كان يا ما كان يا ساده يا كرام ما يحلى الكلام الا بذكر النبى عليه الصلاه و السلام.
كان فى مره شاب برئ عايش فى الاسكندريه كانت امنيه حياته انه يطلع رخصه و يجيب عربيه.
و من شده حبه فى العربيات اتعلم السواقه و هو عنده 12 سنه بس و مش بس كده ده كمان دخل كليه الهندسه قسم ميكانيكا مع ان مجموعه فى الثانويه العامه كان 99.4% و كان ممكن يدخل هندسه تعدين و لكنه فضل هندسه ميكانيكا من كتر حبه لحاجه اسمها عربيه.
المهم لفت الايام و دارت السنين و الشاب البرئ بتاعنا تم 18 سنه و راح طلع الرخصه بعدها بأسبوع و مشت معاه حلاوه وطلعت فى يومين. و المعلم ما صدق طلع الرخصه و اتعلم كل حاجه ممكن تتعمل بالعربيه من اول ا-ب سواقه لحد تقفيل الامبير و الريفيرس و الحاجات ديه.
و فى يوم من الايام الشاب البرئ بتاعنا كان سايق عربيه بباه اللى هى اوبترا 2006 و ماشى على 90 على البحر و مولع سيجاره و بيسمع فيروز و الحياه فل اوى جه واحد من على شماله راكب رينو كليو سوداء ملاكى القاهره و بصله بأشمئزاز كده من غير اى حاجه و كسر عليه و اداله غمازات يعنى من الاخر تعالى ورينى نفسك.
المهم الشاب البرئ مبقاش برئ و راح مسقط النقله المتينه و كانت مطارده على البحر اثبتت فيها الاوبترا جدارتها و الشاب البرئ جه ادام الكليو و ردله الغمازات و خلاص على كده سابه و مشى. مفيش دقيقتين و لقى الكليو فى ديله و بيقلبله نور و بعمل حاجات غريبه و كأنه بيقوله تانى قام جاى الشاب البرئ مسقط النقله تانى و جرى و فجأه عند مكتبه اسكندريه الشاب البرئ هدى عشان فيه ملف غبى بس الكليو ملحأش يلم نفسه و طااااااااااااااااااخ فى عمود اعلانات و اخده لحد سور البحر.
طبعا الشاب البرئ لان قلبه طيب ركن و ادى انتظار و نزل يلحق الشاب بتاع الرينو و الحمد لله طلع سليم بس العربيه كانت ايجار و الشاب التانى لبس اسود. المهم ان الشاب البرئ حس بالذنب اوى و قعد ميسوؤش عربيات شهر و نصف لحد ما ربنا هداه و رجع يسوق.
ولفت الايام و كان الشاب البرئ ماشى برضه على البحر بيشد مع واحد صاحبه و مولع سيجاره و بيسمع فيروز برضه و قام واحد جه من على شماله راكب فيرنا ملاكى القاهره برضه و عمل نفس اللى عمله الشاب بتاع الرينو بس زودها شويتين بحركه مينفعش تتقال هنا. طبعا الشاب بتاعنا البرئ مبقاش برئ و اخدته الجلاله و طار ورا الفيرنا و اداله درس فى الادب و الاخلاق بس للاسف ملحأش يخلص الدرس و عند ملف سيدى جابر الفيرنا عامت و طااااااااااااااخ فى النفق و اتدمرت و ركن الشاب البرئ بتاعنا و نزل جرى يشوف الشاب اللى فى الفيرنا و كان فى حاله لا يرثى لها.
طلبله الاسعاف و راح معاه المستشفى واستناه لحد ما طلع من الجبس و اتأسفله و اطمن عليه و روح معرفش ينام طبعا.لحد هنا خلصت الحكايه
المشكله دلوقتى ان الشاب ده اتعقد من فيروز و من السجاير و من اى عربيه ملاكى القاهره تعدى جنبه. و حلف ماهو شادد مع حد ملاكى القاهره تانى0
الشاب ده يبقى انا و انا عايز اعرف دلوقتى مين اللى غلطان؟
هل الشباب بتوع الكليو و الفيرنا اللى استفزونى من الاول؟
ولا الشاب البرئ(أنا) انى جريت وراهم و حاولت أخد حقى؟
يا ريت يا جماعه تجاوبونى عشان انا فعلا مش عارف و عندى عقدة ذنب من ساعه ما شفت الشاب اللى كان فى الفيرنا و هو متجبس.
و اخيرا عندى طلب من كل القاهراويه اللى بينزلو اسكندريه بعربياتهم لو مشيتوا على البحر و شوفتوا عربيه اوبترا سودا 5 نمر و اخرها 94 متجيش جنبها و تبص للشخص اللى سايق بأشمئزاز علشان السواقه زى البحر ملهاش كبير0
معلش انا عارف انى طولت عليكم
و أسف للشاب بتاع الكليو و اسف للشاب بتاع الفيرنا لو حد منهم قرأ الموضوع ده.
و شكرا
اخوكم بسام.
المفضلات