عرض للطباعة
عايز اشتري مايكروويف و معلوماتي عن انواعه بسيطه
انا اعرف بس ان فيه انواع بتسيح الاكل المجمد او تسخن الاكل ... و انواع اخرى بتعمل ما سبق بالاضافه الى انها ايضا بتطهي الاكل و بتعمل كل حاجه
انا عايز اشتري نوع كويس و يكون طبعا من اللي بيعمل كل حاجه يعني بيسوي الاكل و يطهي
فاذا كان حد يعرف نوع كويس مجربه ياريت يعرفني .... يعني لو حد عنده معلومه عن المايكروويفات ياريت النصيحه و الاسعار اذا سمحتم
وشكراااا
انا عندى واحد كينوود وهو بصراحة شغال تمام والحمد لله
اهم حاجة بقى لو انت عايز تجيب موديل بيعمل كل حاجة هات هات النوع اللى فية ميكرويف و جريل وفرن يعنى 3 فى واحد انا جايبة من حوالى 4شهور 32 لتر كان ب 1250 جنية طبعا كل مالحجم يقل السعر بيقل والعكس صحيح وهو بيتقاس باللتر والحجم دة يعتبر وسط ومناسب وهو بيعمل كل حاجة يعنى يطهى الاكل ويسخن ويشوى لحوم او فراخ ويفك المجمدات وكل دة فى وقت اقل من البوتجاز
بصراحة الميكروويف دة اختراع رهيب انا من ساعة وبعمل فية اى حاجة وفى وقت قليل جدا
اهم حاجة لو هتجبب الكينوود علشان الضمان يشتغل لازم تتصل بالشركة تيجة تشغلهولك اول مرة ووتعلمك الاستخدام ازاى وهتلاقيهم كاتبين كدة ع الكرتونة وحاطين تليفونهم يعنى لو شغلتة من نفسك يبقى الضمان لاغى
زي ما أستاذ زياد قال لحضرتك يا تجيب كينوود يا إما وايت وال white whale
فيه سامسونج يا رجالة وده من افضل الأنواع
كينوود عن تجربة جيد
وايت وال جيد
على العموم منتجات وايت وال سعرها مش غالى
انا سمعت ان ليه تأثير سلبى على الصحة
سامسونج نوع ممتاز
له سنوات يعمل بكل كفاءة
وكينوود ماركة محترمة برده
الماركات المشهورة كينوود و سامسونج و سونى و ال جى
وفى كلام عن اثار جانبيه للميكروويف اعمل بحث فى جوجل على ( مخاطر الميكروويف)
مفيش ميكروويف وايت ويل دى افران كهربا وبس
الاخوة الافاضل
zeyad1810
احمد عبدالله
passat
tmz9111
dr_druggist
انا متشكر جدا لمساعدتكم وعلى فكرة انا نزلت النهارده و لفيت عليه لفه جامده كانت النتيجه كالتالي :
فيه ف السوق
ال جي موديلات
1- 39 لتر - صيني - ميكروويف فقط 900 جنيه من عبد العزيز 1000 من رضوان العجيل
2- 39 لتر - صيني - ميكروويف + شوايه لتحمير الوجه - 1050 من عبد العزيز 1190 من العجيل
3- 42 لتر كوري استنلس - ميكروويف + شوايه + convention و الاخيرة دي موضوع تقريبا مهم و بيعمل كل حاجه و سعره 2150 من عبد العزيز 2300 من العجيل
طبعا فيه موديلات تانيه ف ال جي بس اصغر حجما وانا عايز الاكبر
كمان فيه شارب :
موديل بشوايه تحمير الوجه و موديل بدون
و الشارب اكبر ما فيه 34 لتر و تايلاندي و سعر الموديل اللي بالشوايه 1350 حنيه من عبد العزيز
و فيه سامسونج موديلات كتير
و سامسونج كله صيني و فيه اللي بشوايه و بدون
و كمان فيه الكينوود وده فيه منه موديل بالconvention زي ال ال جي ال42 لتر الكوري بس 34 لتر بس وصيني و ب 1350 جنيه
و فيه بلاك اند ديكر موديلات كتير بس ما ارتحتلوش
و كمان فيه دايو كوري بس مايكروويف فقط و ال61 لتر منه ب 1200 جنيه
و فيه اوليمبك اليكتريك كوري و زي الدايو بالظبط بس 46 و 60 و 36 لتر
بس انا ميال اني اجيب ال جي 42 لتر الكوري بيقولوا بيعمل كل حاجه فهل حد جربه .... انا مش عايز اروح ادفع 1400 جنيه والاقي الجهازده بيعمل نص الحاجه بس و مش عايز ادفع 2150 و الاقي مفيش فايده مهمه فايه رأيكم ؟؟؟
الاستاذ michohat و asaadte
و انا عملت بحث على موضوع الاثار الجانبيه للمايكروويف
لاقيت انه بيستخدم في الولايات المتحده بكثرة و هي دوله متشدده بالنسبه لمسببات السرطان
و كمان فكره عمله انه بيولد موجات مثل موجات الراديو و تسمى موجات كهرومغناطيسيه و دي بتحث الجزيئات على فعل حركه سريعه فتتولد حراره و بها يسخن الطعام
اي بمعنى اوضح : ما يحدث عندما تحك كفيك ببعضهما بسرعه 4000 مره في الثانيه
و لذلك ففكره انه يعمل بالشعه اذا هي ضاره فكره خاطئه و لكن يكمن ضرره عند التعرض للاشعه الصادره منه مباشره فطبعا تاثيرها على الانسان سيكون ضار لانه من الممكن ان تميت خلايا الانسان لذا ينصح بالبعد عنه اثناء عمله ولكن بالنسبه للمأكولات المطهوة به فهي لا تكون حامله لاي اشعاع
و الله اعلم
انا عندى دايو 50 لتر كورى وجريل crs
بقاله سنه وشويه بالصراحه تحفه
انا كنت فى الأول معترض عليه وبعد كده اكتشفت انه من الضروريات
عيش من الفريزر يجليه زى ما يكون جاى من الفرن عاوز تسخن كوب لبن
عاوز تسخن أكل تسخن كوب النسكافيه طبخ و صوانى و كفنه مشويه بايته يخليها زى ما تكون طازة
المكروويف فعلا مش حتقدر تستغنى عنه
باستخدم شارب الياباني منذ سنه 86!!!
ايوه من 22 سنه ولسه شغال الي الآن
وهو ميكروويف وكونفكشن و زراير تاتش
ولم يمر يوم بدون ان نستخدمه
نصيحه انك تاخده بكل المميزات وتاتش
علشان هو احسن وسيله للخبز والكيك
ماسألتش عن الباناسونيك ؟ ليه اعلان في
الجرائد
هو غالي بس ده تقريبا التوب حاليا
سعره بالكويت 130 دينار = 2600
اقتباس:
المشاركة الأصلية كتبت بواسطة boty50
كان فيه باناسونيك ياباني موجود في المركاتو ب 3290 وطبعا فيه كل حاجه
و كمان كان فيه عند رضوان العجيل واحد ال جي كوري ب 3600 وده بيقولي بيشتغل بالطاقه الضوئيه مش زي المايكروويف العادي
طبعا الاتنين دول حلوين جدا بس اكيد غاليين جدا برودا
انا بفكر ف ال جي اللي ب 2150 لانه فيه كل مميزات البانا سونيك الياباني و ارخص وبردوا كوري
بس ممكن توضيح لخاصيه الكوفينشن دي لان واضح انها هي اللي مغليه تمنه و كمان واضح انها مهمه فياريت توضيح هي بتعمل ايه لان البياعين مش فاهمين حاجه
عزيزي
الافران دي لها ٤ وظائف اساسيه
(تختلف حسب الفرن وأمكانياته)
١- ميكروويف:
وده ممكن تفك بيه التجميد والتسخين والتسويه ايضا
حسب اختلاف الوقت وقوه الميكروويف اللي علي الأكل
يعني رغيف العيش بياخد من ١٥-٢٠ ثانيه علشان
يبقي ساخن علي ميكروويف بقوه ٨٠٠-١٠٠٠ وات
٢- الكونفكشن (الحمل الحراري):
وهي مرادف للحمل الحراري بمعني ان فيه عنصر
تسخين وراه مروحه بتنقل الحراره بطريقه متساويه
لجميع اجزاء الفرن فمثلا لما تخبز كيكه بتكون كلها
واخده نفس درجه الحراره من تحت وفوق وجميع
الجوانب فترتفع بنسبه واحده وتحمر بتساوي
وده عاده بيكون للمخبوزات من ١٣٠ الي ١٨٠ درجه
انا عاده لا اخبز الكيك او البسكوت او البسبوسه
الا فيه لتساوي درجه الحراره فيه
٣- الجريل أو الشوي
وده نفس السابق بس درجه الحراره تترفع الي
الأقصي وهي ٢٥٠ درجه لشوي اللحوم
٤- كومبيناشين (الوضع المختلط)
وده بيشغل الكونفكشن مع الميكروويف بنسبه
معينه يعني مقلا حراره ٢٠٠ درجه مع ميكروويف
٦٠٪ من الوقت وده بيسوي الأكل من جوه وبيحمره
من بره وده لشوي الفراخ الكامله
ودي بتطلع حكايه زي فراخ الشوايات من المحلات
بتكون لمده ٤٥ دقيقه ولحمها بيبقي مستوي جـدا
لو احتجت اي معلومات اخري تحت امرك
نصائح للمقارنه:
١- الحجم
٢- قوه الميكروويف لا تقل عن ٨٠٠ وات
٣- قوه عنصر التسخين عن ١٥٠٠ وات
٤- صينيه دواره (زجاج او معدن) يفضل المعدن
٥- المميزات الأخري (تاتش ، شوي ، مختلط
طبخ اوتوماتيكي عند وقت محدد ....
اقتباس:
المشاركة الأصلية كتبت بواسطة AboMaro
الـ CONVENTION تعني مؤتمر أو إتفاقية أو ...
أما الصفة المقصودة في الميكروويف وهي الـ COVECTION وتعني الحفز الحراري أو الحمل الحراري ...
ومعناها في الميكروويف بالذات إنه فيه خاصية الفرن يعني ممكن تشغله كفرن كهربائي عادي بدون أي موجات ميكروويف ... زي فرن البوتاجاز بس بالكهرباء
وبالتالي ممكن تضع فيه أي أواني معدنية عند إستخدام هذه الخاصية بعكس الميكروويف الذي لا يمكن وضع أي أواني معدنية أثناء إستخدامه
بالنسبة للأنواع أنا عندي واحد دايو كوري 36 لتر فيه الكونفيكشن وفيه شواية هالوجين (وليست العادية اللى هية عبارة عن قضيب حديد يسخن لدرجة الإحمرار .. والهالوجين موفرة أكتر في الكهرباء وأقوى في التحمير) استانليستيل ....
بالنسبة لى عيبه الوحيد إنه مش تتش (والعيب ده بيبان في التنضيف) وبحس إن صوته عالي سنة عن المعتاد
كان سعره من حوالي سنة 1500 جنيه من عبد العزيز
وكان في شارع شريف 1700 تقريبا
وكان في بي تك (وكيل دايو) 1900 تقريبا
شفته قريب في كارفور بس مش فاكر كان بكام
الضمان بتاعه عند أوليمبيك وهم أصحاب محلات بي تك وحاجات كتير تاني بس ضمانهم محترم فعلا وأنا مجربهم في حاجات كتير بس إتأكد إن الفاتورة بتاعته مختومة مع الضمان
البلاك أند ديكر ممتاز
اشكركم يا جماعه بشده و انا عملت بالنصيحه و جبت اللي فيه كل حاجه.....
ال جي 42 لتر كوري و ب 2150 من شارع عبد العزيز
و فيه الكونفنشن و كمان شوايه الجريل و كمان الطبخ الجمعي و الشوايه اللي بتلف و معاه صينيه معدن واخرى زجاج
ايه رأيكم فيه؟؟
انا طبعا شاكر ليكم جدا جدا وبجد انا استفدت منكم جدا خصوصا الاخ boty50 و الاخت NYSMA
وححاول افهم فيه على قد ما اقدر
و لو عوزت حاجه في طرق الاكل و التسويه اسمحلي يا استاذ boty50 اني ابعتلك على الخاص تفهمني اعمل ايه وشكراااا
تحت امرك حبيبي