الموضوع: مين اللى غلطان؟؟؟

المشاركة الأصلية كتبت بواسطة tutankhamoun

طبعا كل الكلام اللي أنا قرأته فوق ما عدا المداخله ما عدا المداخلة رقم 3
كله غلطان ......... الشد ده بصراحة و آسف على الكلمة ..... حاجة مش كويسة
لأن اللي عايز يشد يروح مكان مخصوص و يتفرج على عربيته و يشد زي ما هو عايز
إنما طول ما أنت على طريق الناس بتستخدمه ........ يبقى حرام عليك لأن ببساطة ممكن واحد برئ لا له في الدور و لا في الطحين و يلبس حادثة بسبب أثنين بيشدوا مع بعض

و بعدين كليو أيه اللي هاتشد مع أوبترا ......... موتور 1200 و موتور 1600 بالعقل لازم الأوبترا تكسب
و موضوع 132 و معاه فيرنا .............. لا أصدق
علشان ببساطة الفيرنا دي موتورها فعلا جبار و 132 عمرها أكتر من 30 سنة و كمان فيها 3 ركاب و تسبق فيرنا !!!!
أنا أعرف ناس معاها فيرنا و بتسبق عربيات جامدة مش 132 موديل 1975 !!!!

بالنسبة للمداخلة رقم 3
مفيش في انجلترا عسكري مرور !!!!

بلاش شد و حركات من دي يا أخواني ......... عواقبها وخيمة جدا
و تخيل لو واحد بيشد مع واحد تاني و قتل نفس بريئة أو حتى هو مات شخصيا
و راح لربنا يوم القيامة
يقوله أيه ؟؟؟؟؟؟؟ كنت بشد مع عربية تانية علشان أثبت قوة عربيتي أو حرفنتي في السواقة ؟؟؟؟
اللهم أهدنا فيمن هديت و أغفر لنا و أرحمنا ......... و أهدي السائقين المصريين و أنا منهم

الحمد لله إن أنا ملاكي جيزة

و السلام عليكم و رحمة الله وبركاته

:k49: إنت كده جبت من الأخر

المشاركة الأصلية كتبت بواسطة Mohamed_SlvrLan99

منطق غريب أوى !.

ايه اللى غريب بالظبط؟؟

المشاركة الأصلية كتبت بواسطة Mohamed_SlvrLan99

اللى بتعملوا دة قانونيا و أخلاقيا غلط.

يا استاذ محمد اخلاقيا انا شايف انه مش غلط و دى وجهات نظر ليه؟؟
اقولك اولا انت حر ما لم تضر ثانيا انا مبجريش جوه البلد اكتر من 100 و دى سرعه ممكن تتحكم عليها فى العربيه كويس اوى فى اى موقف لا قدر الله و بعدين انا اما بجرى ببقى واخد بالى انى مضايقش حد ماشى جنبى او ورايا او قدامى و مبنقلش من حاره لحاره غير اما ابص فى المرايات يعنى من الاخر مبضايقش حد و ده اكيد مش بنسبه 100% فى حاجات بتبقى غصب عنك حتى لو ماشى على 60 (السرعه القانونيه)

ثانيا قانونا متقنعنيش ان حضرتك او اى حد هنا فى المنتدى او فى مصر كلها بيمشى على 60 لو فى فرصه يزود قصدى ان 60 دى ممله جدا و معتقدش ان فى حد بيمشى عليها و هو راضى يعنى مش فى زحمه ولا حاجه و بيمشى 60 برضه.

المشاركة الأصلية كتبت بواسطة Mohamed_SlvrLan99

لو بعد كل الكلام دة ولسة بتعمل كدة انت و أصحابك يبقى ياريت متنزلش تسوق فى الشارع تانى مش شهر و نص بس.

لا تعليق!!!!!

و يا جماعه ياريت محدش يزعل من كلامى انا بناقش وجه نظر مش اكتر.

المشاركة الأصلية كتبت بواسطة mohamed_rhem

باسم باشا

بسام مش باسم :)

المشاركة الأصلية كتبت بواسطة mohamed_rhem

واضح ان سنك اقل من 20 سنه علي ما اعتقد ما كلنا كنا ذيك ده انا انهارده وانا 30 سنة سعات بشد قصاد ناس مع ان عربيتي 1000 سي سي

انا عندى 21 سنه و بقالى 9 سنين بسوق و فعلا عملت كل اللى فى نفسى و زى ما حضرتك قلت انا سعات بشد انا مبقولش انى كل يوم بطلع اشد على البحر حتى مع صحابى ده بيبقى كل فين و فين مش كل يوم.

المشاركة الأصلية كتبت بواسطة mohamed_rhem

المهم ارجع واقول خليك انت الكبير وعادي يعني اما تفوت ورحم الله أمرء عرف قدر نفسه وانت عارف انك تمام وحتسد طيب ايه الداعي للشد

المشكله مش انا اللى ببدأ انا عمرى و الله ماجيت جنب حد حتى لو عجبانى سواقته و اقلتله شد معايا و بفوت كتير على فكره اما الداعى للشد فهو الاستفزاز من الغير مش اكتر.

المشاركة الأصلية كتبت بواسطة mohamed_rhem

وكلمه اخيرة الشاب البري للاسف طلع مزنب

:k30:

المشاركة الأصلية كتبت بواسطة mohamed_rhem

وفي النهاية حمدالله علي سلامتك

الله يسلمك

المشاركة الأصلية كتبت بواسطة mohamed_rhem

ولعله خير انك تغير طريقه سواقتك الفترة الجايه من عمرك

و الله يا استاذ محمد ان سواقتى مش وحشه بشهاده كل اللى ركبوا معايا و شافونى سايق و السلام ختام

المشاركة الأصلية كتبت بواسطة hesham_tawfiq

هو طبعا حضرتك احسن واحد يسوق فى اسكندريه ومصر كللها وحافظ الكورنيش طوبه طوبه ومتر متر وواضح انك مش هتخطئ ابدا وانت سايق

انا مقلتش كده و عمرى ما اقول كده علشان جل من لا يسهو و مفيش انسان معصوم و السواقه ملهاش كبير زى ما قلت فى الاول على فكره انا فعلا حافظ الكورنيش متر متر!!

المشاركة الأصلية كتبت بواسطة hesham_tawfiq

بس تضمن منين ان غيرك مش هيغلط !!!!

مضمنش و مش ممكن اضمن بس بحاول على قد مقدر اتجنب الاخطاء ز اى واحد بيسوق و اعتقد ان حضرتك اكيد بتعمل حساب اخطاء الغير و انت سايق زى اى واحد اتعلم سواقه صح.

المشاركة الأصلية كتبت بواسطة hesham_tawfiq

وبعدين بمناسبة المحامى الشاطر اللى هيجيبلك تعويض لو مش انت اللى غلطان افرض ان لو لاقدر الله ضحية الحادثه دى واحد قريبك او صاحبك او حد عزيز عليك. هتعمل ايه بالتعويض ؟!!!

و الله كل اللى اعرفهم ناس محترمين و بيمشوا لحد النفق حتى لو بنهم و بينه كيلو متر و بالتالى هم صح.

المشاركة الأصلية كتبت بواسطة hesham_tawfiq

عموما انا قفلت المناقشه دى من طرفى ومش هرد تانى

حتى لو قفلته من طرفك و حتى لو مش حترد تانى من حقك عليا انى ارد علي كلامك احترام ليك مش اكتر.

المشاركة الأصلية كتبت بواسطة hesham_tawfiq

انت قلت وجهة نظرك وانا كمان واربنا يستر طريقنا جميعا

اللهم امين و الاختلاف فى الرأى لا يفسد للود قضيه و السلام ختام.

المشاركة الأصلية كتبت بواسطة M!NA

يا أخ بسام... ايه معنى كلامك ده؟؟؟؟ ... الموضوع مستفز جدا في اسلوب عرضه... و خصوصا حكاية أنك ماقابلتش النوع المحترم من سواقين عربيات "ملاكي القاهرة" و ده ان دل على شيء فهو يدل على حداثتك في السواقة ليس الا...

لأني كواحد بقاله 10 سنين بسوق مثلا... عدى عليا كل انواع السواقين من كل المحافظات و مقدرش أعمم اني مشفتش من محافظة معينة حد محترم...!!

عموما يا باشا لو شفت شيروكي دهبي ملاكي القاهرة ماشية عالكورنيش ماتستفزش سواقها... عشان لما حد بيستفزه بيبقا "مش محترم"

يا استاذ مينا اسف بس حضرتك فهمتنى غلط

اولا انا مش قصدى استفز حد لا سمح الله انا طرحت موضوع للمناقشه مش اكتر.

ثانيا انا مقلتش ان اللى بيسوقوا ملاكى القاهره مش محترمين فيه كتير منهم محترمين انا قصدى مشددتش مع حد من القاهره و كان محترم وده برضه مش تعميم دى تجربه شخصيه.

ثالثا انا بقالى 9 سنين بسوق و قابلت المحترم و اللى مش محترم انا هنا بتكلم على الشد مش السواقه.

رابعا لو شفت عربيه شيروكى دهبى ماشيه على الكورنيش مش حشوف سواقها غالبا عشان استفزه علشان العربيه اعلى من عربيتى و الاسلوب فى النقطه دى معجبنيش يعنى ايه بيبقى مش محترم؟؟.

خامسا انا مبستفزش حد اصلا.

و يا جماعه اسف لكل القاهرويه اللى فهمونى غلط.