العربية بتحدف يمين !!

**Ahmed Hamdy** · 05-01-2009 10:09 AM

سلام عليكم يا جماعة ..
العربية عندى بتحدف يمين .. فبلاقى وأنا ماشى ان الطارة مبقتش فى النص عشان أحافظ على اتجاه العربية يكون مستقيم ..
رحت ظبط زوايا بس الراجل قالى الزوايا مظبوطة لكن المشكلة فى الكاوتش الأمامى عايز يتغير .. !!

هل فعلا ممكن تكون المشكلة دى من الكاوتش ولا فى أسباب تانية ؟؟

**XLANS** · 05-01-2009 10:23 AM

ممكن يكون الكاوتش بس اعمل ترصيص الأول علشان تتأكد

علشان كان عندى العربية بتحدف و الدركسيون فيه غربلة جامدة بعد ال 80

و طلع عندى جنط معووج و استعدلتوة عند الراجل اللى فوق نفق الملك الصالح

ورجعت رصصت تانى و اتظبط الحدف والغربلة.

**Ahmed Hamdy** · 05-01-2009 01:00 PM

شكرا يا باشا على الرد ..
أنا عامل ترصيص قريب والعربية مش بتغربل ..
أنا شاكك فعلا انه الجنط لان وأنا بعمل ترصيص الراجل قالى الجنط اليمين ده شكله معووج ..
طيب فين الراجل بتاع استعدال الجنوط ده بالظبط واسمه ايه لو تفتكر ؟؟

**XLANS** · 05-01-2009 03:50 PM

المشاركة الأصلية كتبت بواسطة Ahmed Hamdy

شكرا يا باشا على الرد ..
أنا عامل ترصيص قريب والعربية مش بتغربل ..
أنا شاكك فعلا انه الجنط لان وأنا بعمل ترصيص الراجل قالى الجنط اليمين ده شكله معووج ..
طيب فين الراجل بتاع استعدال الجنوط ده بالظبط واسمه ايه لو تفتكر ؟؟

اسمة المركز الفنى الهندسى لأستعدال الجنوط

وهوة فوق نفق الملك الصالح بالظبط

وانت جاى صلاح سالم من ناحية السيدة عائشة هتنزل نفق

الملك الصالح وأول لما تطلع من النفق هتلف يمين مع سور النفق

وهتلاقى اللفة صغيرة وجنب النفق علطول هتدخل فيها هتلاقى

الراجل اخر الشارع على الشمال.أنا وصلت بسهولة جدا

واى استفسار انا موجود.

**Ahmed Hamdy** · 06-01-2009 10:32 AM

شكرا يا ريس ...
بس مش نفق الملك الصالح ده ممكن أوصله من ناحية الكورنيش ؟؟

**XLANS** · 06-01-2009 10:34 AM

المشاركة الأصلية كتبت بواسطة Ahmed Hamdy

شكرا يا ريس ...
بس مش نفق الملك الصالح ده ممكن أوصله من ناحية الكورنيش ؟؟

أكيد ممكن ياباشا بس انا بوصف لك الطريق اللى انا اعرفه وروحت منه.

ممكن حد من الشباب يفيدك ان شاء الله.

**yousefkhodier** · 06-01-2009 02:26 PM

الحدفة دي يا باشا اسبابها الاتي:الزوايا لكنها مظبوطة
لكن السبب الاهم هو الاسكاترا والاسكاترا دي موجودة في العفشة دي تروح للعفشجي وهو يقولك اذا كانت هتظبط ولا تتغير وخليه يكشفلك عالمقصات

وابقي قابلني لو حدفت منك تاني

**yousefkhodier** · 06-01-2009 02:29 PM

اهم سبب وهو( الاسكاترا) ودي في العفشة انصحك ان العربية تروح للعفشجي وهو يقولك اذا كانت هتظبط ولا هاتتغير وخليه يكشفلك عالمقصات بالمرة وابقي قلبلني لو حدفت منك تاني

**eldeplomasy** · 06-01-2009 07:17 PM

بتاع استعدال الجنوط فوق نفق الملك الصالح وانت جاي من الجيزة متنزلش النفق وخليك من فوق على اليمين هتلاقيه على اليمين برده وممكن تكلفك في حدود 30جنيه بس فعلا الكاوتش عندي كان مخلي العربيه تحدف وكان هو السبب مش الجنط فقبل ما تروح ويتعمل عليك شغل روح لواحد بتاع كواتش واساله على الكاوتش والجنط حالتهم ايه؟؟؟