نفسي افهم ليه سواقين الميكروباص بيحبوا يطفوا نور العربية بالليل؟؟؟

**waled369** · 06-01-2009 10:38 PM

و الله موضوع جامد بجد يا أستاذ مينا

و لما بانزل مصر باعاني منه كتير

و طبعا أنا ساعات باغلس و أضرب النور العالي و طبعا باسمع شتايم إيه .

**بحري** · 07-01-2009 02:09 AM

وطول ما انت ماشي تسمع ناس تقولك: طفي النور..طفي النور

أكيد الناس بتعمل كده وبتطفي النور عشان الغارة

يعني لزوم التمويه

**mahmoud_mpc** · 07-01-2009 03:08 AM

حضرتك برضة متنساش سائقى التاكسي اللي ماشييت بدون ما يولعوا النور
ومتهيألي السبب انهم شايفن انهم محترفين وانهم على استعداد بان يسوقوا مغمضين عنيهم
مش زي البني ادميين الخرعين اللي راكبين ملاكي , فكل واحد راكب ملاكي مامته هي اللي جايبهاله وراكبها عشان يتفسح ولولا انه حرام عليه "سائق التاكس او الميكروباص" لكان فرمهم تحت عربيته

**Eng.Mina** · 07-01-2009 03:31 AM

يا جماعة المصيبة ان البني ادم اللي بيسوق الميكروباص ده بيبقي معاه ناس كتير 14 بني ادم في العربية يعني الحركات اللي بتين انه محترف يعملها لما يكون لوحده هو حر في نفسه يمكن عنده رغبة في الانتحار لكن لما يكون معاه ناس يبقي لازم يكون في رادع ليهم يعني حتي باستثناء موضوع النور اللي انا فاتح الموضوع علشانه اكيد كتير مننا ركب مع سواقين الميكروباصات وشاف الرعونة اللي بيسوقوا بيها وياسلام بأه لما بيكون مركب جنبه تلات بنات يقوم لابس النضارة الشمس وماسك السيجارة وللحظة يتخيل نفسه انه طيار وهاتك يا غرز للصبح كأن الطريق بتاعه ولما حد يكلمه ويقوله هدي ياسطي يبقي كده طعنه في شرفه وتسمع احلي خناقة وللاسف النتيجة بتكون سيئة انا افتكر ان اول سنة في الكلية حصلت حادثة في شهر رمضان وكان السواق اللي سايق كانت رجله مش سليمة تقريبا كان اعرج علي حسب ماسمعت وكانت النتيجة وفاة كذا بنت من اللي كانوا في الميكروباص (ربنا يرحمهم)
وياما شباب كتير في عمر الزهور راح من غباوة السواقين
ربنا يرحمنا والمرور يعمل حاجة بدل ماهو عمال يلم في فلوس وخلاص

**Eng.Mina** · 07-01-2009 03:35 AM

المشاركة الأصلية كتبت بواسطة waled369

و الله موضوع جامد بجد يا أستاذ مينا

و لما بانزل مصر باعاني منه كتير

و طبعا أنا ساعات باغلس و أضرب النور العالي و طبعا باسمع شتايم إيه .

شكرا ليك يا استاذ وليد
انا فعلا بحس ان الزينون بيبقي ليه لازمة لما تعوز ترد علي حد غتت مولع العالي علي طول
(حاجة غريبة ناس مابتولعش النور خالص وعلي النقيض في ناس عندها كيف اسمه النور العالي واستخدامه في اي وقت )

**SAMER_ENGINES** · 07-01-2009 03:14 PM

هما عامة سواقين الميكروباص ماشيين بأسلوب خالف تعرف.

**M.Osman** · 07-01-2009 03:24 PM

سؤال
هل ممكن اي بني ادم يطفي النور داخل منزله ليلا بحجة انه عارف بيته كويس؟
طبعا لا
لكن هناك آراء اخرى

**K.LOTFY** · 07-01-2009 04:01 PM

مش بس سواقين الميكروباص ده كمان بعض الملاكي لما مثلا تبقى داخل كده في شارع و فجأة تلاقي حد بيرعشلك وطبعا الحمدلله أن معظم شوارعنا ضلمة ومكسرة ومليانة مطبات وقرف فالازم يبقى النور طبيعي شغال.
لا ازاي بقى و كأني ارتكبت جريمة في حق الانسانية يقوم يعود يرعش كتير و لما برضه ما اطفيش النور البيه اللي جاي قدامي ياخد بتاره و يفتح العالي وكانه انتقم لشرفه يعني ولازم طبعا لما يعدي من جنبي يقول النوووووررررررر وطبعا مصحوبة بنظرات الشر والقرف على الجريمة اللي انا عاملها والتصرف الغير حضاري اللي أنا فيه ازاي ابقى فاتح النور وماشي سليم لأ لازم أطفيه والبس انا في عربية ولا رصيف المهم ان عين سيادته ما تتوجعش الثواني اللي بنعدي فيها دي