إيه كانت تصوراتك الساذجه عن الكمبيوتر قيل ما تجيبه؟

السلام عليكم ورحمة الله وبركاته،،،

أكيد كلنا قبل ما نجيب كومبيوتر وقبل ما نعرف نشتغل عليه كان لينا بعض التصورات الساذجه عنه وعن الإيميل والإنترنت.

أنا مثلاً أول جهاز جبته كان في آخر 1997 وكان هو يعتبر أول تعامل حقيقي لي مع الكومبيوتر مع الأخذ في الإعتبار إني مش معتبر الكومبيوتر الصخر كومبيوتر حقيقي.

زي ما قلت ده كان أول جهاز أشتريه بس أنا كنت مهتم جداً بالكومبيوتر من الناحيه النظريه وكنت متابع أخباره كويس جداً، وكان أي خبر مثلاً في الجرنال عن نوع جديد من المعالجات كنت باقص الخبر ده وباحتفظ بيه عندي.

انا فاكر في سنة 1994 أو سنة 1995 مش متذكر بالظبط قرأت خبر في الأهرام عن شبكة معلومات بدأت في الإنتشار والتوسع وكان إسمها ساعتها (الطريق السريع للمعلومات) أو الإنترنت.

وكان مكتوب إن الدخول على الشبكه دية كان عن طريق إنك تركب كارت في الكومبيوتر بتاعك إسمه كارت مودم والكارت ده بيتوصل بخط تليفون وإلى آخره ....

أنا فاكر إني كان لي 2 أصحابي عندهم أجهزه ساعتها وحكيتلهم على الخبر ده راحوا ضحكوا علي، وقالولي "إنت عاوز توصل الكهرباء بالتليفون!!!! إنت عاوز تعمل قفله يا عم ولا إيه؟ :C_laugh[1]:"

انا كمان لما بدأت أسمع عن الإختراع اللي إسمه إيميل كنت كتير باتسائل "إيه اللي هايحصل لما حد يبعتلي إيميل وجهازي كان مقفول؟"

وكان في بعض الناس إن ممكن الفلوبي الديسك يجيله فيروس لو إتحط في حته مش نضيفه!!!!

وكنت باسمع أساطير لما بدأت أخش في مواضيع الشات والـ mIRC والـ ICQ عن الهاكر اللي ممكن يفجرلك الشاشه أو يبوظلك البروسيسور لو إنت ضايقته :dontudear:

أكيد كلنا لينا خبرات مشابهه وأحب إنس أسمعها منكم ....

شكراً

كانت اضحوكة من والدى عندما كنت اقول له ان الكومبيوتر يعمل بدون برامج هههههههههههه

كنت متخيل اول الانترنت ما دخل مصر انى لو فتحته وكتبت "فين الشبشب بتاعى" النت حيعرف

ههههههههههههههه

أول كمبيوتر جيبته كان سنة 1995 وكان بنتيوم 133 و 32 ميجا رام بحالهم.....وهارد ديسك 4 جيجا تقريباً....الراجل اللى عملهولى كان معرفة فكنت بقوله نخلى الهارد 6 جيجا بدل 4 جيجا.....قالى بس أنت أتجدعن وأملى ال 4 بس :E_braces[1]:

أول مودم جبته كان سرعته 28800 و كان ب 350 جم.......و أول دخول ليا على النت أقعدت حوالى 11 ساعة أونلاين متصلين....و النت مفصلش غير مرة واحدة أو أتنين.

بصراحة مكنش عندى تخيلات كتير عن الأنترنت لأنها كانت جديدة نوعاً ما....على الأقل فى مصر....و مكنتش أعرف غير واحد بس اللى دخل على الأنترنت من أجمالى 25 صديق.

ال ICQ ده كان أختراع وقتها......هو وال free tel لو حد فاكره.

فى سنة 97 أو 98 تقريباً مكنش فى غير مكانين فى مصر بيقدمو خدمة الأنترنت....مجلس الوزراء و الجامعة الأمريكية.....
وكان فى كام أكونت مصر كلها بتخش بيهم و كنت بقعد يوم الخميس بالليل من ساعة الى ساعتين بعمل ريدايل على أرقام مجلس الوزراء عشان بتبقى مشغولة على طول

هيييييييييييييييه أيام

اول كمبيوتر لى كان سنة 1992 وكان 33 ميجاهرتز mytac تايوانى واول معرفة لى بالانترنت كانت سنة 1995 فى السعودية كنا بنبعت ايميل فقط عن طريق شبكات bbs ترسل البريد عن طريق خط دولى ، ثم اول دخول لى على الانترنت فى مصر عام 98 عن طريق الدايل اب ، ثم dsl من حوالى 4 سنين ودام لنا عز الانترنت
كنت فاكر الكمبيوتر هايعلم ويصنفر وحاجة كده سحرية بس مع التعود اصبح حاجة عادية ، واخذت الفيروسات وتسطيب السيستمات ساعات طويلة واوقات هنية
والحاجة دلوقت بقت سهلة زى المية النازلة من الحنفية

انا فاكرة اول تعامل ليا مع الكمبيوتر كان فى المدرسة ، ايام ما كان بقية السستم بيتحط على الفلوبى الكبير اوى ده
و كان شغال بويندوز 3.11 ، ايااااااام بجد

و بعدين لما جبنا الكمبيوتر عندنا فى البيت ، كنت بخاف اسطب برامج ، مش عارفة ليه كل ما كنت اجيب اى برنامج ( كنت بجيب لغة العصر ) و يفتحلى السيت اب ، كنت اتنح و اكنسله
و كان ويندوز 98 ( الله يمسيه بالخير ، كان طيب و ابن حلال ) ، و كان بنتيوم 3 800 ميجا ، و هارد 30 جيجا ، و رام 128 ميجا ، و كان ساعتها حاجة فوق الفظيعة ، اللى هو يعنى صاروووووووخ ، بس الكمبيوتر ده هو اللى حببنى فى المجال كله و انا دلوقتى فى كمبيوتر ساينس :D

و فاكرة اول مرة ادخل على النت
و كان فى موقع مشهور اوى كان اسمه نسناس ، و كنت بدخل العب جيمز عبيطة على موقع ديزنى ، و فاكرة اول مرة الويندوز وقع ، و لبست انا انى اصلحه ، و دى كانت بداية قصة الحب بينى و بين الكمبيوترات :biggrin24:

اقتباس:

---

المشاركة الأصلية كتبت بواسطة shery103

و فاكرة اول مرة الويندوز وقع ، و لبست انا انى اصلحه ، و دى كانت بداية قصة الحب بينى و بين الكمبيوترات :biggrin24:

---

أهى دى حكاية معظمنا مع الكمبيوترات......الويندوز باظ :_Alshmokh08[1]: أجرى على المهندس عشان يصلحه....مرة فى التانية فى التالتة.....وبعدين قولت لنفسى هو أيه الهم ده....ما أحاول أجيب سى دى ويندوز وأعمله أنا....ما هوه كده كده بايظ....هيبوظ فيه أيه تانى يعنى......:36_1_37[1]: وبعد العديد من المحاولات بقى كل لما الويندوز تضايقنى...أروح منزل ويندوز تانى على طول:C_laugh[1]:

اقتباس:

---

المشاركة الأصلية كتبت بواسطة shery103

انا فاكرة اول تعامل ليا مع الكمبيوتر كان فى المدرسة ، ايام ما كان بقية السستم بيتحط على الفلوبى الكبير اوى ده
و كان شغال بويندوز 3.11 ، ايااااااام بجد

و بعدين لما جبنا الكمبيوتر عندنا فى البيت ، كنت بخاف اسطب برامج ، مش عارفة ليه كل ما كنت اجيب اى برنامج ( كنت بجيب لغة العصر ) و يفتحلى السيت اب ، كنت اتنح و اكنسله
و كان ويندوز 98 ( الله يمسيه بالخير ، كان طيب و ابن حلال ) ، و كان بنتيوم 3 800 ميجا ، و هارد 30 جيجا ، و رام 128 ميجا ، و كان ساعتها حاجة فوق الفظيعة ، اللى هو يعنى صاروووووووخ ، بس الكمبيوتر ده هو اللى حببنى فى المجال كله و انا دلوقتى فى كمبيوتر ساينس :D

و فاكرة اول مرة ادخل على النت
و كان فى موقع مشهور اوى كان اسمه نسناس ، و كنت بدخل العب جيمز عبيطة على موقع ديزنى ، و فاكرة اول مرة الويندوز وقع ، و لبست انا انى اصلحه ، و دى كانت بداية قصة الحب بينى و بين الكمبيوترات :biggrin24:

---

ياااااااااااااااااااااه ... أنا فاكر موقع نسناس ده ، هوا لازم أي حد يخش جديد على النت يعدي على الموقع ده وا إيه

أنا كمان كان أول تعامل ليا مع الكومبيوتر في المدرسة على أجهزة قديمة جدا ً شغالة DOS وديسكات 5.25 قد فردة الشبشب ، وكانت البرامج عبارة عن برنامج رسم اسمه Logo بيشتغل بأوامر ، ولغة برمجة الـ Basic

الكلام ده كان وأنا عندي 4 سنين ، فا الحمد لله الواحد مكنش لحق تتكون عنده انطباعات غريبة عن الكومبيوتر لأن شفناه على طول في المدرسة

وأول جهاز كومبيوتر جبته في البيت كان سنة 97 وكان عمري 8 سنوات ، كان بروسيسور 233 ورامات 32 وهارد 2.5 جيجا تم تحديثه بعد بفترة إلى 8.5 جيجا بحالهم

أنا فاكر أول مشكلة قابلتني في الجهاز في ويندوز 98 كانت تاني يوم ما جبته ، أول ما يخش على الويندوز الشاشة تطفي ؟؟ فكلمنا المهندس قال هجيلك بكرة، طبعا ً مقدرتش أصبر لحد بكرة وصلت لحل عجيب إني أسيب الشاشة مقفولة لحد ما الويندوز يفتح وبعدين أشغلها ، وفعلا ً نجح الموضوع ، وبكده تنبأت إني لازم أبقى مهندس كومبيوتر ، والحمد لله الواحد في هندسة حاسبات دلوقتي ، ولغاية دلوقتي معرفش سبب المشكلة الي كانت حاصلة دي أو علاجها :C_laugh[1]:

اول جهاز كمبيوتر اشتغلت عليه
كان سنة 87 :coool:
طبعا كان بس البيسك..وبرنامج الرسم..
والعاب

بس فعلا انا فاكر في بداية التسعينات
كان حتى الناس اللي بتكتب عن
الكمبيوتر بتبالغ فعلا..وتقولك
خلاص هيعملوا مش عارف جهاز
هيطبخلك طبختك..
وواحد تاني يختار لك الاكل
..وحاجات زي كده
ما حصلتش بالشكل اللي كان بيوصفوه..
وده كوم واللي كان بيتقال عن الانترنت
وقدراته الخارقة في حل كل مشاكلك..
ده كوم تاني..:U_thin1[1]:

فعلا كان فيه مبالغات جامدة

أول كمبيوتر كان 80286
ديسكات 5ز25 و بدون هارد

اول جهاز كان صخر حبيب الملايين فى التمانينات ...كانت 600 جنية تقريبا (مبلغ مهول يدفع فى "لعبة" فى ذلك الوقت) كنت فى اعدادى تقريبا ...وفاكر اول يوم قعدت حوالى 8 ساعات مش عارف اشغله انا والعيله الكريمة ...اتارينا مش ظابطين التليفزيون على قناة الفيديو
وابتدت بقى رحلة الجيمز اللى بتتحمل من الكاسيت والكتب اللى اكتب منها برامج البيسك الساذجة .....
فاكر اول ما سمعت عن الفيروسات .. وقعدت اتخيل ازاى حاجة مش بيولوجية يدخلها فيروس ... إزاى الفيروس ده هايكون اليكترونى ويتنقل فى الجو ... وهايدخل الجهاز ازاى ومنين اصلاً ...... طفولة

عندي كمبيوتر تقريبا من سنة 96
قبلها كنت معتقدة اني لو دخلت معادلة او مسألة هندسية او اي سؤال في اي مادة الكمبيوتر هيجاوبني على طول
كان نفسي في كمبيوتر علشان متحوجش للدروس الخصوصية
ولما جبت الكمبيوتر حسيت انه خذلني ههههههههههه ملقتش حاجة اعملها عليه في البداية غير برنامج الرسم وكنت مبدعه بجد
وبرنامج تاني مش فاكره اسمه كنت تقدر ترسم بيت به وتقسمه غرف ومطبخ وحمام وتنظم الموبيليا وما الى ذلك

دلوقت طبعا سهل اوي يحل لي مسألة او يجاوبني على اي سؤال اونكل جوجل مخلاش نفسنا في حاجة خالص :S_thum1[1]:

انا اول جهاز جبته حوالى فى سنة 98 وكان بقا اوعى وشك يابو احمد ايام ما كان النت ده حاجة كده ايش خيال ياناس وكانت الساعه ب7 جنيه من البيت وكنت جايب معاه ماوس عاملة زى فردت الشبشب

وكنت حاطط جمب الكمبيوتر كراسة وقلم واكتب مثلا (( علشان تفتح ملف الاغانى عبدالحليم حافظ اضغط كذا وكذا )) وياه لما الويندوس وقع خفت خالص وقلت بس ابويا هيكرشنى بره البيت لان الكمبيوتر باظ

وعلى سنة 2000 جبت ماوس ليزر كانت عاملة 250 كان صحابى بيتحيلوا عليا علشان يمسكوا الماوس دى , ودلوقتى الماوس الليزر تجاريها 7 جنيه انضف نوع

وحاليا الحمد لله عندى محلين كمبيوتر صيانه وبيع وانا بحب جدااا الكمبيوتر
بس على فكرة ودى حقيقة والله الاجهزة الجديدة مش حلوة زى الاجهزة بتاعت ايام زمان يعنى كلها ارقام وبس

أول جهاز جبته كان يوم 25/12/1997

وكانت مواصفاته كالآتي:

Pentium MMX 200 MHz
32 MB Ram
3.2 Hard Disk Western Digital
CD Rom 24 x creative
floppy drive
Opti 16 bit sound card
Trident 2 MB VGA card

كان عامل 3200 جنيه

وجبت برينتر HP 670c بـ 800 جنيه

أنا فاكر كل التفاصيل دية لإن الكومبيوتر ده غير مجرى حياتي تماماً الحمد لله، وأنا شغال في مجال الكومبيوتر بقالي سنين دلوقت.

من تصوراتي الساذجه اللي كنت متخيلها هي إني ما رضتش أجيب كارت فاكس وقولت أجيب فاكس مودم خارجي عشان كنت معتقد إن كده أحسن عشان لو المودم باظ أروح أوديه يتصلح لوحده من غير أما أفك الجهاز كله :C_laugh[1]:

وطبعاً بعد كده عرفت إن ده كلام مالوش أساس من الصحه :Ob_mak1[1]:

وما كنتش أصلاً أعرف إن في حاجه إسمها كارت شاشه، كنت فاكره مجرد مكان بيركب فيه كابل الشاشه.

أول دخول لي على الإنترنت كان في صيف سنة 1998

كنت عند واحد صديقي لسه جايب جهاز جديد وجالنا واحد صاحب صاحبنا عشان يظبطلنا النت :) وكان جايب معاه account لسه فاكره برضه لحد دلوقت

كان الـuser name هو isproj97 والـ Password كانت cocacola وكان الإشتراك تابع لشركة wayout.

وفاكر أول إيميل عملته وأول رقم Icq وفاكر وفاكر وفاكر ...

انا اتعاملت مع الكمبيوتر من سنة 2002 وكنت فى اعتقادى انى متراقب من اسرائيل وامن الدولة عشان فى يوم دخلت على موقع سياسى وقعد مرعوب جدا لحسن اتخطف وكان اشد يوم رعب بالنسبة لى يوم ما الويندوز سقط (كان ويندوز Me) وساعتها افتكرت ان الكمبيوتر كله اتحرق وباااظ ومواقف كتير جدا
اخوكم يوسف

كانت بداية تعاملى مع الكمبيوتر عام 1972 (أنا عجوز شوية) و ذلك من خلال دورة تدريبية فى مركز الحساب العلمى بجامعة عين شمس
و خرج معظمنا من الدورة مش فاهم حاجة حيث أن المعيد كان من كلية العلوم قسم رياضة و كان يشرح لنا بطريقة علمية صرفه
و فى نهاية الدورة نصحنا بأن نتجه إتجاه آخر فى دراستنا حيث اننا لسنا طلبة علوم أو هندسة و دراسة الكمبيوتر سوف تكون شاقة جدا علينا .

فى عام 1973 و بعد حرب أكتوبر كانت الهيئة العامة للتعبئة و الإحصاء بمدينة نصر تقوم بتنظيم دورات تدريبية فى البرمجة بلغة الكوبول cobol و هى إختصار ل:- comon business oriented language
فتقدمت لتلك الدورة و حصلت عليها فى مدة دراسية قدرها شهرا واحدا بمبلغ لا يتعدى العشرون جنيها و خرجت منها أفهم قليلا فى البرمجة
و كانت الدراسة على حاسبات عملاقة طراز ICL و هى إنتاج شركة إنجليزية صفت أعمالها الآن .
و كانت البيانات يتم إدخالها للحاسب عن طريق بطاقات كرتون مثقبة و كانت المخرجات عبارة عن ورق مطبوع عليه النتائج ، إذ أن الشاشات لم تكن معروفة فى ذلك الوقت و كانت مراكز الحاسب الآلى فى ذلك الوقت لا يزيد عددها عن عدد أصابع اليد الواحدة .
فى عام 1974 التحقت بعمل كمصصم برامج و محلل نظم مبتدئ و عملت على أجهزة حاسب آلى عملاقة طراز NCR و هى إنتاج شركة أمريكية إختصارا لكلمة National Cash register
و كانت تلك الشركة متخصصة فى صناعة آلات تسجيل قبض و صرف النقود فى المحلات ثم طورت أعمالها لتتخصص فى تصنيع الحاسبات العملاقة main frame
فى ذلك الوقت كانت سعة الذاكرة للماكينة العملاقة 32 كيلو بايت
(نعم كيلو بايت و ليس ميجا بايت) و كانت مهارة المبرمج تتمثل فى قدرته على تصميم البرنامج بحيث لا يستهلك الكثير من الموارد المتاحة للذاكرة الإليكترونية - أو تقسيم العمل ليتم على مراحل كل مرحلة يتم تنفيذها فى حدود الموارد المتاحة للهارد وير hardware .
و حتى ذلك الوقت لم تكن شاشات الكمبيوتر قد عرفت بعد و كان الحل الوحيد لمعرفة ما بداخل الحاسب هو الطباعة على ال printer و كان جهاز عملاق فى حجم سيارة صغيرة و يطبع على ورق متصل عرضه 132 حرف فى السطر الواحد و سرعته 2000 سطر فى الدقيقة .
و كانت البيانات تخزن على إسطوانات ممغنطه كبيرة توضع فى سواقة إسطوانات disc drive فى حجم الغسالة الزانوسى الآن كما كانت البيانات تحفظ على شرائط ممغنطه كبيرة تشبه شرائط أفلام السينما .

فى عام 1978 كان اول تعامل لى مع الحاسبات الصغيرة و التى تسمى مينى كمبيوتر و كانت البيانات تحفظ على شرائط كاسيت و سعة الذاكرة 24 كيلو بايت (نعم كيلو بايت و ليس ميجا بايت)
و كانت بعض البرامج يستغرق عملها أكثر من ستة ساعات متصلة خاصة برامج الفرز sort ( ترتيب البيانات) و كانت تتطلب تغيير الكاسيتات عدة مرات و لو حدث خطأ فى وضع كاسيت بدلا من آخر كان يحدث عطل للبرنامج و يتطلب الأمر إعادة العمل من البداية .
كما أن إنقطاع التيار الكهربائى كان يستلزم بداية العمل من جديد ، إذ أنه فى ذلك الوقت لم يكن أجهزة مانع إنقطاع التيار الكهربى قد توفرت فى بعد أو كانت موجودة و لكن تكلفتها كبيرة جدا ( أجهزة ال ups )
uninterreptible power supply -
فى عام 1981 كانت بداية تعاملى مع أول جهاز يعرض البيانات على شاشة مونوكروم ( غير ملونه ) و كانت له ذاكرة كبيرة بمقاييس ذلك الوقت 128 كيلو بايت و كانت البيانات تحفظ على إسطوانات ممغنطة مرنه حجمها 8 بوصات و طاقة الإسطوانة 2 ميجا و كان بجهاز الكمبيوتر عدد أربعة إسطوانات مرنه ( إجمالى 8 ميجا)
و كان ذلك وقتها يعتبر قمة التطور و كان يزورنى يوميا ما لا يقل عن أربعة أشخاص من أماكن عمل مختلفه لرؤية ذلك التطور المذهل فى ذلك الوقت .
فى عام 1982 فى رحلة إلى إنجلترا فى دورة دراسية سمعت عن الحاسب الشخصى سينكلير sinclair zx spectrum
و هو جهاز صغير فى حجم الأجندة يعمل عن طريق توصيله بالتلفزيون لعرض المعلومات و الألعاب و يتم تحميل الألعاب و البرامج عليه من خلال كاسيتات متصلة بجهاز تسجيل و فغرت فاهى و أنا أنظر إليه فى مركز التسوق و قررت شراؤه و كان ثمنه فى ذلك الوقت 200 جنيه إسترلينى ( 400 جنيه مصرى بمقاييس ذلك الزمان) .
فى عام 1986 ظهرت الحاسبات الشخصية من طراز المايكرو و التى كانت ذاكرتها 640 كيلو بايت و تعمل من خلال إسطوانات مرنه طاقتها الإستيعابية 360 كيلو بايت للإسطوانه الواحدة و تعرض النتائج على شاشة ملونة (cga ) ( color graphic adapter)
و كان ثمن الجهاز فى ذلك الوقت 3000 جنيه مصرى و كان إنتاج تايوا ن ، و يعمل من خلال نظام تشغيل الدوس
( disc operating system ) و بدء إستخدام معالج الكلمات و الجداول الإليكترونيه المتمثلة فى برامج ال word perfect , و برامج lotus 123 و التى تماثل ال excel .
فى عام 1991 كانت أول معرفتى بال bbs - buletin board service - و هى خدمة شبيهة بالمنتديات المعروفه حاليا و لكن دون إستخدام الجرافيك - الرسوم و الصور و إنما مجرد - text و كان الإتصال يتم من خلال موديم خارجى يتم توصيله مع جهاز الكمبيوتر سرعته 1200 بيت ثانية ( و ليس كيلو بايت) .
فى عام 1999 كان أول حصولى على حاسب شخصى بينتيوم 2 سرعة 333 و بداية تعاملى مع الإنترنت الذى يعتبر بحق ثورة فى عالم الإتصالات و نقل البيانات و الإنفتاح على العالم و كسر لقيود التعلم التى كانت موجودة قبل ذلك و كان إشتراك الإنترنت يتم من خلال مزودى خدمة مقابل إشتراكات شهرية تتراوح بين 120 جنيها و 160 جنيها باستخدام كارت الموديم و خط التليفون و كنت أنتظر بفارغ الصبر ظهور مجلة internet shopper حيث كانت توزع هدية مجانيه عبارة عن إشتراك إنترنت لمدة أربعة أيام مع كل عدد .
و كان إتصالنا كأصدقاء فى نهاية الأسبوع و الإتفاق على إستخدام الإنترنت بعدد معين من الساعات مقابل جدول معين نتفق عليه مستخدمين ذلك الإشتراك المجانى و كان منا من ينسى نفسه مع الإنترنت و يستغرق وقت صديق آخر و كان الأمر يتطلب النزول من المنزل و الذهاب إليه لكى يفصل خط التليفون و يسمح لغيره باستخدام حساب الإنترنت - حيث لم يكن الموبايل منتشر فى ذلك الوقت كوسيلة للإتصال بين الأفراد
و لكن برغم كل ذلك كانت الحياة أجمل من الآن بالرغم من صعوباتها فى تلك الأوقات .

بعض الصور للكمبيوتر فى بدايه تعاملى معه
http://www.postimage.org/aV1WJk_0.jpg

http://www.postimage.org/aV1WJnu9.jpg

http://www.postimage.org/Pq1Qx99A.jpg

اقتباس:

---

المشاركة الأصلية كتبت بواسطة homme49

كانت بداية تعاملى مع الكمبيوتر عام 1972 (أنا عجوز شوية) و ذلك من خلال دورة تدريبية فى مركز الحساب العلمى بجامعة عين شمس
و خرج معظمنا من الدورة مش فاهم حاجة حيث أن المعيد كان من كلية العلوم قسم رياضة و كان يشرح لنا بطريقة علمية صرفه
و فى نهاية الدورة نصحنا بأن نتجه إتجاه آخر فى دراستنا حيث اننا لسنا طلبة علوم أو هندسة و دراسة الكمبيوتر سوف تكون شاقة جدا علينا .

فى عام 1973 و بعد حرب أكتوبر كانت الهيئة العامة للتعبئة و الإحصاء بمدينة نصر تقوم بتنظيم دورات تدريبية فى البرمجة بلغة الكوبول cobol و هى إختصار ل:- comon business oriented language
فتقدمت لتلك الدورة و حصلت عليها فى مدة دراسية قدرها شهرا واحدا بمبلغ لا يتعدى العشرون جنيها و خرجت منها أفهم قليلا فى البرمجة
و كانت الدراسة على حاسبات عملاقة طراز ICL و هى إنتاج شركة إنجليزية صفت أعمالها الآن .
و كانت البيانات يتم إدخالها للحاسب عن طريق بطاقات كرتون مثقبة و كانت المخرجات عبارة عن ورق مطبوع عليه النتائج ، إذ أن الشاشات لم تكن معروفة فى ذلك الوقت و كانت مراكز الحاسب الآلى فى ذلك الوقت لا يزيد عددها عن عدد أصابع اليد الواحدة .
فى عام 1974 التحقت بعمل كمصصم برامج و محلل نظم مبتدئ و عملت على أجهزة حاسب آلى عملاقة طراز NCR و هى إنتاج شركة أمريكية إختصارا لكلمة National Cash register
و كانت تلك الشركة متخصصة فى صناعة آلات تسجيل قبض و صرف النقود فى المحلات ثم طورت أعمالها لتتخصص فى تصنيع الحاسبات العملاقة main frame
فى ذلك الوقت كانت سعة الذاكرة للماكينة العملاقة 32 كيلو بايت
(نعم كيلو بايت و ليس ميجا بايت) و كانت مهارة المبرمج تتمثل فى قدرته على تصميم البرنامج بحيث لا يستهلك الكثير من الموارد المتاحة للذاكرة الإليكترونية - أو تقسيم العمل ليتم على مراحل كل مرحلة يتم تنفيذها فى حدود الموارد المتاحة للهارد وير hardware .
و حتى ذلك الوقت لم تكن شاشات الكمبيوتر قد عرفت بعد و كان الحل الوحيد لمعرفة ما بداخل الحاسب هو الطباعة على ال printer و كان جهاز عملاق فى حجم سيارة صغيرة و يطبع على ورق متصل عرضه 132 حرف فى السطر الواحد و سرعته 2000 سطر فى الدقيقة .
و كانت البيانات تخزن على إسطوانات ممغنطه كبيرة توضع فى سواقة إسطوانات disc drive فى حجم الغسالة الزانوسى الآن كما كانت البيانات تحفظ على شرائط ممغنطه كبيرة تشبه شرائط أفلام السينما .

فى عام 1978 كان اول تعامل لى مع الحاسبات الصغيرة و التى تسمى مينى كمبيوتر و كانت البيانات تحفظ على شرائط كاسيت و سعة الذاكرة 24 كيلو بايت (نعم كيلو بايت و ليس ميجا بايت)
و كانت بعض البرامج يستغرق عملها أكثر من ستة ساعات متصلة خاصة برامج الفرز sort ( ترتيب البيانات) و كانت تتطلب تغيير الكاسيتات عدة مرات و لو حدث خطأ فى وضع كاسيت بدلا من آخر كان يحدث عطل للبرنامج و يتطلب الأمر إعادة العمل من البداية .
كما أن إنقطاع التيار الكهربائى كان يستلزم بداية العمل من جديد ، إذ أنه فى ذلك الوقت لم يكن أجهزة مانع إنقطاع التيار الكهربى قد توفرت فى بعد أو كانت موجودة و لكن تكلفتها كبيرة جدا ( أجهزة ال ups )
uninterreptible power supply -
فى عام 1981 كانت بداية تعاملى مع أول جهاز يعرض البيانات على شاشة مونوكروم ( غير ملونه ) و كانت له ذاكرة كبيرة بمقاييس ذلك الوقت 128 كيلو بايت و كانت البيانات تحفظ على إسطوانات ممغنطة مرنه حجمها 8 بوصات و طاقة الإسطوانة 2 ميجا و كان بجهاز الكمبيوتر عدد أربعة إسطوانات مرنه ( إجمالى 8 ميجا)
و كان ذلك وقتها يعتبر قمة التطور و كان يزورنى يوميا ما لا يقل عن أربعة أشخاص من أماكن عمل مختلفه لرؤية ذلك التطور المذهل فى ذلك الوقت .
فى عام 1982 فى رحلة إلى إنجلترا فى دورة دراسية سمعت عن الحاسب الشخصى سينكلير sinclair zx spectrum
و هو جهاز صغير فى حجم الأجندة يعمل عن طريق توصيله بالتلفزيون لعرض المعلومات و الألعاب و يتم تحميل الألعاب و البرامج عليه من خلال كاسيتات متصلة بجهاز تسجيل و فغرت فاهى و أنا أنظر إليه فى مركز التسوق و قررت شراؤه و كان ثمنه فى ذلك الوقت 200 جنيه إسترلينى ( 400 جنيه مصرى بمقاييس ذلك الزمان) .
فى عام 1986 ظهرت الحاسبات الشخصية من طراز المايكرو و التى كانت ذاكرتها 640 كيلو بايت و تعمل من خلال إسطوانات مرنه طاقتها الإستيعابية 360 كيلو بايت للإسطوانه الواحدة و تعرض النتائج على شاشة ملونة (cga ) ( color graphic adapter)
و كان ثمن الجهاز فى ذلك الوقت 3000 جنيه مصرى و كان إنتاج تايوا ن ، و يعمل من خلال نظام تشغيل الدوس
( disc operating system ) و بدء إستخدام معالج الكلمات و الجداول الإليكترونيه المتمثلة فى برامج ال word perfect , و برامج lotus 123 و التى تماثل ال excel .
فى عام 1991 كانت أول معرفتى بال bbs - buletin board service - و هى خدمة شبيهة بالمنتديات المعروفه حاليا و لكن دون إستخدام الجرافيك - الرسوم و الصور و إنما مجرد - text و كان الإتصال يتم من خلال موديم خارجى يتم توصيله مع جهاز الكمبيوتر سرعته 1200 بيت ثانية ( و ليس كيلو بايت) .
فى عام 1999 كان أول حصولى على حاسب شخصى بينتيوم 2 سرعة 333 و بداية تعاملى مع الإنترنت الذى يعتبر بحق ثورة فى عالم الإتصالات و نقل البيانات و الإنفتاح على العالم و كسر لقيود التعلم التى كانت موجودة قبل ذلك و كان إشتراك الإنترنت يتم من خلال مزودى خدمة مقابل إشتراكات شهرية تتراوح بين 120 جنيها و 160 جنيها باستخدام كارت الموديم و خط التليفون و كنت أنتظر بفارغ الصبر ظهور مجلة internet shopper حيث كانت توزع هدية مجانيه عبارة عن إشتراك إنترنت لمدة أربعة أيام مع كل عدد .
و كان إتصالنا كأصدقاء فى نهاية الأسبوع و الإتفاق على إستخدام الإنترنت بعدد معين من الساعات مقابل جدول معين نتفق عليه مستخدمين ذلك الإشتراك المجانى و كان منا من ينسى نفسه مع الإنترنت و يستغرق وقت صديق آخر و كان الأمر يتطلب النزول من المنزل و الذهاب إليه لكى يفصل خط التليفون و يسمح لغيره باستخدام حساب الإنترنت - حيث لم يكن الموبايل منتشر فى ذلك الوقت كوسيلة للإتصال بين الأفراد
و لكن برغم كل ذلك كانت الحياة أجمل من الآن بالرغم من صعوباتها فى تلك الأوقات .

---

صراحة أنا كنت باقرأ عن تاريخ الكومبيوتر في المجلات والكتب لكن عمري ما حد حكالي بنفسه الحاجات دية.

بجد أنا قاعد باقرأ كلامك وأنا عندي حالة ذهول وإزبهلال.

فعلاً الكومبيوتر زمان كان حاجه تانيه خالص وكان غالي أوي وصعب أوي، بس ما كانش أي حد يعرف يشتغل عليه. ومش أي حد يحب يشتغل عليه.


لي سؤال يا أستاذ homme49

هل مثلاً إنت أو حد من زمايلك تنبأ بأي حاجه من الموجوده دلوقت زي الإنترنت أو المالتيميديا؟

شكراً على إثرائك للموضوع

أول كمبيوتر :
هوه مكانش كمبيوتر أوي يعني , سنه 85 , حد فاكر الجهاز اللي كان بيستخدموا E.T في الفيلم عشان يتصل بال Home
جهاز حته واحده بشاشه صغيره بتكتب كلام بس لتعليم اللغه الإنجليزيه للأطفال.:36_1_37[1]:

أول مره انترنت كان دمها تقيل أوي
سنه 97 دخلت وأول حاجه حاولت أعملها هي register an account on hotmail
كتبت اسمي @ هوتميل.كوم
لقيته بيقولي الأكونت ده مسجل إختار واحد تاني
اتنرفزت اوي مين الرزيل اللي اخد اسمي علي الهوتميل قبل كده:K_crying[1]:
واضطريت اختار الأسم اللي انا عايش بيه من ساعتها لغايه دلوقت tamohsen

اقتباس:

---

المشاركة الأصلية كتبت بواسطة Ahmed A.Maksoud

أول كمبيوتر جيبته كان سنة 1995 وكان بنتيوم 133 و 32 ميجا رام بحالهم.....وهارد ديسك 4 جيجا تقريباً....الراجل اللى عملهولى كان معرفة فكنت بقوله نخلى الهارد 6 جيجا بدل 4 جيجا.....قالى بس أنت أتجدعن وأملى ال 4 بس :E_braces[1]:

أول مودم جبته كان سرعته 28800 و كان ب 350 جم.......و أول دخول ليا على النت أقعدت حوالى 11 ساعة أونلاين متصلين....و النت مفصلش غير مرة واحدة أو أتنين.
.

---

ممكن تقصد سنه 1996 على كده
انا بدأت فى اوائل سنة 1998 وكان عندى قبلها جهاز صخر من سنة 1990 تقريبا او يمكن قبل كده وكنت من وانا فى الحضانه فى مدرسه فيها كمبيوتر صخر وكنت مهتم جدا بالكمبيوتر من صغرى سواء العاب وبرامج
وفى اعدادى كان فى المدرسه كمبيوترات وعليها Basic اللى كنت باشتغل عليه قبل كده على الصخر نفسه
مع احترامى ... الصخر ممكن ميكونش PC زى اليومين دول بس مكانش ضايع اوى وكانت فكره انك تشغل البرامج من شريط كاسيت وطبعا علشان تجيب الكاسيت بتاع صخر مفيش غير مكان واحد وكان مكتبهم فى جاردن سيتى تقريبا مش متذكر اوى بس هو كان قريب من الكورنيش
رحت وملقتش الكاسيت وكان تمنه تقريبا 125 جنيه وكان مبلغ بقى :) المهم قولت اجرب على كاسيت عندى وجبت الوصله بتاعه الصوت او تقريبا كانت مع الصخر
المهم كانت ملحمه ازاى اوصل 3 كابلات صوت بمخرج ومدخل فقط فى الكاسيت وازاى اساسا الشريط بيشتغل وامتى ؟؟ والكتاب كان كاتب الامر هو CLOAD ومشتغلش بس الحمد لله الواحد ربنا هداه انه يشغل ويعرف انه ممكنش يشغل شرايط من كاسيت بوصلتين فقط MIC, Headphone وانه ممكن يغير الCLOAD الى BLOAD والشريط يشتغل وطبعا كان انجاز اكبر من انجاز تنزيل ويندوز لاول مره .... ايااااااااام
انا كان عندى كتب فى البيسك واللوجو وهى لغات برمجه وكنت باطبق البرامج اللى فيها واقعد اغير فى الارقام
وللى مش عارف اللوجو لغة برمجه للرسومات اساسا وتعتمد على تحريك سلحفاة باوامر معينه لعمل بعض الرسومات ... طبعا الرسومات كانت اساسيات بس ممكن تخش فى اشكال معقده وتستفيد من اللغه والكلام ده كان من زمان فعلا
بالنسبه للكمبيوتر بشكله الحديث اول كمبيوتر كان فى اوائل 98 وكان Pentium MMX 233 MHZ رامات 32 ميجا وهارد 6 جيجا وافتكر ان الرامات ال 64 كان فرق كبييييير بينها وبين ال 32 وطبعا ويندوز 95 عمل ثوره فى مجال الرسوميات وقتها وخصوصا ان ويندوز 3.11 كانت رسوماته 16 لون فقط على حد علمى
وكانت فكره انك تشتغل حاجه على الكمبيوتر من غير command line فكره عبقريه وانجاز غير مسبوق
واول فاكس مودم كان Rockwell وكان على فتحة ISA سرعته 28 كيلو تقريبا بس كان خرافى تعريفه اسهل مايمكن تختار انوع الكارت فقط من غير سى دى ولا تعريف ... من الوندوز علطول ويشتغل ولا يقطع ولا اى حاجه وطبعا على ارقام مجلس الوزراء او الجامعه الامريكيه وياعالم تشتغل او لأ او كنت تشترى كارت ب 20 جنيه يشغلك النت 10 ساعات وكان انجاز وقتها

بمناسبه الويندوز اللى بيقع
مين اكتر واحد اتضرب بتشيرنوبل او يسمع عنه اساساً؟؟
انا اتضربت منه مره بويندوز وواحد عرض على انه ينزله ب 250 جنيه ... يابلاش .. ده غير انه كان عاملى اسطوانات فيفا 98 ب 50 جنيه وفيفا 99 ب 55 جنيه (واكتشفت انها هى السبب فى الفيروس) واوفيس 97 ب 50 جنيه ومش فاكر اسطوانه ايه كمان ب 50 جنيه وفى الاخر يقولى 250 جنيه علشان الجهاز يشتغل
المهم تشيرنوبل ده انا اتضربت منه مش اقل من 3 - 4 مرات وكل مره كانت بمصيبه