لما أدور بتفضل لمبة ال Esp منورة ثانيتين كده وبعدين تطفي - هيونداى I10

**a_tantawy7** · 29-12-2008 06:31 PM

السلام عليكم ,
أنا معايا عربية هيونداي i10 وزي الفل الحمد لله رغم أني بعاملها معاملة العبيد المهم, النهاردة لاحظت حاجة غريبة أن لما أدور بتفضل لمبة ال ESP منورة ثانيتين كده وبعدين تطفي ودي حاجة ماكانتش بتحصل قبل كده(كانت بتطفي على طوول )
ده معناه أيه هل ده معناه أن في مشكلة ؟
أرجو الافادة من أصحاب الخبرة, وجزاكم الله خيرا.

**som3aa** · 29-12-2008 08:34 PM

مش عارف معناه فى مشكلة و لا لأ
بس الEPS معناها Electric power steering يعنى الpower بتاع الدركسيون , حضرتك بتحس الدركسيون تقيل و لا عادى؟

**a_tantawy7** · 29-12-2008 08:58 PM

المشاركة الأصلية كتبت بواسطة som3aa

مش عارف معناه فى مشكلة و لا لأ
بس الEPS معناها Electric power steering يعنى الpower بتاع الدركسيون , حضرتك بتحس الدركسيون تقيل و لا عادى؟

والله يا باشا لحد دلوقتي عادي, بس أنا خايف أن اللمبة تنور وبعدين تطفي ده يكون مؤشر لحاجة.

**د.محمود صلاح** · 29-12-2008 09:09 PM

أعتقد ده شئ عادى ان اللمبات كلها بتاعة انظمة التشغيل بتنور فى الاول لمدة بسيطة كإختبار ثم تنطفئ

**M.Mokhtar** · 30-12-2008 01:17 PM

شوف يا باشا الانظمه دى كلها ABS - EPS - SRS - Engine وغيرها
لما بتدور او تفتح الكونتاكت لازم تفضل منوره شويه كام ثانيه كده بعد كده تطفى
عشان كل كنترول من دول بيعمل فحص لمكونات الدائرة بتاعته وبشوف سليمه ولا لأ لو سليمه بيطفى اللمبه لو مش سليمه مش هيطفيها خالص

كون انك مش كنت بتشوفها فى الاول ده يمكن عشان كنت بتفتح الكونتاكت الاول وبعد شويه تدور بتكون هى طفت اساسا
لكن لو دروت على طول بسرعه هتلاقى طفت بعد ما العربيه تدور بثوانى

كون انها بتطفى يبقى مفيش مشكله حتى لو اتأخرت
المشكله لو فضلت منوره

**Ghamrawy** · 30-12-2008 04:43 PM

هى ال i 10 فيها Electronic stability program (ESP) طب ازاى؟؟؟
و اعتقد ان اللى بينزل مصر بتنزل فاضى و ده موقع عن ال i10 و فيه كل المواصفات

http://hyundaii10.co.in/safety.asp

**a_tantawy7** · 30-12-2008 06:43 PM

أنا في حاجة مش فاهمها, أنا كنت عامل الموضوع بأسم EPS وليس" لما أدور بتفضل لمبة ال Esp منورة ثانيتين كده وبعدين تطفي - هيونداى I10" و أنا متأكد من كده لأن عربيتي مفيهاش ESP, وبعدين التنبيهات باستلام ردود جديدة اللي بتجيللي على الemail كانت باسم الموضوع الأصلي "EPS" وبعدين بقت باسم "لما أدور بتفضل لمبة ال Esp منورة ثانيتين كده وبعدين تطفي - هيونداى I10"
ومش فاهم ازاي اسم الموضوع اتغير وكمان بدل ماكنت كاتب EPS جوه الموضوع بقت ESP , أرجو الايضاح من الادارة؟

**Ghamrawy** · 30-12-2008 10:10 PM

أعتقد ان قصدك Abs مش Eps عموما هى اللمبة بتاعة ال Abs لازم تنور زيها زى اى لمبة فى التابلوه (الزيت-البطارية او الدينامو) فى بداية الدوارة و لما الكونترول يونت بيخلص فحص لكل الحاجات دى اللمبات بتطفى ماعدا الحاجة اللى فيها مشكلة

**a_tantawy7** · 30-12-2008 10:28 PM

المشاركة الأصلية كتبت بواسطة gemino

أعتقد ان قصدك Abs مش Eps عموما هى اللمبة بتاعة ال Abs لازم تنور زيها زى اى لمبة فى التابلوه (الزيت-البطارية او الدينامو) فى بداية الدوارة و لما الكونترول يونت بيخلص فحص لكل الحاجات دى اللمبات بتطفى ماعدا الحاجة اللى فيها مشكلة

يا فندم لأ أنا قصدي
(EPS(electronic power steering.
أنا معنديش لا esp ولا aps وأنا عارف كويس الفرق بينهم وبين الEPS اللي أنا قصدي عليه واللي موجود في عربيتي.
شكرا لاهتمامك أستاذ gemino
ولسة السؤال مطروح للادارة ايه اللي غير اسم الموضوع وغير المصطلح محل الاستفسار داخل الموضوع منEPS اللى ESP؟
هل من مجيب؟