أنا عايز أسأل سؤالين بيحيروني كل ما بسمع الشيخ بتاع المسجد بيدعي لغزة ..
أولا هل فلسطين انحسرت في غزة ؟؟ مش عارف بحس اننا كل ما هنقول غزة هننسى ان فيه وطن اسمه فلسطين , افتكر أيام زمان كنا بندعي لإخواننا في فلسطين دلوقتي بقينا ندعي لإخواننا في غزة .. شوية وهندعي لإخواننا اللاجئين في سيناء !!
ثاني سؤال بقعد أفكر واقول واتمنى ان محدش يزعل مني من اخواني اللي على خط ديني أيا كان .. بس بحس ان بعض المتدينين فكرهم سطحي جدا ومتخيلين انهم لما يكونو كل همهم في الدنيا حضور دروس في المساجد ودعاء على الكفار في الصلوات انهم كده عملو اللي عليهم !! طيب فين مسؤوليتك تجاه امتك من الناحية الحياتية العامة يعني فين دورك في تحسين وضع الأمة وفين دورك في انك تنهض بالأمة علشان ميجيش حد زي اسرائيل تعربد وتقتل فينا واحنا كل اللي بنعمله اننا ندعي عليهم .
وبعدين انا عندي سؤال عن دعاء بسمعه كثير ومش عارف هل له أصل في القرآن أو السنة ولا هو مجرد اجتهاد من الدعاة .
الدعاء بيقول (اللهم اهلك الظالمين بالظالمين واخرج المسلمين من بينهم غانمين سالمين ) بحس انه بيدعو للتواكل واننا كل حاجة نعملها اننا نستنى ان الظالمين يضربو في بعض واحنا نتفرج عليهم ونطلع زي الشعرة من العجين منتصرين !!
طبعا انا مش عارف ان كان للدعاء ده أي أصل في النصوص علشان كده اتمنى ان اي حد يعرف يا ريت يدلني علشان احاول افهم المغزى منه ..
وبصراحة موضوع د. أحمد أكثر من رائع وانا بحترم جدا الفكر الناضج في تحليل المواقف السياسية وفهمها .
المفضلات