السلام عليكم, و كل عام و أنتم بخير.

- مشكلتى هى اكتشاف مشكلة فى ثبات سيارتى الكيا سبكترا بعد شرائها من 6 شهور, و بعد تغيير الكاوتش و الجنوط لم تحل المشكلة, حيث كانت السيارة ترمى يمين و شمال مع أى تنطيط على الطريق (عالى و واطى) و كأنى أقود سيارة لادا, مع ثبات السيارة الجيد فى حالة الجودة الشديدة للأسفلت (مع العلم قيادتى السريعة للسيارة التى تصل الى 200 كم و لكنى المشكلة موجودة حتى مع السرعات القليلة).

- و بعد الاستفسار كان القرار أن يتم تغيير المساعدين الخلفى كبداية, و بعد البحث لم أجد مساعدين جديدة أصلى, و ان وجد مساعدين السيفيا (kyp 2 يابانى) و أفادنى محل الجندى فى دمشق بأنى لن أجد المساعدين الخلفى فى الوقت الحالى (يا ريتنى سمعت كلامه) و من الممكن شراء مساعدين السيفيا و استخدامهم بعد توسيع البطاحات و لكنى رفضت هذا الاقتراح أنا و العفشجى الخاص بى. استكملت البحث حتى وصلت لمحل محمد نصر فى ميدان ابن الحكم - الزيتون, و ووجدت مساعدين ال (kyp يابانى) لسيارتى السبكترا (حيث أكد انها تصلح للسيفيا 2 و السبكترا), و الحق يقال باعها ارخص من دمشق ب 20 جنيه (530 ج للجوز الخلفى).
- المهم بعد ذهابى للعفشجى و اعتقاده انها فعلن مساعدين السبكترا, تم حل المساعدين الخلفى كاملة وجد انها ليست المساعدين الخاصة بى و لابد من توسيع البطاحات الخاصة بالسيارة (و مساعدين السبكترا هى نسخة طبق الأصل من مساعدين السيفيا مع الاختلاف الوحيد فى رأس المساعد التى تدخل فى البطاحة).
بالتالى كان من الصعب تركيب المساعدين القديمة من جديد, و اضطرنا نلجأ الى الخراط لتوسيع البطاحات, و بالفعل تم التوسيع (مع سماعى كلمة قلقتنى جدا و هو سؤال العفشجى للصبى ليه الخراط وسع البطاحة اوى كده), المهم طبعا انا كنت هموت من القلق لكن بعد تركيب المساعد داخل البطاحة و ربطه, ماحستش بأى لخلخة فى المساعد و هوا جوا البطاحة, و بدأنا بتركيب المساعد فى السيارة.

النتيجة الأولية كانت مرضية و بطلوعى على الطريق السريع قل التعويم بنسبة (70 الى 80 %) و سفرت العين رايح جار و بعديها بيومين سافرت برج العرب رايح جاى, مع العلم ان لسه فى بعض المشاكل فى العفشة الأمامية لم تحل بعد.

- المشكلة انى حاسس (و قد أكون موهوم) ان حاسس أكتر بحفر الطريق, و انى حاسس انى سامع صوت رجرجة الأبواب و ال زجاج أكثر من الأول, و قلقان أن يكون كلام صديق ليا أن المساعد لو مش مرتاح فى البطاحة هيكون "حديد بيخبط فى حديد" و حتحس بيه جوا العربية.

فمحتاج أعرف ايه مشكلة الى عملته ده فى السيارة و فعلن ممكن يضر (أصوات داخلية أو ثبات السيارة), و هل من الممكن مثلا تبديل البطاحات الحالية ببطاحات السيفيا2 , و لا فى المستقبل لازم أركب بطاحات السبكترا و مساعدين السبكترا, مع العلم انى قريبا هبتدى أشتغل على العفشة الأمامية (صيانة علبة الدريكسيون - و فحص المقصات و بيضها و ...) فلو فى اى اقتراحات أو ملحوظات يجب اخذها فى الاعتبار عند فحص و صيانة العفشة الأمامية .

و لكم جزيل الشكر مقدما, و ربنا يستر علينا جميعا من الطريق و اشتغالات التجار و الصنايعية .