينما يكون الموتور قديم أو بياكل زيت أما السوبر فعدد كيلومتر أكبر ويفضل للسيارات الجديدة وبرغم فرق السعر هو أوفر فى عدة نواحى والله أعلم
متشكر جدااااا على الرد بس ياريت تقوللى ايه احسن نوع فى السوبر
الزيت السوبر انواع كتير
كل الماركات العالميه متشابهه في الجودة و السعر لكن من تجارب الزملاء في المنتدي شل و توتال (مستورد) و امارات مصر هما اللي ماشيين دلوقت و موبيل شوية سمعته قلت (يصنع في مصر من مدة طويلة)
لو العربية زيرو استعمل زيوت تخليقية احسن و ارخص علي المدي البعيد (مثال : موبيل 1 ، شل هيليكس) و كل الانواع اللي في السوق مستوردة
نصيحة تجنب تغيير نوع الزيت كل شوية و ابتعد تماما تغيير عائلة الزيت (عادي ، سوبر ، تخليقي)
ايضا هناك مواضيع عن الزيوت بالمنتدي ستوضح لك الصورة اكثر
الزيت العادة هو زيت احادى درجة اللزوجة ، وده معناه انه بيكون لزج جدا وهو بارد ومتوسط اللزوجة حين يسخن، يوجد منه نوعين ، نوع SAE 40 وهو الاكثر انتشارا
ومجال استخدامه هو المحركات ذات التصميمات القديمة عندما تكون بحالة متوسطة، يعنى مثلا عربية 128 او 131 موتورها مش جديد ومش مفوت
ويحتاج هذا الزيت الى تغيير على فترات متقاربة عن السوبر (1500 الى 2000 كيلومتر) كما يحتاج لتسخين السيارة صباحا
والنوع الآخر هو SAE50 وهو اكثر لزوجة وانسب للمحركات القديمة والمفوتة الى حد ما
اما الزيت السوبر فهو زيت مخلوط متعدد الدرجات ، ومعنى كلمة متعدد الدرجات ان نسبة التغير فى درجة لزوجته بين البارد والساخن مش بتكون عالية وهذة ميزة لضمان عدم الإحتياج لتسخين كثير صباحا وكذلك الإحتفاظ بلزوجة مناسبة فى ظروف التشغيل والنوع المنتشر فى مصر هو نوع SAE20-50 ويمكن استخدامه مع المحركات الجديدة سواء كانت ذات تصميم حديث او قديم(يعنى ممكن يتحط فى لانسر او كورولا او شاهين او لادا او 128 جديدة) وكذلك يستخدم مع المحركات متوسطة العمر ذات التصميمات الحديثة (مثلا كورولا عاملة 200 ألف او اكسنت عاملة 120 ألف) ويتم تغييره من 3000 الى 5000 كيلومتر حسب حالة السيارة
الزيت التخليقى هو زيت متعدد الدرجات ولكنه مصنع فى المعمل عبر تفاعلات كيمائية وليس عن طريق خلط مجموعة من مشتقات البترول ويوجد منه انواع مثل SAE15-50 و SAE 10-50 وSAE5-50 ويتميز ببقائه محتفظا بخواصة لفترة طويلة جدا ولذلك يمكن تغييره على 10000 كيلومتر ، وينصح قبه فقط للمحركات الجديدة ذات التصميم الحديث، يعنى مثلا لا ينصح به لسيارة شاهين او لادا زيرو وكذلك لا ينصح به لسيارة كورولا عاملة 250 ألف كيلومتر إلا فى حالة انها متعودة عليه من البداية
يوجد نوع اخر من الزيوت يسمى زيت البرافين، طرحته بى بى bp (british petroleum)o فى مصر حاليا ومفروض انه يمكن استعماله حتى 30 ألف كيلومتر، بس انا مجربتوش لسة
ربنا يبارك فيك يا بشمهندس سبعاوي على التوضيح الممتاز
من فضلك يا بشمهندس عايز اخد رايك ... عربيتي دايهاتسو شارمنت 83 ( موتور تويوتا كورونا 1600 ) عاملة اكتر من 500 الف كيلو ( بسم الله ماشاء الله ربنا يزيد ويبارك :D ) بس الماتور ماشاء الله حالته جيدة جدا ومش بياكل زيت الحمدلله
ايه افضل نوع زيت محرك يتحط فيه ؟؟؟ انا اخر مرة حطيت شل سوبر الجركن الاصفر اللي بيقعد 3000 كيلو
وجزاكم الله كل خير
شكرا للرد الوافي يا باشمهندس سبعاوي واتمني الافادة تعم جميع الاعضاء انشاء اللة بس ليا استفسار بسيط انا عربيتي دايو اوتوماتيك وعاملة 140000 كيلو الموتور الحمدللة بصحة جيدة تنصحني استعمل زيت ماركة ايه وبكام؟ وباعتذر عن الاطالة
وشكرا جزيلا
بالنسبة للسؤالين فانا اقترح زيت سوبر SAE20-50 يتغير من 3000 الى 4000 كيلومتر او 6 شهور ايهما اقرب
شل هيليكس الأصفر اختيار ممتاز من هذة النوعية وكذلك توتال كوراتز 5000 وفيه ناس جربت إمارات مصر وبيقولوا عليه ممتاز