الموضوع: سلوكيات اللى بيركبوا معاك

الحمد لله انا مبخرجش اصحابى معايا عشان اتفادى الاخطاء دى وعشان مبهدلش العربية اونطه - بس بخرج معاهم عادى وهو غالبا صاحب واحد

ثانيا لما ببقى سايق بالوالد (خلى بالك - بص فى المرايه - حاسب مش عارف ايه .........) وكلام من اللى عارفينه بس ربنا يخليه انه بيدينى العربية اساسا

بدايق قوى من (رزع الباب - المشى على ناقله عاليه بسرعه قليله - اكل المطبات والنقر )

اكتر حاجه بتضايقني لما: اولا مع العائله ووالدي يبقى جانبي وكل لما اتكلم كلمه يقوللي ماتكلمش وانت سايق وانتبه للطريق ويوطي الكاسيت وياعيني لو السكه زحمه والطريق واقف:K_crying[1]: يبقى انا اللي زحمت الطريق وكله يقعد ينفخ ويهري واسمع كلام كتير زي ليه ماخدتش الطريق التاني وليه بتطلع المحور وياسلام لو الطريق فيه مطبات اللي يقولي حرام عليك واللي يقولي ابقى حاسب وبراحه شويه وكاني انا اللي عملت المطبات ده بالنسبه للعائله والناس الكبيره البركه
اما بالنسبه لاصحابي اكتر حاجه بيتضايقني شرب السجاير وبالذات لان اصحابي حشاشين ولما ياكلوا في العربيه والاقي بقع كاتشب ومايونيز على الفرش ولما يهزروا هزار غبي ويخلوا الواحد يلبس في اي حاجه ولما كل واحد علشان ساق عربيه قبل كده يبقى واد سواق ويقعد يفتي ويقولك خد الغرزه دي والحاوده دي متتاخدش كده ولما كل واحد ينزل من العربيه ومايقفلش الزجاج واركن انا العربيه واقعد اقفل فيها ايام العربيات السابقه (الشاهين والكليو والفيرنا)............. ياااااااااااه ايه ولا ايه انت جيت على الجرح وخليت الواحد يفتح في الكلام

فى حاجة كمان نسيت اقولها : ... بعد ما بعد صحابى ينزلوا بلاقى الدواسات اتحركت من مكانها !!
الحركة دى بتقتلنى .!
مع ان الدواسات تقيلة جدا و مش سهل انا تتحرك بس هو دا الواقع ...

حد عنده حل للموضوع ده؟

اكتر حاجات بتخنقي
خد عندك بقي
الهزار وانا راكب بيبقي هزار غبي
مزاولة اصحاب العربيات الي جمبي من عينة بقولك ايه ويروح باصصلي انا
الكاسيت بقي ده موال ممكن واحد يسمع اغنية تلات مرات لمجرد ان هو بيحبها
الدواسات بتتحرك
وتبقي كلها تراب
رزع الباب
النصائح بقي كل واحد فيهم فاكر نفسه سقراط
والدتي بقي لما تركب معايا
الاسطوانة تبدء
امشي براحة مش مستعجلين بلاش تدي كلاكس(اكني عيل فرحان بيه)
خلي الناس تعدي واطي الكاسيت شوية (مع انه بيبقي واطي اساسا)
انا بفكر اجيب عربية كارو باتنين حمار احسن ليا وارحملي

فى عندى قواعد لركوب العربيه معايا و ان كان سعات الواحد بيتكسف يتكلم فى بعض الاحيان .
بالنسبه للسجاير ديه من الممنوعات ممنوع منعا باتا شرب القرف السجاير فى العربيه تحت اى ظرف و الحقيقه اصحابى كلهم محترمين القاعده ديه لانى بجد ممكن اتخانق خناقه كبيره بسبب الموضوع ده .
بالنسبه للحاجات الى بغيظنى .

- الى يجى يركب العربيه لازم لازم يكحت الباب و العتب بجزمته " و الباب عندى لونه بيج " ف بلاقى احلى علامات سوده على الباب , مش بعرف افهمهم ازاى يخلو بالهم من النقطه ديه
- الى بيرزع الباب جامد بتدايق جدا من الحركه ديه
- الى يقعد مش على بعضه و الاقيه عمال يفرك زى العيال الصغيره .
- موضوع الدواسات الى بتتحرك من مكانها " جزء من النقطه الى فاتت بتاعت الفرك الغير مفهوم " .
- حد يقولى هات نجوم اف ام .. خصوصا لو جايبه الاغانى الهابطه الى ماتتسمعش و الاعلانات الى بتجيب تخلف عقلى .
- حد راكب معايا و فكر يعاكس بنت او واحده سايقه عربيه و يستخف دمه . بهزقه على طول و بحرق بالعربيه علاشان مدلوش فرصه :-) .
- تعليمات الناس الكبار فى السن من نوعيه حاسب , امشى براحه " مع انى اساسا بكون ماشى براحه " .
- الى يقعد يلعب فى حاجه فى التبلوه او زرار او يمسك حاج يختبر جودتها بأنه يخبط عليها !!!!
- الى يحط مفاتيحه او موبايله على تبلوه العربيه الى اساسا مفهوش مكان علاشان تحط فيه حاجه .
- الى يقعد يفتح و يقفل فى الازاز كل شويه .

* النقطه الاهم من كل الحاجات ديه ان حد حيركب معايا العربيه من اصدقائى اديله معاد و يلطعنى فى الشارع " حصوصا لو مستنيه فى مكان ممنوع انى اقف فيه " بجد بيتحرق دمى و ببقى نفسى اهزقه بس مش بقدر لانه ممكن يفتكر انى بتغر عليه ولا حاجه و اعتقد انى اخدت مخالفات بسبب الموضوع ده .