| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
صفحة 1 من 5 1 2 3 4 5 الأخيرةالأخيرة
النتائج 1 إلى 10 من 46

  1. #1

    الصورة الرمزية R A N A

    رقم العضوية : 11997

    تاريخ التسجيل : 01Jun2008

    المشاركات : 1,019

    النوع : انثى

    الاقامة : Cairo

    السيارة: مفيش ... هي سيارة واحدة والحمد لله

    السيارة[2]: New Accent 2010 - Maroon

    الحالة : R A N A غير متواجد حالياً

    Unhappy أول يوم من غيرها... خلاص بعت عربيتي :( - Facebook Twitter whatsapp انشر الموضوع فى :

    hasad">

    النهاردة أول يوم انزل شغلي فيه من غير عربيتي العزيزة لإني ودعتها امبارح بس :K14: وسلمتها للمالك الجديد ربنا يباركله فيها ويديه خيرها ويكفيه شرها يارب.

    طبعا انا كنت عاملة اعلان بقالي اكتر من شهرين وسمعت وشوفت العجب في الفترة دي من الناس اللي بتتصل وتستفسر وتفاصل لمجرد تسلية وقت الفراغ والناس اللي بتتصل وتستفسر وتدي مواعيد ومتجيش والناس اللي بتتصل تفاصل بس قبل ماتعرف اي تفاصيل وتقول اسعار تحرق الدم وناس تانية برده اتصلت واستفسرت وجت عاينت ومعجبهاش السعر وناس جت تحاول تطلع فيها القطط الفاطسة مستغلين اني بنت وظروف السوق النايم والكلام الغريب ده :k17:.
    المهم الموضوع بقي بدأ يوم الأربعاء لما لاقيت التليفون بيرن وحد كالعادة بيستفسر عن العربية (شاف اعلانها على النت بس موقع كونتاكت) قالي خلاص بكرة ان شاء الله نيجي نشوفها فين؟ قلتله مصر الجديدة بس لو حضرتك هاتيجي يريت تتصل بيا قبلها،
    تاني يوم لاقيته بيتصل وبيقولي قدامي ساعة واجي قلتله تشرف يافندم وجه وفصصها وبعدين سألني علي السعر قلتله انا طالبة 22 الف ونص قالي كتير والاخر كام ومعرفش ايه قلتله الاخر والنهائي 22 الف ومش هاقدر انزل عن كده ، انا شارياها غالية ولسة بصرف عليها لحد النهاردة مع ان اللي بيقرر يبيع بيكبر دماغه وميحطش مليم في العربية من ساعة قرار البيع ،
    قالي برده كتير تمشي 20 قلتله اسفة مش هاينفع قالي طيب ومشي وانا رجعت مكتبي تاني والموضوع خلص على كده .
    لاقيته بيتصل اخر النهار بيقولي هاجي بكرة ومعايا حد نشوفها بعد اذنك قلتله تشرف يافندم جه ومعاه واحد قعد يفصص في العربية حتة حتة تاني من بره ومن جوه ودوري عشان نشوف الموتور وكده وبعدين قالي خلاص هاناخدها بس عايزة كام من الاخر قلتله 22 زي ماقلت امبارح قعد يقولي نفس الكلام والعربية محتاجة حاجات (مع ان عربيتي فلة يعني) والسوق نايم ومعرفش ايه قلتله بص انا اخر سعر جالي فيها 20 ونص وكان هايوصل ل 21 ومرضيتش (وفعلا ده حصل قبل العيد بس انا طنشت ومتصلتش بالراجل اللي عرض ده) يمين شمال نزلت ل 21 ونص وانا هاعيط قعد يزن تاني لحد ماصعب عليا وقالي 21 فضلت مترددة شوية وكنت هارفض وقلتله لأ ومينفعش قعد يقنعني وبعدين وافقت في لحظة يأس كده دفع الف وكان عايز عقد ابتدائي قلتله هاكتبلك ايصال قالي لا عايزين عقد ابتدائي قلتله مفيش عقد ابتدائي ب 1000 جنيه يافندم المهم اتصرف وراح راجعلي بعد شوية ب 10 الاف فوق الالف وكتبنا عقد ابتدائي بس مرضيتش اسلمه العربية وبدأت رحلة العذاب في انهاء اجراءات البيع .
    نزلت يوم السبت من بيتي الساعة 9 وربع تقريبا عديت على الشهر العقاري قالي لازم تجيبيلي شهادة بيانات (لان الرخصة اللي كانت معايا كانت ورقة كارتون كبيرة كده مكتوب عليها تصريح مؤقت) روحت المرور كل ماقف على شباك يقولي الناحية التانية اروح الناحية التانية يقولولي الناحية الاولانية ولما وصلت لشباك المخالفات أول ماشاف الرخصة مكتوب عليها متنوع قالي لا دي تجيبي مخالفاتها من مرور مدينة نصر :K_crying[1]: قلت خلاص اطلع شهادة البيانات الأول وبرده نفس اللفة السودة والطوابير برده ومن هنا لهنا لحد مازهقوني ومبقتش عارفة اعمل ايه (انا قلت في الاول امشي رسمي زي كل الناس) لكن لما لاقيت الحكاية كده قلت مبهداش بقي طلعت للرئيس الوحدة العقيد فلان (كان شخص محترم اوي ومتعاون) قلتله انا جاية لحضرتك من طرف اللواء فلان وكنت جيت لحضرتك قبل كده وجددتلي التصريح قالي اتفضلي ، خير؟ قلتله لما سألت عن شهادة المخالفات فقالولي مرور مدينة نصر مع ان الملف وصل هنا قالي فعلا مخالفاتها تبع مدينة نصر مش هنا قلتله طب انا عايزة كمان شهادة بيانات للعربية قاللي ليه؟ قلتله عشان ابيعها قالي طب ماتعمليها كمبيوتر احسن قلتله ماشي حضرتك اي حاجة قولي اروح فين كتبلي ورقة عليها اسم الضابط اللي تحت وقالي انزلي قوليله عايزة اعمل دي كمبيوتر ، وقد كان.
    الضابط بصراحة كان محترم هو كمان وكتبلي ورقة تانية عليها اسم الموظف اللي اروحله ودخلت من جوه بقول للأستاذ فلان بيه بيقول لحضرتك اعمللي الرخصة دي كمبيوتر (وغالبا كده واحدة من اللي واقفين في الشباك علقت تعليق ضايقه) فقالي طب خلي حد يجيبيلي الملف بتاعها (هو طبعا المفروض يقول لحد يجيبله الملف لكن غالبا حب يغلس عليا ويورطني انا) قمت رجعت للضابط تاني قلتله بصراحة مش عارفة مين العسكري اللي هياخد اوامر مني انا ، قالي طيب وراح معايا للأرشيف وادي للعسكري الورقة اللي مكتوب عليها رقم الملف وفضلت من هنا لهنا ورا الضابط وفي الطريق قابلت موظفة كانت ساعدتني قبل كده بتوصية من العقيد رئيس الوحدة عشان اجدد التصريح (وكان ليها عندي فلوس بتاع 5 جنيه حق الورق بتاع التصريح بس نسيت اديهملها فكرتها بنفسي وقلتلها خدي الفلوس حضرتك دفعتيلي حق الورق من جيبك واتحايلت عليها عشان تاخد الفلوس مرضيتش وقالتلي ميصحش وكده قلتلها طب انا عايزة اعمل دي كمبيوتر فوصت الضابط وقالتله دي من طرف فلان بيه "رئيس الوحدة" قالها طيب (هو كان معايا بس طبعا عمال يتابع ويخلص ورق ناس تانية برده) المهم فضلت وراه وعمالة برده أسأل العسكري عن الملف (قلت لازم اسعي شوية برده) المهم عرفت ان الملف فوق مش هنا كمان قلت للعسكري اجيبه ازاي قالي المندوب هو اللي هايجيبه روحت مسكت في المندوب ده وقلتله ، قالي طيب استريحي وانا هاطلع اجيبهولك قلتله لا رجلي علي رجلك انا طالعة معاك (اصل دول يومهم بسنة) لحد مافي الاخر وصلنا الي الملف المصون نزل معايا واداه لموظفة هناك هي شكلها كشري وجد اوي وتحسها عنيفة شوية لكنها طلعت بتهزر ودمها خفيف واحيانا بتكون مرحة يعني فضلت واقفة جنبها قلتلها فلان بيه (الضابط) باعتني لحضرتك قالتلي طب استني اخلص اللي في ايدي خلصت وبعدين بصت في ملفي وقالتلي فين الرخصة ؟ فين التوكيل؟ هاتي صورة منه؟ فين صورة بطاقتك؟ قلتلها هاروح اصورها قالتلي وهاتي معاكي النموذج ده (واديتني ورقة مكتوب عليها رقم) من الخزنة رحت اشتريت الورق وصورت البطاقة ورجعتلها تاني كانت ملت البيانات وقالتلي هاتي الورق اخدته مني كله وقالتلي خلاص روحي استلمي بقي من الشباك هينادوا علي اسمك فرحت اوي لكن يافرحة ماتمت لاقيت ناس كتييييييييييييير مستنية قعدت استنيت بقي (انا خلصت الحوار اللي فوق ده حوالي الساعة 1 أو 2 وشوية) فضلت مستنية وكل شوية يطلع العكسري ينادي شوية اسامي ويوزع علي الناس شوية رخص وشهادات واحنا قاعدين ويرجع تاني بشوية رخص يسلم ويمشي واحنا قاعدين (حمٍل بالشيفروليه واحنا قاعدين ) لحد مالساعة وصلت ل 4 وشوية وفي هذة الاثناء تناقلت الاشاعة بين الناس ان مفيش رخص كمبيوتر هاتطلع تاني النهاردة وهايسلموا الناس الرخصة الكارتون دي بدالها انا سمعت كده وجالي هلع دخلت للموظفة اللي وصت عليا وكانت شغالة في رخص الكمبيوتر وقلتلها يامدام انا بقالي اكتر من ساعتين مستنية ومحدش سلمني رخصة ولا حاجة وسمعت انهم هايسلموا الناس رخصة كارتون تاني قالتلي هاتي رقم العربية كتبته علي الجهازها قالتلي طلعت خلاص قلتلها طب مستلمتهاش انا ليه؟ قالت يإما ندهوا على اسمك ومسمعتيش يإما بتتراجع عند المراجعين (طبعا الناس كلهم كانوا قرفانين على الاخر ودخلوا علي المراجعين في المكاتب وعملوا تجمهر وكله بيتزمجر لحد مالعساكر خرجوهم كلهم عشان الموظفين يخلصوا).
    فضلت مستنية بره ، فين بقي بعد ساعة كمان ندهوا على اسمي اخيرا وسلموني رخصتي كمبيوتر (ومسلمينهالي متغلفة اي كلام والتغليف منفصل عن الورقة) قلت مش مهم وكنت هازغرط الحقيقة بس اكتشفت اني مش بعرف ازغرط وخدتها ومشيت.
    تاني يوم روحت مرور مدينة نصر عشان اجيب شهادة المخالفات شوفوا الفرق بقي :
    أولاً دخلت لاقيت عدد محدود من الناس وقفت علي شباك منهم الموظف قالي السيدات اخر شباك ثانياً روحت اخر شباك مالقيتش غيري انا اديت للموظف الرخصة وقلتله عايزة مخالفاتها نده لموظف جنبيه قاله اكشف علي الرخصة دي عليها حاجة كشف قاله ايوة قلتله كام قالي 56 جنيه (هي المخالفة 50 جنيه الباقي الله اعلم تبرعات وخلافه) فطلعت الفلوس وسألته دي مخالفة ايه قالي دي مخالفة من القانون القديم ياحزام امان ياموبايل ياكسر اشارة (كمان مش عارفين هي مخالفة ايه فيهم ) دفعت وقالي استني 10 دقايق هايندهوا علي اسمك بعد 5 دقايق ندهوا عليا روحت استملت شهادة المخالفات .
    تخيلوا الفرق بقي اقعد في مرور السلام اكتر من 6 او 7 ساعات عشان اعمل رخصتي كمبيوتر ، واطلع شهادة مخالفاتي من مرور مدينة نصر في ربع ساعة بجد حاجة مش طبيعية .
    قلت في سري انا عايزة من ده ، نفسي اتنقل مرور مدينة نصر ده او اي مرور تاني نضيف.

    المهم طبعا زي ماحكيت اني كنت واخدة 11 الف بس من الراجل قالي طب سجليلي وانا هاجيلك اخر النهار اسلمك باقي الفلوس (بصراحة خفت وكنت مترددة كتير اني اعمل الخطوة دي لإن كده روحي هاتبقي في ايده لإن العربية لو اتسجلت بقت بتاعته رسمياً) وحاولت معاه يجيلي الشهر العقاري نخلص هناك منفعش لإنه مش عارف يفلفص من شغله خالص وقاللي مانتي كل حاجة معاكي العربية والعقد والرخصة وكله متسلمهومليش الا لما اديكي باقي فلوسك .
    المهم توكلت علي الله وطلعت عملت عقد بيع مسجل في الشهر العقاري اللي جنب سوق سيارات مدينة نصر ودفعت رسوم تسجيل 60 جنيه وخلصت ورجعت شغلي وقعدت مستنية لحد ماجه اخر النهار وفضلت حاطة ايدي على قلبي لحسن يطلع نصاب ويروح يطلع بدل فاقد من عقد البيع ويسحب بيه العربية وميدفعش باقي الفلوس واقعد اعيط انا بعد كده :k30:.
    بس الحمد لله ربنا سلم والراجل جه وسلمني باقي فلوسي + فلوس التسجيل وسلمته العربية بورقها وبكل حاجتها واديته ورقة مكتوب فيها الحاجات اللي انا غيرتها فيها بالتاريخ وعند كام كيلو في العداد ونبهته لحاجتين صغيرين في العربية ان مارشها كان بيأخر شوية وان فتيسها تقيل سنُة عشان ياخد باله وهو بينقل علي الغيارات وباركتله وودعت عربيتي .
    بجد في خلال فترة اتمام الاجراءات دي كان عندي احساسين بيناقضوا بعض اني مبسوطة اني بعتها وفي نفس الوقت زعلانة عشان مش هاركبها تاني وهارجع تاني للمواصلات وقرفها :K_crying[1]:وبجد انا شفت ايام في العربية دي منها اللي كانت حلوة فعلا ومنها ايام كانت مش ولابد بسبب كام دقة نقص عملتها معايا لما عطلت مني وروحت صلحتها.
    معلش انا طولت عليكوا اوي بس انا قلت احكيلكوا حكايتي مع بيع العربية ومدي معاناتي في إتمام الإجراءات واهي تجربة برده يمكن يستفيد منها اي حد بيشتري او يبيع عربية.
    ولو حد عنده اي سؤال بخصوص الاجراءات انا تحت امركوا. :k10:


  2. #2

    الصورة الرمزية AHMEDCAR

    رقم العضوية : 6461

    تاريخ التسجيل : 26Feb2008

    المشاركات : 4,573

    النوع : ذكر

    الاقامة : Nasr City

    السيارة: الحمد لله

    السيارة[2]: Verna

    دراجة بخارية: لا يوجد

    الحالة : AHMEDCAR غير متواجد حالياً

    افتراضي -

    ربنا يرزقك بالحسن منها ان شاء الله

    بس بجد سردك للقصه جميل

    سبحان الله و بحمده سبحان الله العظيم


  3. #3

    الصورة الرمزية mada121977

    رقم العضوية : 198

    تاريخ التسجيل : 25Apr2007

    المشاركات : 2,429

    النوع : ذكر

    الحالة : mada121977 غير متواجد حالياً

    افتراضي -

    ربنا يبارك لك فى بيعها ويرزقك باحسن منها ويبرارك للمشترى ويكفيه شرها


  4. #4

    الصورة الرمزية tarekkasaby

    رقم العضوية : 1915

    تاريخ التسجيل : 26Aug2007

    المشاركات : 702

    النوع : ذكر

    الاقامة : حدائق الاهرام

    السيارة: Getz 2007

    السيارة[2]: NISSAN SUNNY 2013

    الحالة : tarekkasaby غير متواجد حالياً

    افتراضي -

    مش عارف اقولك مبروك ولا ايه على تعب المرور
    على العموم مبروك على بيع القديمه و عقبال الجديده


  5. #5

    الصورة الرمزية sasatony

    رقم العضوية : 15708

    تاريخ التسجيل : 03Aug2008

    المشاركات : 652

    النوع : ذكر

    الاقامة : الهرم

    السيارة: AVEO2014

    السيارة[2]: verna

    الحالة : sasatony غير متواجد حالياً

    افتراضي -

    ينهار ابيض كل ده
    انا لو منك مكنتش بعتها علشان خاطر اللفة دي كلها والقرف ده


  6. #6

    الصورة الرمزية R A N A

    رقم العضوية : 11997

    تاريخ التسجيل : 01Jun2008

    المشاركات : 1,019

    النوع : انثى

    الاقامة : Cairo

    السيارة: مفيش ... هي سيارة واحدة والحمد لله

    السيارة[2]: New Accent 2010 - Maroon

    الحالة : R A N A غير متواجد حالياً

    افتراضي -

    اقتباس المشاركة الأصلية كتبت بواسطة sasatony مشاهدة المشاركة
    ينهار ابيض كل ده
    انا لو منك مكنتش بعتها علشان خاطر اللفة دي كلها والقرف ده
    انت بتقول فيها انا فعلا جيت في نص الإجراءات وانا مستنية الرخصة كنت هايأس وامشي بس افتكرت اني مينفعش امشي لان الرخصة ماهي كانت معاهم في المرور يعني لو ضابط لاقاني ممعاييش رخصة العربية يبقي هانبات انا وهيا في القسم لحد مايبان لينا صاحب
    عموما هو القرف كله كان اول يوم في مرور السلام المقرف بطبيعته بس الباقي كان لذيذ ومشي بسهولة


  7. #7

    الصورة الرمزية mrghost

    رقم العضوية : 2585

    تاريخ التسجيل : 12Oct2007

    المشاركات : 4,564

    النوع : ذكر

    الاقامة : cairo

    السيارة: alto 2015

    السيارة[2]: verna 2015

    دراجة بخارية: لا يوجد

    الحالة : mrghost غير متواجد حالياً

    افتراضي -

    دايما البايع كده بس كده كويس علشان لما تشترى عربيه جديده ان شاء الله ماتدفعيش ضرية ترفيه طالما سجلتيها باسم المالك الجديد وعقبال ماتقولى على اجراءات ترخيص العربيه الجديده بقى


  8. #8

    الصورة الرمزية ahmed_su

    رقم العضوية : 9524

    تاريخ التسجيل : 25Apr2008

    المشاركات : 6,381

    النوع : ذكر

    الاقامة : Cairo

    السيارة: Tempra_1996

    السيارة[2]: Cerato _2008_Auto

    دراجة بخارية: NO

    الحالة : ahmed_su غير متواجد حالياً

    افتراضي -

    مبروك .....

    وعقبال الجديدة ان شأالله

    Eng.Ahmed Ismail


    You Can't Never Ever to Keep a Nice Car in This Country....!!! S.O.S
    [sor2]http://www.wasit.net/alrowad/images/hit.gif[/sor2]

    كل شيء عن السيراتو

    _______________
    اللهم إن في تدبيرك مايُغني عن الحِيَل، وفي كرمك ماهو فوق الأمل، وفي حلمك مايسد الخلل، وفي عفوك مايمحُو الزلل..


    اللهم فبقوة تدبيرك وعظيم عفوك، وسعة حلمك ,وفيض كرمك، أسألك أن تدبرني بأحسن التدابير، وتلطف بي وتنجيني، مما يخيفني ويهمني..

    اللهم لا أضام وأنت حسبي، ولا أفتقر وأنت ربي، فأصلح لي شأني كله ولا تكلني إلى نفسي طرفة عين ولا حول ولاقوة إلابك


    ______________________
    [shfaf2]http://www7.0zz0.com/2011/11/29/23/575740455.gif[/shfaf2]


  9. #9

    الصورة الرمزية wesam_salom

    رقم العضوية : 14360

    تاريخ التسجيل : 07Jul2008

    المشاركات : 3,083

    النوع : ذكر

    الاقامة : جوه البطيخه

    السيارة: كتير

    السيارة[2]: كتير

    دراجة بخارية: لا يوجد

    الحالة : wesam_salom غير متواجد حالياً

    افتراضي -

    الف مليون مبروك
    الحمد لله انك بعتى العربيه فى الوقت ده
    انا كنت ببيع عربيتى الاكسيل من شهرين
    وكنت حاسس انى فى انتظار معجزه
    وبالنسبه للروتين فى المرور
    ممكن تتفضلى عندنا فى مرور طنطا
    وانتى وقتها هتحمدى ربنا على النعمه اللى انتى فيها
    انا فعلا كرهت العربيات بسبب مشاكل البيع والشراء والترخيص

    عامه ربنا يرزقك بأحسن منها
    وترخصيها 3 سنين علشان تشترى نفسك من المشاوير دى

    (الزواج ھو أن تأخذ البقال على أول شارعكم لبیتك حیث يعیش معك ، وتنفق علیه للأبد ھو وأطفاله
    لمجرد أنك تحب الجبن الرومي !)


  10. #10

    الصورة الرمزية amirhamed

    رقم العضوية : 9495

    تاريخ التسجيل : 24Apr2008

    المشاركات : 805

    النوع : ذكر

    الاقامة : Cairo

    السيارة: daewoo lanos 2008

    السيارة[2]: Daewoo lanos 2008

    دراجة بخارية: لايوجد

    الحالة : amirhamed غير متواجد حالياً

    افتراضي -

    hasad">

    مبروك البيع وربنا يسهل في اللي جاي

    Life Is Chemistry



 
صفحة 1 من 5 1 2 3 4 5 الأخيرةالأخيرة

المواضيع المتشابهه

  1. البلد خلاص والناس خلاص اتجننت ومحدش بقى لية كبيروكلةماشى بدراعةكارثةحصلت قدامى امبارح
    بواسطة abdalah_hashem في المنتدى المنتــــــدى العـــــــــــام للسيــارات
    مشاركات: 13
    آخر مشاركة: 25-07-2011, 02:14 PM
  2. ما الفرق بين السوبارو و غيرها ؟؟
    بواسطة Kazzaz في المنتدى ســوبارو
    مشاركات: 4
    آخر مشاركة: 30-11-2009, 02:08 PM
  3. يانحبه يا نحب غيرها
    بواسطة Mostafa Shaker في المنتدى المنتــــــدى الاجتمــاعى
    مشاركات: 0
    آخر مشاركة: 29-10-2009, 03:39 PM
  4. دي صوره عربيتي 128 كريزي كار وصوره عربيتي الحاليه سيتروين
    بواسطة hishamanilka في المنتدى ألـــــــبوم سيـــارات الأعضــــاء
    مشاركات: 32
    آخر مشاركة: 01-06-2009, 02:54 PM
  5. اول يوم من غيرها
    بواسطة Ahmed_Elkhateb في المنتدى المنتــــــدى العـــــــــــام للسيــارات
    مشاركات: 16
    آخر مشاركة: 14-01-2009, 02:18 AM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2