سيفيا 99 ولا 2001

**outosend** · 03-01-2009 10:20 AM

ياجماعه قدامى سيفيا 99 كامله اوتوماتيك بحاله كويسه صاحبها عايز 45 الف وواحده تانيه 2001 حالتها كويسه برده صاحبها عايز 47 الف فى ناس بتقول ال99 افضل علشان ده اخر الكورى وانا بتفكيرى المتواضع بقول الموديل الاقرب اللى هو 2001 افضل
ايه رأيكو هل فعلا 99 افضل من 2001 وهل 2001 فيها مشاكل وايه مميزاتها عن ال99 انا بحس انها اكبر شويه

**EZABY** · 03-01-2009 01:05 PM

بص يابيه
فعلا الـ 99 الناس بتفضلها لأنها اخر التقفيل الكوري
ومن بعد كده التقفيل مصري

بص انا رأيي من رايك ان السنين بتفرق يعني الـ 2001 احسن بس بشرط الحاله وكمان العربيه ماشيه قد ايه

انا معايا موديل 2000 والحمد لله مريحاني ومش بشتكي منها في حاجه

يعني انا رأيي انك تشتري على أساس الحاله والعداد وسيبك من الموديل لأن كله محصل بعضه الفروقات مش رهيبه يعني

كامله اوتوماتيك بحاله كويسه صاحبها عايز 45 الف

حالتها كويسه برده صاحبها عايز 47 الف

الأسعار دي عاليه شويتين

انا بحس انها اكبر شويه

مش اكبر ولا حاجه هي هي بالظبط

**outosend** · 03-01-2009 01:11 PM

طيب ال2001 لو حالتها معقوله تعمل كام؟وهل ممكن اكشف عليها فى التوكيل؟
شكرا لردك واهتمامك

**EZABY** · 03-01-2009 10:46 PM

لو العربيه 2001 وحالتها كويسه ومش ماشيه كتير اعتقد ان سعرها دلوقتي 42 او 43
بس خد بالك من حاجه السعر ده مجرد راي
لأن السوق واقف فمحدش بيبيع ومحدش بيشتري فبالتالي مفيش عمليات بيع بتتم اليومين دول عشان الواحد يقولك اسعار مؤكده
يعني العمليه دلوقتي موضوع فصال وكلام واللي يكسب التاني مين
بس السعر اللي انا قلته ده اعتقد انه اقرب للواقع

بصراحه انا معرفش حكاية التوكيل
بس انت لو عاوز تكشف عن الحاله يبقى في اي بنزينه من اللي بترفع العربيات وبتكشف عليها
ولو عاوز التوكيل عشان توصل العربيه بالكمبيوتر ويكشفلك على الكنترول والكهربا والحاجات دي برضو ممكن تعملها بره التوكيل عند اي ورشة خدمه للكوري بيكون عندهم الكمبيوتر ده

وياباشا لاشكرعلى واجب وانا تحت امرك في اي حاجه

**outosend** · 04-01-2009 11:20 AM

الله يكرمك ربنا ييسر الاحوال لو وصلت لحاجه هابلغك

**khalid_adel** · 04-01-2009 11:32 AM

انا كان معايا سيفيا 99 كوري وكانت ماشاء الله تمام اوي
لما جيت اشتريها كلو قالي خليك في الكوري احسن من المصري (2000 فيما فوق ) وفعلا العربيه كانت تمام بس كنت بسمع ان ال 2000 بيحصل فيها شويه مشاكل في الضفيره وبالتالي سخونيه للعربيه وكده اما الكوري مفيش الكلام ده
وطبعا الاهم الحاله بتاعت العربيه هي اللي تحكم
وربنا يوفقك لما فيه الخير

**max_ziro** · 06-01-2009 08:24 PM

لا مفيش مشاكل فى اا 2000 خالص و الحمد لله انا معايا ال2000 بس كورى مش مصرى و الحمد لله مفيهاش حاجة ولا ضفيرة ولا بتاع و لو هتشترى اشترى مانيول الاوتو بيبوظ بسرعة عشان كبستنات الفتيس ضيقة زى النوبيرا للاسف ف لو مش هتقرص علية هيفضل زى الفل انما لو قرصت عليه يبقى مش هيستحمل و دة موجود ب 3000 جنية و موجود ف حتت كتير ف متقلقش من توافر قطع الغيار و فى كشف شامل فى التوكيل و على ما اعتقد ف حدود ال400 جنية انما كشف المتور و الفتيس بس 150 على ما اتزكر و ربنا يوفقك ..
وواحد صاحبى معاة ال2001 فيها اير باج و اية بى اس و فرامل قرصية ورا وادام و لو جية نصيبك ف 2000 كورى زى بتاعتى هتلاقى فيها اية بى اس فقط مفيهاش اير باج و على ما اعتقد التئفيل المصرى مفيهوش دعامات فولازية و الله اعلم ..