ياترى هاتعمل أيه يف الموقف ده (الجزءالتاني)

**PAYOO** · 02-05-2007 02:23 PM

طبعا كلنا فاكرين الحاله الأولى ومين طلع أحسن واحد في تصرفه لما يواجه الموقف الأولاني .... طبعا الدكتور "أحمد" كان هوه أحسن رأي

أضغط هنا لقراءة الجزء الأول

ودلوقتي نتخيل الحاله التانيه:-
أنت ماشي في أمان الله وبرضه مشغل الكاسيت وحاطط شريط عليه درس ديني (أسلامي أو مسيحي) والدرس بيتكلم عن غض البصر وزنا الأعيـُن
ومره واحده طلعتلك جنيه من البحر يوووووووه قصدي بنت جميله لا لا... مش جميله فاتنه عينيها زرقه وشعرها أصفر وبشرتها بيضاء وناعمه نعومة الأطفال وصوتها كما الكروان و..... كمل أنت بقيت الأوصاف

أنت طبعا أكتشفت كل المواصفات دي بعد ما البنت الملائكيه دي خبطتك وهيه خارجه من تقاطع وكانت هيه إللي غلطانه لأن الأولويه كانت ليك بحكم قواعد المرور وأنت بعد ما نزلت أكتشفت مواصفاتها دي كلها وأكتر شويه (بس الواحد مش عاوز يتبحبح في الكلام عشان الرقابه إللي في الموقع هنا)

المهم
أنت نزلت لقيت الباب الخلفي اليمين بتاعك مش نافع خالص وهيه يادوب الكبوت والأكصدام بتعها ماحصلهمش حاجه لانها كانت راكبه عربيه من النوع إللي بيركب له حديد حمايه من الأمام والخلف والأجناب
وأول ما جيت تعبر عن غضبك وأستيائك من الموقف
قربت هيه منك شويه
وأول ما قربت هيه منك أنت شميت رائحة برفانها حسيت وكأنه بنج
وأول ما حركت شفايفها إللي لون الكريز وقالتلك sorry I do not mean that يعني أسفه أنا ماكانش قصدي
عملت أنت بقى ........
كمل أنت وقولنا عملت أيه؟
بس خاللي بالك لتكون المدام بتاعتك من أعضاء أو من زائري المنتدى لحسن نقرأ نعيك بكره في الأهرام (عندكم أكياس كفايه؟)[/size][/color]

تم التعديل لأاضافة رابط الجزء الأول

**Mohsens** · 02-05-2007 02:28 PM

بامشي علي طول زي الشاطر و كفي الله المؤمنين شر القتال و مش حاتكلم أكتر من كده عشان مراتي بتخش عالمنتدي :)

**شريف** · 02-05-2007 02:47 PM

المواقف اللى بتبقى واحدة غلطانه انا مبتكلمش خالص غير بقول جت سليمه بس معلش حضرتك اللى غلطانه برده و بمشى (لو حلوة كده انا ممكن اقف شويه لو انا لوحدى بحجه اعاين الخسائر فى العربيتيين).
مرة واحده بنت معاها لانوس زيرو مكملتش اسبوعين عصرتلى ضهر الشاهين على الاستراد (غلطتها مفرملتش الا فى اخر لحظه بعد محولت تهرب يمين الاول)و معملتش معاها حاجه

**sh_masry** · 02-05-2007 02:51 PM

هاخد رقم التليفون علشان اقول لأهلها بنتهم بتعمل ايه فى الناس و هى ماشيه :lol: :lol:

و هبقى اقولك انا ممكن اعمل ايه بس بينى و بينك

و يا بايو بلاش المواضيع دى علشان كده هاتطير رقاب كتير يا اما الكدب هايشتغل و بالذات ان معظم الأعضاء هنا قاعدين في البيت بالعافيه (بأمر جمهورى من الحكومه)و الموقع بيخليهم يفيدوا و يستفادوا .............. وائل كاماتشو .. اخبارك ايه و رد يا سيدى على بايو هههههههههه

a7'ookom
Sherif

**memo_hefnawy** · 02-05-2007 03:28 PM

هدى أعصابك يا عم هانى

أولا مش هاتفرق معايا واحد ولا واحده لأنى فى الأصل مش بنزل أتخانق لأن الخناق أو الضرب مش هايجيب إللى إتكسر !!

إلا طبعا فى حالة قلة الأدب أو التعمد ده لازم يكون فيه رد بالإيد و بقوة كمان

فا كونها واحده حلوة أو قرده (آه أنا مش هاقولك مش هايتهزلى شعره و الكلام ده ) لكن فى نفس الوقت وقت الخبطه الواحد بيكون دمه محروق و مش جمالها هو إللى هايهدينى

بس أنا بطبعى مش هاقل أدبى بس عادة هاديها درس سواقه و إهمال و تسيب لحد ما تعيط عشان الأشكال دى هى إللى خاربه الطرق و مبهدلين عربياتنا :)

**Mo3taz Selim** · 02-05-2007 04:11 PM

أسمح لى ياهانى .... مش ممكن البنت لما تنزل من عربيتها و تقول معلهش ما كنتش أقصد ... و لما تبص فى عينين الشخص اللى خبطته تقول له sorry أنا عربيتى و مفتاحها تحت أمرك ... و لا إيه يا شريف

02-05-2007 04:12 PM

طبعا بنت حلوة او قبيحة مش ح تفرق --لكن طبعا اول شىء لو انا شخصيا سليم ما فيش خبطات فى جسمى ولا حاجة --ح انزل من السيارة واطمئن عليها انه ايضا سليمة وليست فى حاجة الى اى اسعافات او مش محتاجة انى اتصلها بالاسعاف --ومن بعد نتناقش فى كيفية حدوث ما حدث ومن هو صاحب الحق والاولوية فى المرور --لو اقتنعت واعترفت بخطائها-يبقى مافيش مشاكل ونتفق على الشكل المناسب للتعويض --اى انها تتحمل تكلفة التصليح ---اما اذا اعترضت--فيكون هناك الاتصال بالشرطة --او اخذها الى قسم الشرطة --وبعد ان تحل المشكلة --ونتفق على كل شىء --وبالنسبة للجزء الخاص بجمالها الطاغى كما وصفة الاستاذ بايو واللهب بة حماسنا --اعتقد اننى سوف اعرض عليها ان اساعدها فى معرفة الاكثر والاهم فى عالم القيادة --طبعا بعد ما اخذ حقى --ولا اعتقد انها ترفض لا بل اشك انها سوف تبادر بهذة المحاولة- وشكرا---(( بايو هو الموقف الاولانى كان اية --اللى رد فية الكتور احمد--او الجزء الاول --))

**Abdallah** · 02-05-2007 04:14 PM

هطلب الشركة تيجى تعاين ونشوف ميت الغلطان و مش عشان هيا حلوة وشعرها اصفر يعنى هتهز خلاص واعمل فيها حنين, لاء طبعا هاخد حقى منها تالت ومتلت بغض النظر عن شكلها وعموما يا عم بايو انا كمان شعرى اصفر وعنيا ملونة ومحدش احسن من حد :D

**Karim_Monir** · 02-05-2007 04:21 PM

انا مش هاقول هاعمل ايه وقتها-وانت ياعم شريف هاقول لمراتك ده انت في الشار اللي ورايا :lol: :lol:

بس مانساش ابدا مرة كنت طالع كوبري اكتوبر من الدقي وكنت راكب ال 128 (مش عارف ليه كل مصايبي مع ال 128 :?: ) وبعدين في اخر المطلع وجاي ادخل الكوبري الطريق وقف ووقفت جنبي بنت راكبة باجيرو والعجلة اليمين بتاعتها في الرفرف الشمال بتاعي والباب بتاعي المهم الهانم بتسمع اغنية وقافلة الازاز ومعاها صاحبها جنبها وهاتك يا تهييس وفجأة شافت حتة فضيت قدامي قررت تكسر وتدخل فيها(فاكرة نفسها راكبة ماروتي ) وهوب لفت الردكسيون في لحظة لقيت العجلة بتاعت الدبابة بتاعتها بتعصر الباب والرفرف عندي وداخلة عليا
انا هاتك يا زعيق ودي مش سامعاني وبعدين خبطت بايدا الاتنين من جوة العربية علي عربيتها لحد ما سمعت ودي نازله بمنتهي البرود وايه ايه انت اللي غلطان انت اللي دخلت تحت العربية بتاعت(شوفتوا البجاحة :twisted: )
المهم الامور ابن ماما وبابا نازل يتكلم قلتلة اركن يلة انت علي جنب وخلي الرجالة تتكلم وماعبرتوش نهائي :mrgreen:
وبعدين قعدت تقولي غلطتك وحوارت من دي مع ان مواصفتها زي ما بيقول هاني بالظبط وانا طبعا مش شايف كل ده لاني عربيتي ادعكت
المهم قولتلها نعمل معاينة ونشوف مين اللي غلطان دي اترعبت(اكتشفت فب النهاية انها معهاش رخصة)
المهم كل سواق تاكسي يتدخل عشان الامورة ويقول كلمتين حلوين ويقول خلاص يا كابتن ربنا يعوض عليك واالي يقول
دي تتلم علي البارد(شوف البرود) وهيا منتهي قلة الادب
ماطولش عليكم ما سبتهاش الا لما خدت منها 500 جنيه :lol:
خدت العربية وصلحتها ب 150 جنية ورشتها فرن كمان (كان من 10 سنين مثلا) وضربت الباقي في جيبي

الذ ما في الموضوع واحدة صاحبتي جاي بعدها بيومين تقولي ما شوفتش اختي الصغيرة حصلها ايه
واحد ب 128 بيضاء زي بتاعتك زنق عليها علي الكوبري وخبطها وقل ادبة عليها (حسب رواية اختها) وخد منها 500 جنية
بس الجواب اللي سالتني عليه كتير ومارديتش انت عربيتك فين بقالها اسبوع :!: :?: :roll: :roll: :roll:
:mrgreen: :mrgreen: :mrgreen: :mrgreen: :mrgreen: :mrgreen:[/color]

-

الموضوع: ياترى هاتعمل أيه يف الموقف ده (الجزءالتاني)

LinkBack

أدوات الموضوع

عرض

-

كاماتشو .......رد ياسيدى (sherif) -

-

-

-

-

المواضيع المتشابهه

يا ترى هاتعمل أيه في الموقف ده ؟ 1

ياترى هاتعمل أيه في الموقف ده ؟؟ (الجزء الثالث)

الكلمات الدلالية لهذا الموضوع

المفضلات

المفضلات

ضوابط المشاركة