الموضوع: الجريمة شبة الكاملة

اولا عام سعيد على الجميع و ارجو ينهى احسن من بدايته المؤلمة دى، و عيد ميلاد سعيد للاخو الاقباط (اللى انا منهم )

المهم فى ايه فى الكتاب المقدس بتقول "النفس الشبعانة بتدوس العسل و النفس الجوعانة تشتهى المر"

و للاسف المحتالون بعتمدو على الجزء الاخير من الايه دى

انهاردة علشان الجو جميل قررت استمع بالعيد و الاجازة اتمشى على البحر بين سيدى بشر و المحروسة و بعد رمادا بشوية لقيت واحد يجرى قدامى علشان يمسك حاجة وقعة على الارض و بعدين جه جنبى و فتح اللفة علشان يورينى انها لفة فلوس و قالى ده ربنا بعتها لينا و عرض اننا نتقاسم و سالنى اذا شوفت وقعت من حد قلت لا و كنت فعلا مش مهتم و عاوز استمتع بالمشى على البحر و المنظر و بعدها واحد جاى علينا بيدور فى هدومه سالت اذا حاجة وقعت منه قال ايوه لفة فيها 30 ورقة بـ 100 جنيه التانى قاله جاى علينا ليه و ابتدو يتكلمو مع بعض و اسلوب الحديث كان منحط فقررت ابعد عنهم علشان اسلوب الكلام و بعد حولى 50 متر انتبهت ليه واحد لقى فلوس عايزنى اشاركه فيها؟
ادورت لقتهم الاثنان اختفوا لحد كده عادى ممكن يحصل

بعدها عند الحزب الوطنى لقيت الاثنان واقفين بعيد عن بعض حوالى 10 م و فى تاكسى على بعد 10 م تانية فيه اثنين تانين (سواق و واحد ورا) التاكسى لادا 2107 نمرته 68137 الاسكندرية مشيت كانى معرفتهمش و قالت يخلق من الشبة اربعين و لحد هنا فى حاجة مريبة بس برضه ممكن يكون كله تهيات

و المشهد الاخير
بعد 10 دقايق لقيت التاكسى ماشى و فيه الاربعة و يدوب قبل المحروسة لقيته راكن و فيه الاثنان زى المرة اللى قبلها و قررت اعدى الشارع و اراقب من بعيد لقيت الاثنين التانين قاعدين و معاهم على ما يبدوا ضحيه وقعت فى الفخ فتاكدت و فكرت ابلغ بس انا موبينيل و لسه عارف اليوم اللى قبل ان موبينيل مفهوش ارقام الطورائ و لقيت العسكرى اللى بيحرس بنك HSBC فحكيت اللى حصل و قلت اكيد فى طريقة يبلغ عنهم وقتها الضحية لقيته بيعدى و المحتالان معاهم البالطو بتاعه و الله اعلم ايه تانى و شاورو للتاكسى ركبوا و مشو

للاسف كان نفسى اعمل اكتر من كده فقلت على الاقل اكتب هنا علشان الناس تكون اكثر حرص، اتوقع ان التاكسى ممكن يتغير بس الباقى ثابت

واحد يمشى قدامك و يوقع اللفة و التانية يمكسها و يعرض انك تشاركه فيها و التاكسى بيراقب من بعيد علشان المفاجات و اتوقع ان الفلوس مزورة و بعد ما يخدو اللى معاك يركبوا التاكسى و تروح البيت علشان تكتشف المقلب

لو حد يعرف يعمل حاجة بالمعلومات دى ياريت يكتب اللى مفروض التصرف الاصلح

كنت ارجو اكتب حاجة افضل فى العيد بس شكل 2009 بدايته صعبه على الكل