مين اللى غلطان؟؟؟

**bassam266** · 30-12-2008 10:26 AM

المشاركة الأصلية كتبت بواسطة ZAKI32

حمد الله على سلامتك انت الاول انك محصلكش حاجة لاقدر الله.

الله يسلمك

المشاركة الأصلية كتبت بواسطة ZAKI32

اهم حاجة الواحد مايشدش مع حد الا لما يكون متأكد مليون مرة ان الطريق تمام وهيساعدك ومفيش حاجة تطلعلك لاقدر الله زى الخزوق.

و الله يا استاذ زكى انا مبشدش فى حته معرفهاش ده غير انى من اسكندريه يعنى سايق على البحر اكتر ما مشيت فى طرقه بيتنا.

و شكرا على المرور.

**bassam266** · 30-12-2008 10:31 AM

المشاركة الأصلية كتبت بواسطة asaadte

حمدالله على السلامة يا مان

الله يسلمك

المشاركة الأصلية كتبت بواسطة asaadte

العبرة ايه : ان اللى مش قد الحاجة ما يعملهاش من الاول ، وماداموا مش اد الشد ما يشدوش

+10000000000000

المشاركة الأصلية كتبت بواسطة asaadte

ونصيحة : ابعد عن الشد على الكورنيش

متشكرين على النصيحه يا باشا بس الكورنيش منغير شد زى الكيكه منغير سكر (مينفعش).

و شكرا لمرورك.

**bassam266** · 30-12-2008 10:47 AM

الاخ توت عنخ امون
بعد السلام عليكم

طبعا كل الكلام اللي أنا قرأته فوق ما عدا المداخله ما عدا المداخلة رقم 3
كله غلطان ......... الشد ده بصراحة و آسف على الكلمة ..... حاجة مش كويسة
لأن اللي عايز يشد يروح مكان مخصوص و يتفرج على عربيته و يشد زي ما هو عايز
إنما طول ما أنت على طريق الناس بتستخدمه ........ يبقى حرام عليك لأن ببساطة ممكن واحد برئ لا له في الدور و لا في الطحين و يلبس حادثة بسبب أثنين بيشدوا مع بعض

انا معاك 100% ان الشد ده غلط و لكنه شر لابد منه و بعدين انا و صحابى عندنا نظريه فى الشد احنا مش بنجرى بمعنى ان مفيش حد بيطلع فوق ال100 حتسألنى طب بتشد ازاى؟؟
الشد عندنا مش جرى الشد هو تحكم فى العربيه لاننا مقتنعين ان اى عربيه حتوس فيها بنزين حتجرى و كمان ان الحرفنه مش عربيه الحرفنه سوااااااااق فأحنا بكل بساطه بنعمل ايه؟؟
احنا بنروح لحد المنتزه ده اول الكورنيش و واحد يبقى قدام و التانى يبقى وراه لحد القلعه و الادام لو اخد غرزه و اللى وراه معرفش يخدها بعديه يبقى اللى ورا عليه نقطه و هكذا لحد القلعه نلف و اللى ورا يبقى قدام و اللى قدام يبقى ورا لحد المنتزه و نحسب فى الاخر كل واحد عليه كام و اللى عليه نقاط اقل يبقى هو اللى كسب.
عشان كده انا مبجريش على البحر غير لما اشد مع ملاكى القاهره بس لانه للاسف بيبقى فاكر ان الشد مجرد انك تسبق اللى انت بتشد معاه.

و بعدين كليو أيه اللي هاتشد مع أوبترا ......... موتور 1200 و موتور 1600 بالعقل لازم الأوبترا تكسب

اسمحلى اختلف معاك انت ماشى على طريق فيه عربيات تانيه و ممكن يكون زحمه هنا الموتور ال1000cc زى الموتور ال1600cc لانك مش بتجرى اوى يعنى.

بلاش شد و حركات من دي يا أخواني ......... عواقبها وخيمة جدا
و تخيل لو واحد بيشد مع واحد تاني و قتل نفس بريئة أو حتى هو مات شخصيا
و راح لربنا يوم القيامة
يقوله أيه ؟؟؟؟؟؟؟ كنت بشد مع عربية تانية علشان أثبت قوة عربيتي أو حرفنتي في السواقة ؟؟؟؟

+1000000000 بس زى ما قلت قبل كده شر لابد منه.

اللهم أهدنا فيمن هديت و أغفر لنا و أرحمنا ......... و أهدي السائقين المصريين و أنا منهم

امين

و السلام عليكم و رحمة الله وبركاته

و عليكم السلام و رحمة الله و بركاته.

**bassam266** · 30-12-2008 10:51 AM

استاذ ايهاب

طيب ما تسيبك من الكورنيش خالص و امشى فى شوارع تانية علشان الغلابة اللى زى حالاتنا بتوع القاهرة لما ينزلوا اسكندرية

ياباشاش انت تآنس و تشرف بس لو انت تعرف اسكندريه كويس حتعرف ان الكورنيش ده واحد من شارعين رئيسين بس فى اسكندريه الكورنيش و شارع ابوقير و التانى اغلب الوقت زحمه و الكورنيش اوسع بكتير يعنى مينفعش ممشيش على الكورنيش.

بس اوعدك لما تيجى حبقى اركن عربيتى فى الجراج و ابقى اركب معاك و انت توصلنى بقى :)

**bassam266** · 30-12-2008 10:59 AM

المشاركة الأصلية كتبت بواسطة tutankhamoun

معلش يا أخ بسام ممكن أضيف حاجة تانية بعد أذنك و بدون زعل
تخيل إن أنت وقعت مع واحد عربيته أشد من عربيتك و أحرف منك يعني أحسن منك في السواقة و زي ما أنت قلت السواقة ملهاش كبير
ترضى إن أنت اللي تكون في المستشفى متجبس ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟

ربنا يحفظ طريقنا و طريقك و يسترها علينا

يا باشا مفيش زعل ولا حاجه كلنا هنا اخوات بس انا عايز اوضح لحضرتك حاجه انا مبشدش على الفاضى و المليان و مبشدش مع حد معرفهوش الا نادر الهم الا واحد حلو كده شاف نفسه عليا و قالى تعالى ورينى نفسك ده مينفعش ما اشدش معاه و لو لقيته غشيم و بيجرى غلط بأدى اشاره و اخد اول تيرن و افكنى منه لانى اول حاجه بحطها فى دماغى سلامتى انا و اللى حواليه و العربيه(بتاعه والدى)
و بعدين مفيش حد عرف يعملها لحد دلوقتى و الحمد لله واخيرا انا اكيد مرضاش انى اكون فى الجبس لانى مجربه قبل كده بس مش فى حادثه عربيه:)
وربنا يحفظ طريقنا و طريقك و يسترها علينا اللهم امين

**bassam266** · 30-12-2008 11:03 AM

و صاحب الموضوع عليه غلط كبير طبعا مع إللى شدوا معاه
و شكله مضايق قوى من كلمة ملاكى القاهرة :b4_282:

يا شاركى باشا انا اكيد عارف انى عليا غلط بس مين غلطه اكبر انا ولا هما؟دى حاجه

تانى حاجه انا مش متضايق من كلمه ملاكى القاهره حرام الكلمه ملهاش ذنب المشكله فى الناس اللى بتبقى راكبه العربيات الملاكى القاهره اكيد طبعا مش كلهم فى ناس منهم محترمين جدا بس انا لسه مقابلتش النوع ده مش اكتر.

**hesham_tawfiq** · 30-12-2008 11:10 AM

معلش يعنى ممكن كلامى يزعل حضرات المؤيدين بس هقوله والارزاق على الله
يعنى ايه حضرتك الشد شر لا بد منه ؟ دا فى منطق مين ؟!!!
فيه ناس تانيه بتستخدم الطريق غير حضرتك وفيه منهم اللى سايق وفيه منهم اللى ماشى على رجليه . ودول ليهم حقوق على مستخدمى الطريق والا مكنش يبئى اسمه " طريق عام " .
وبعدين ايه موضوع النقط ولو خدت غرزه وزميلى ملحئش ياخدها يبئى عليه نقطه !!!!!
ولو لاقدر الله زميلك دا خدته الجلاله وسخن وجه ياخد الغرزه عشان ميخسرش ولئى غرزه مقفوله ولا حد بيعدى الشارع النقطه دى هتعوض المصيبه اللى هتحصل
ثم ان حضتك بتتكلم عن كورنيش اسكندريه كأن محدش مشى فيه قبلك مع ان دا اسوء طريق ممكن يتشد فيه كلله انحنائات خطر وملفات وبدون حواجز منتصف الطريق
بيتهيألى حضرتك محتاج تراجع نفسك انت وزمايلك ومتستسلمش لاستفزازات التافهين على الطريق
ليس القوى بالصرعه وانما القوى اللذى يملك نفسه عند الغضب.
عموما زى ماقلت لحضرتك كلامى هيزعلك انما الارزاق على الله وفى الاخر ادعو الله ان يهدينى واياكم
drive responsibly

**momo10000** · 30-12-2008 11:16 AM

يا باشا حمد الله علي السلامة .....

بس انت برضة خلي بالك من ميجان هاتش باك سوداء ملاكي جيزة اخرها 666 سواء في اسكندرية او بورسعيد او حتي في السنبلاوين...

**bassam266** · 30-12-2008 11:39 AM