إن شاء الله هشتري إالنترا و عايز نصايخكم

السلام عليكم و رحمة الله و براكتة
إن شاء الله هشتري إالنترا و بصراحة بدل الإنتظار شهور قررت إني اشتريها من معرض سيارات مباشرة
المهم الراجل قالي إن تمنها 110.000 المهم إن اللي خوفني شوية إن قالي إنة مش هيزود حاجة على تمن العربية و هستلمها على طول
كمان بيقول إنة على العكس إن تمن العربية ممكن يقل الفين جنية
بصراخة مع إنها حاجة تفرح لكن مش عارف قللت جدا لية
ممكن تقوليلي رايكم بصراحة؟؟؟ و ليا حق اقلق و لا لا؟؟؟
و إية إاللي عشان أناكد إن العربية سليمة قبل ما أدفع الفلوس
و كمان نصايحكم بصفة عامة
و شكـــــــــــــــــــــــ ـــــرا
بالمناسبة أنا عضو جديد و أتمنى أن أتعرف بناس كتير من المنتدى الرائع جدا

باشمهندس صلاح ... أولاً ... اهلاً بيك معانا فى المنتدى ...

ثانياً ... أختيار موفق إن شاء الله ... ومبروك مقدماً ...

ثالثاً ... هتلاقى هنا فى هذه المشاركة ... كل ما تريدة من تقييم للعربية ...
http://www.nilemotors.net/Forum/viewtopic.php?t=5451

رابعاً ... العربية اللي المعرض قال لسيادتك على سعرها أنهي موديل ... علشان نحكم عليها ... الالنترا فى منها حالياً ... خمس موديلات ... وأسعارهم المعلن عنهم رسمياً ... عند الوكيل ... يعنى بالحجز ... كما يلي :

1- GL M/T >>> 91,990 EGP
2- GL A/T >>> 99,990 EGP
3- GLS 1 A/T >>> 109,990 EGP
4- GLS 2 A/T >>> 117,990 EGP
5- GLS 3 A/T >>> 121,990 EGP

فحاول تعرف أنهي موديل من دول اللى الراجل عايز يبعهولك ... لأنى أنا أعتقد أنه الموديل رقم 2 ... وساعتها يبقى سعر مبالغ فيه جداً ... وحرام تدفع اكثر من ثمنها الرسمي ... المبلغ الرهيب ده ... أنا اللى أعرفه أن المعرض بياخد فى العربية بره التوكيل ... حوالى من 3,000 إلى 4,000 جنيه ... ولوحد معرفة ممكن يبقوا 2,000 جنيه ... لكن لو قصدة أن العربية اللى عايز يبعيهالك ... هيا رقم 3 ... يبقى أكيد العربية دى فيها مشكلة ... على العموم تمهل ... وحاول تدينا معلومات اكثر علشان نقدر نساعدك ...

تحياتى للجميع ...

م / حسام منير

هو النوع رقم 3

معلش سؤال تاني جة في بالي
هو ممكن تكون العربية معلهاش ضمان؟؟؟؟؟؟؟
دة ممكن؟
شكرا يا بشمهندس حسام

بصراحة ... شئ غريب أنها تكون رقم 3 ... وتكون بتتباع بالحجز ... لمدة 4 شهور ب 109,990 جنيه ... ويكون الراجل ... عايز يبيعهالك ... بنفس السعر ... ويقولك ممكن كمان أرخص ... ب ألفين جنيه من السعر المعلن فى التوكيل ... فيه حاجة غلط ... لحد دلوقتى لم يعلن فى السوق أنه في منها وارد من الخليج (هوه ده اللي بيبقى من غير ضمان) ... وده لأن اللي أعرفة أن اللي نازل منها فى الخليج حتى الأن 2000cc ... وده طبعاً صعب ينزل عندنا علشان الجمارك ...

طيب سؤل تانى لو سمحت ... حضرتك أتأكدت أزاى انها الموديل رقم 3 ... على العموم الفرق بين الموديل رقم 2 ... و الموديل رقم 3 ... بأختصار هو الاتي :

1- المرايات ... ومقابض الابواب ... بلون السيارة
2- يوجد مخدع فى الكنبة الخلفية
3- جراب النضارة
4- مصابيح الضباب الامامية
5- التكييف تاتش ... مش بكر ...
6- كاسيت اصلي

فحاول سيادتك ... أنك تتأكد من الحاجات دى ... وبعدين نكمل كلامنا ...

تحياتى للجميع ...

م / حسام منير

على فكرة كريم منير لما قابلته قالى ان فى معارض بتبيع الالنترا بتمنها (مع وجود قائمة حجز عند غبور)

لما هو كان بيلف على عربية لنفسه

مش شرط تبقى العربية معيوبة

و الله يا حسام أنا طلبت منة نفس المواصفات اللي قلت عليها
و كان ردة اللي قلتلك علية
حقيقي انا متخوف لحد الأن
و إية حكاية كريم منير؟؟
حقيقي حاجة تلغبط

محدش يقدر يضحك على حضرتك و يقولك العربية فى الضمان و هى ملهاش ضمان

دى حاجات بديهية

كريم كان بيدور على عربية له, و كانت الالنترا ضمن اختياراته, و فى معرض فى مصر الجديدة كان عارض العربية و بسعرها رغم وجود حجز

انا شايفه حاجة عادية, لأن فى تجار بيبص على المدى البعيد, و ليس الربح السريع و خلاص

يعنى لما انا الاقى معرض بيبيع فى وقت زى ده بالسعر الرسمى, اكيد هرشحه لكل اللى اعرفه, و يبقى مكسبه على المدى الطويل و سمعته اثمن من الفين او تلات الاف جنيه زيادة

طب هل ممكن مثلا تنزل عربية ع الزيرو و تكون فيها عيوبات فنية؟؟؟؟؟
و عشان كدة سعرها ينزل؟؟
و معلش سؤال تاني : هل حد ممكن يدخل عربية النترا زيرو غير غبور؟؟؟؟؟؟؟
يعني ممكن تيجي معيوبة من برة؟؟؟

الحقيقة يا دكتور / معاذ ... انا لحد الأن وأنا صدقني برضة ... لفيت كثير على المعارض ... لم أجد معرض بيبعها بالسعر الرسمي ... حتى المعرض اللى أنا بعرف صاحبة شخصياً كان هياخد الفين جنيه عن سعرها ... بس كان هيدينى وثيقة التأمين الشامل بتاعة غبور ... بالسعر اللى هوه واخدها بيه يعنى من غير مكسب ... ولكن طالما نقلاً عن سيادتك ... أن كريم منير قال كده ... يبقى أكيد لازم نصدق ...

باشمهندس صلاح ... زى ما قلت لحضرتك حتى الان لا يوجد هيونداى ألنترا الشكل الجديد ... بتتباع بره ضمان غبور ... أما كون السيارة المعروضة على سيادتك قد تكون معيوبة ... فأنا أستبعد ذلك ... ولكن برضة الحرص واجب ... لسة العربية جديدة فى السوق ... وليه واحد فاتح معرض هيعرض سمعته للخطر ... ويبيع عربية معيوبة طب ما يرجعها للوكيل أصلاً ويريح باله ...أم أن تكون العربية بها عيب فني ... فإى عربية ممكن تكون عرضة لكدة سواء من عند الوكيل أو من معرض وأى ماركة مش بس هيونداى ...ويا ما سمعنا عن عربيات بها عيوب فنية ورجعت للمصنع ...بس طبعاً مش فى مصر ... ممكن !!! ... وممكن كمان الراجل يكون مش عايز يكسب كثييرزى ما د/ معاذ قال !!! ... الحقيقة مش عارف ... الموضوع محير ... والمحير أكثر أنه ممكن يبيعها أقل من السعر الرسمي ب 2,000 جنيه ...

تحياتى للجميع ...

م / حسام منير

العربية كانت عند محمد جابر اللي في شارع اسوان ورا شارع دمشق
لو دخلت شارع دمشق عن بنزينة شل كمل علي طولواول يمين اول تقاطع لاء التاني عاتلاقية علي شمتل
هاتلاقي عندة اكتر من 30 عربية
ناس زي الفل بجد وبتشتغل في المضمون ومن غير غش
بس بيشتغل اسيوي بس مالوش في الاروبي

كان بياخدد في الالنترا الكاش 500 تقريبا
ده مايعتبرش مكسب بلغة السوق
لان عشان ادفع 90 الف اقل واج اخد فيهم 2000
اغطي ايجارات معرض وماهيات وخلافة وضرايب

شوف ولو محتاج حاجة قولي

و انت جيبت منهم فعلا يا كريم و لا اية؟

كريم جاب كورولا :)

بس هو لو كان هيجيب الالنترا كان هيتعامل معاهم عادى لأنه بيثق فيهم

طب و رايكم اية يا جماعة؟؟؟
الراجل بيقولي عايز 10.000 جنية تحت الحساب عشان يجبلي العربية لأنة مش في المعرض بتاعة دلوقتي
رأيكم اية لأني شايفها فرصة؟؟؟؟؟؟؟؟؟؟؟؟

بس اللى انا اعرفه ان العربون بيبقى الف جنيه علشان تحجز, او تربط كلام مش 10 الاف!!!

نزل معاه الفلوس (خليهم الف او اتنين) و حضرتك خد منه ما يثبت الفلوس و توكل على الله

انا اتكلمت معاة قبل كدة
و هحاول معاه تاني
بس سؤال افرض جاب العربية
و انا لقيت فيها اي حاجة. مش ممكن تروح عليا الفلوس؟

لو فيها خدش صغير حتى من حقك متستلمش

هى مش عافية او غصب عنك, بتاخد فلوسك كلها تانى

طيب اية اللي اخد بالي منة و انا بستلمها خصوصا مع الشك اللي انا فية دة
يعني اعمل اية؟
خصوصا ان العربية ع الزيرو و طبعا مستحيل اقولة اجربها مثلا!!!

حضرتك بتستلمها فى ضوء النهار علشان لو فى حكة او خدش او تطبيق فى العربية, اى حاجة من دى تبان الصبح و بالليل صعب

و تشوف العدة بتاعت العربية موجودة كلها و لا لأ

تجرب الكاسيت بتاعها, الانوار كلها

تشوف العربية من جوه حتة حتة

تمشى بيها تشوف العدادات شغالة و لا لأ (و احنا خارجين بعربية ابن خالتى ياريس زيرو كان الانوار داخل العربية و العدادات مش شغالة ( كان فيوز مكتوب على العربية يتركب لما صاحبها يستلمها)

طب بالنسبة للإلنترا تحديدا
اية الحاجات اللي بتيجي معاها عشان اشوفها؟
و هل بتختلف لو جبتها من التوكيل و لا لا؟؟؟

أستاذي الفاضل :-
بما إن الالنترا مفيهاش خليجي فمافيش فرق بينها من التوكيل أو من معرض بس هاتمم على شنطة العدة والاستبن وزي ما معاذ قالك تتمم على العربية من جوه كويس قوي ومن بره وتجرب الأنوار وتشغل التكييف ( للتأكد فقط من عمله ) وتوكل على الله وادفع عربون بس يكون 1000 أو 2000 جنيه بوصل من المعرض تتأكد من صحته ، وعند الاستلام تأكد من الضمان وضمان البطارية والكاسيت .

وألف مبروك مقدما .

السلام عليكم

شوف يا باش مهندس صلاح انا مقدر حيرتك وترددك اللي هو من وجهة نظري في محلة ودة مبلغ كبير من الفلوس والواحد مش كل يوم بيشتري عربية. لو كنت مكانك كنت حبقى محتار زيك بالظبط. ولكن لاني مش مكانك (أوعدنا يا رب بحتة ألنترا حلوة كدة) فانا حفكلا معاك بس بدون ضغوط نفسية. وبقولك قدامك حل من تلاتة:

1- تاخد معاك الاستاذ حسام (بعد إذنه) ويشوف العربية ويحكم عليها من واقع انة راكبها وعلى راي المثل (أهل مكة أعلم بشعابها)

2- تا خد فلوسك كلها وتقول للراجل صاحب المعرض الفلوس كلها اهي وانا عاوز العربية تسلمني العربية حالا تاخد فلوسك. يا كدة يا بلاش. وكمان في نقطة لو هو بيبيع بالسعر التحفة دة, لية بضاعتة مش حاضرة؟ ولو جبهالك وانت ما أخدتهاش الف واحد حياخدها يعني مش حتخسر معه في حاجة.

3- ممكن حضرتك تصبر وتروح تحجز عند غبور وتجيبها من عندهم بتمنها وبكدة توفر على نفسك القلق. وفي احتمال كبيييييييييير انهم يسلموك قبل معادك. انا كنت حجزت فرنا في شهر ابريل وقالي مش حتستلم قبل شهر يوليو وده كان تمام بالنسبة ليا,

بعد 15 يوم اتصلوا بيا وقالولي عربيتك جاهزة لان في واحد كان حاجز واعتذر! بس ساعتها مكانش معايا المبلغ واعتذرتلهم.

اتكل على الله واعمل برقم 3 علشان الشك مايبقاش في قلبك لحد ما تستلم من المعرض دة والخطر الاكبر بعد ما تستلم وتسمع اي حاجة عن عربيات مضروبة او كذا او كذا وساعتها على طول حتفكر ان عربيتك واحدة منهم!

وبالتوفيق

بكرر تاني! لو انا فهمت شخصية حضرتك صح, يبقى توكل على الله في اختيار رقم 3.

شكرا على المساعدة
بس حقيقي مش هقدر أستني المشكلة إني ظروف عملي و حياتي محتاج عربية ضروري
عشان كدة الاقتراح 3 مش هينفع

اقتباس:

---

المشاركة الأصلية كتبت بواسطة إسلام شاهين

أستاذي الفاضل :-


وألف مبروك مقدما .

---

الله يبارك فيك يا إسلام
إدعيلنا

علي فكرة يا جماعة في معارض كتير بتبيع بسعر الوكيل و ساعات أرخص حاجة بسيطة
ده أنا متأكد منه هو أكيد بيبقه ليه سعر خاص عند الوكيل مش زي الزباين العادية
اللي أكيد يخوف و أنا متأكد منه و مريت بيه بنفسي إنه ياخد منك ربط الكلام و يطلع عينك عقبال ما يجيبلك العربية و ما يعرفش يوفرك الألوان اللي إنتا عايزها و بالنسبة لحكاية العيوب فطبعا أنتا بتستلم العربية و أي عيوب ظاهرة بتبانلك مفهاش مشكلة و العيوب الخفية دي بقه أرزاق و ممكن تيجي برده حتي لو جايبها من الوكيل بس انتا معاك ضمان
رأيي الشخصي مفيش بصراحة معرض شفته محترم :lol: :lol: :lol: عشان أصلآ ظروف بلدنا مبتساعدش علي الإلتزام يبقي أفضل حل لو هتجيبها كاش تاخد فلوسك في ايدك و تلف علي المعارض اللي بقت اكتر من الرز و تشوف العربية باللون اللي انته عايزه واقفه قدام عينيك تتفق عل ثمنها وتدفع ثمنها و تخدها و تمشي

اقتباس:

---

طب بالنسبة للإلنترا تحديدا
اية الحاجات اللي بتيجي معاها عشان اشوفها؟

---

بص يا سيدى الفاضل ...

العربية بيبقى معاها الأتى :

1- صورة من ورقة الأفراج الجمركي ... ومبايعة العربية ... (دول اللى بتعرف تستخرج بيهم ... شهادة الأفراج الجمركي ) لو ما كنتش لسة أستخرجت ... يعنى ببساطة أهم حاجتين هما شهادة الأفراج الجمركي و مبايعة العربية بأسم سيادتك ... أو الشخص اللي العربية هتترخص بأسمه ...من غير دول مش هتعرف ترخص العربية

2- كتالوج العربية ... وده باللغتين الأنجليزية والعربية ... فى كتاب واحد
3- كتيب الضمان ...
4- كتيب الضمان الخاص بالكاوتش ...
5- الأستبن ... وراكب في الشاسية بتاعه العدة ... الكوريك ... ومفك ... ومفتاح العجل...
6- 2 مفتاح للعربية + 2 ريموت كنترول أصلي ...

هيا دي الحاجات اللي أنا أستلمتها مع العربية ... وبالتوفيق إن شاء الله ... وأبقى طمنا وقلنا عملت أيه ...

وأنا تحت أمرك فى أى شئ آخر ...

تحياتى للجميع ...

م / حسام منير

مين إللى قال ان الالنترا مافيهاش خليجى وانا بدور امبارح لقيت معرض بيقولى عنده خليجى المانوال ب 100 ألف فخد بالك لتكون دى كمان خليجى

اقتباس:

---

مين إللى قال ان الالنترا مافيهاش خليجى وانا بدور امبارح لقيت معرض بيقولى عنده خليجى المانوال ب 100 ألف فخد بالك لتكون دى كمان خليجى

---

بعد أذنك ياعني ... أنا اللي قولت ... وده لأنى على إتصال بوكيل هيونداي فى الامارات ... ".JUMA AL MAJID EST" ... وأكدلي أنها ما بتنزلش فى الأمارات غير 2000cc ... وأعتقد أن لو نزلت فى أى دولة خليجية 1600cc ... كانت هتنزل أيضاً فى الأمارات ... ولو ما فيش غير 2000cc ... يبقى بحسبة بسيطة هيبقى سعرها فى مصر كالأتي :
سعرها فى الامارات 50,000 درهم ... يعنى حوالي 78,000 جنيه ... + شحن حوالي 15,000 جنيه (2,500 $)

نحطلها 205.5% ... جمارك + ضريبة مبيعات مركبة على ثمن العربيه بجمركها يعنى حوالي 237,000 جنيه
يعنى العربية تقف فى الاخر بـ 330,000 جنيه ... سيادتك قولتى كام ...بتقول كام ... معلش أصلي مش سامع كويس ... :wink: :wink: :wink:

أكيد فيه حاجة غلط ... أوعى تزعل مني ... بس الحقيقة أنا مش من النوع اللي يعرف يسمع حاجة ما تدخلش دماغة ويسكت ...

وعلى فكرة العرض بتاعها معايا لو حد عايزة ...

تحياتى للجميع ...

م / حسام منير

على فكرة يا جماعة ... علشان ما حدش يفهمنى غلط ... أنا لست ضد فكرة ان ممكن الالنترا تيجى من الخليج ... لأن ببساطة موديل 2006 ... كان فيه تجار جيبينها من الخليج ... بس على فكرة برضة غبور رافض يعملها صيانة ...أنا اللى كنت عايز أقوله ... أنه حتى الأن لسة ما نزلتش مصر أى موديل قادم من الخليج ... لكن ممكن مع الأيام ينزلوا فى الخليج موديلات 1600cc ... فيعرف التجار يستوردوها بأسعار معقولة ... علشان يعرفوا يبيعوها ... لأن السعر المذكور عاليه ... 100,000 جنيه للمانيوال ... مبالغ فيه ... أذا كانت فى مصر بتتباع ب 92,000 جنيه بالضمان أشتريها انا ب 100 ألف من غير ضمان غريبة !! ... مش كده ولا أيه !!!

تحياتى للجميع ...

م / حسام منير

أولا ردا لحسام يوجد خليجي 1600 في مسقط و سعرها 4825 ريال يعني 72375 مصري و ده شامل تأمين و ترخيص و صيانة مجانية مع تغير الفلاتر و الزيت مجانا لمدة 3 سنوات أو 60 ألف كيلو أيهما أقرب مع العلم هذا سعر الأتوماتيك GL و لكن مش عارف نزلت مصر ولا لأ ثانيا أزاي من غير ضمان و انا لا أشجع شراء عربية بدون ضمان فإذا كانت العربية بالضمان (غبور) و بالسعر ده (وهذا أمر غير واقعي ) طبعا تكون فرصة ذهبية و انا لما أشتريت في أول شهر 7 لفيت مصر الجديدة و م.نصر و كان فرق السعر للأستلام الفوري أزيد 3000 جنيه للدفع الفوري ولكن ةمن ممكن يقل عند التقسيط عموما تأكد من سمعه المعرض و تأكد من الأوراق لأن المقدم عالي جدا

علي فكرة أنا مع صاحب الرأي أدفع كاش و أستلم العربية مع كامل الأوراق و الضمان و أنا عملت كده و لكن مع موزع معتمد دفعت و أستلمت العربية و الأوراق و رخصت في 4 ساعات و مبروك مقدما (في نقطة أحب أحكيها يمكن تفيد البعض في شهر يونية حدث أعصار شديد في مسقط و أحد وكلاء العربيات الكبار (تويوتا و كيا ) غرقت مخازنه و بها أكثر 1300 عربية علي الزيرو و لما سألنا حيعمل إيه بالعربيات قالوا إن شركة التأمين حتعيد تصدير العربيات لدول مثل مصر و العراق و الأردن و اليمن حيث يسهل تسويقها بأسعار مغرية ) أنا مش بخوفك و لكن أحترس عند الشراء و أعتقد كان في محولة لبيع عربيات مضروبة أيام سونامي و غبور نفي في الجرائد أي مسؤولية عنها او تصلحها في الصيانة عنده

عموما انا كل اللى قلته انى لقيتها خليجى فعلا فى معرض العربيات اللى فى داون تاون فى اسكندرية لو مش مصدقنى وبعدين موقع هيونداى موجودة فيه الهيونداى ال 1600 وبالتالى مفيش مشاكل انها تنزل فى بعض دول الخليج 1600 وعموما كده ولا كده انا مهتمتش بموضوع الخليجى لانى رافض تماما انى اشترى عربية من غير الوكيل
بس كل اللى همنى انى انصح صاحب الموضوع الاساسى انه ياخد باله ان العربية اللى بيشتريها متكونش خليجى
وشكرآ

يا أستاذ صلاح ... يا أخوانا ... أنا مقلتش انه مش هينزل منها خليجى ... بدليل أنا متأكد أنه كان فيه من موديل 2006 قادم من الخليج ... بس غبور رافض يعمل للعربيات اللي جاية مش عن طريقة ...صيانة ... وانا شايف ان دى مشكلة مع عربية لسة جديدة فى السوق كدة مش هتلاقى لها قطع غيار ... فى حالة لو أحتجت ... وده أمر وارد حدوثة ...

ثانياً ... دلوقتى أحنا عرفنا من أ/ صلاح أنه فيه فى مسقط عربيات 1600cc GL A/T ... هايل ... وسيادتك بتقول ... أن سعرها حوالى 72,000 جنيه ... طيب كمان 10,000 جنيه شحن بتأمينه ... يعنى العربية هتقف CIF ... تقريباً ب 82,000 جنيه ... طيب نجمركها ونحطلها ضريبة مبيعات ورسم تنمية موارد ...وده هيبقى حوالي من ثمنها 61% = تقريباً 50,000 جنيه ... يعنى العربية تقف فى الأخر بـ 132,000 جنيه ... وتبقى من غير ضمان هايل ... مع العلم أن مستر غبور بيبعها بـ 100,000 جنيه بالضمان ... يبقى فكرة أن حد يجيب عربية من الخليج دى هتبقى فكرة فاشلة للتاجرحالياً ... لأن سعر العربية هيبقى غالي ... ومش هيعرف يبيعها ... أو يسواقها ... والسبب أن سعر العربية عالمياً ... حالياً ... لسة غالي علشان العربية جديدة ... أدى الحكاية ...

أما الأخ KiNgMaX ... صدقنى أنا مش مكذبك .... بس الفكرة أني مش مقتنع ... يعنى أزاى العربية المانيوال بتتباع بضمان غبور ... بـ 92,000 جنيه ... والمعرض قال لسيادتك عنده خليجى مانيوال بـ 100,000 جنيه ومن غير ضمان ... طيب أنت راجل بتفكر تشترى ... هتعمل ايه !!! ... أكيد هتشترى الأرخص ... اللي بالضمان ... هوه ده اللي أنا عايز أقوله ... أنه لسة شوية على الألنترا القادمة من الخليج أنها تبتدى تتباع فى مصر ...

وشكراً ليكم جميعاً ... وأسف للأطاله ...

م / حسام منير

حقيقي أنا متشكر جدا يا جماعة
م/حسام...كينج ماكس...صلاح....معاذ....جود واف....أحمد أنور....إسلام شاهين.........كريم منير

حقيقي تعاون و ردود مساعدة كبيرة جدا

أنا إن شاء الله هروح للمعرض بكرة و هتناقش معاه في كل الموضوع اللي ذكرتموها و هشوف ردة إية
و عن حكاية عمان و تسونامي ... صعب يكون معاها ورق غبور مثلا
ثانيا يا جماعة العربية لو مكنتش بالضمان حقيقي انا مش هجيبها ....مفيش حاجة مضمونة الأيام دة !!!! مش كدة و لا إية؟؟؟!!!
كمان مش خوافق على موضوع 10000 حنية دة و هديلة أقل
بالنسبة للون .... الراجل كان صريح معايا و سألني إني أحددلة لونين عشان لو ملقاش واحد يحيب التاني (بالمناسبة أنا عايز أسود .. و إخترت كمان الفيراني الغامق)

لكن سؤال: هل في حاجة محددة ممكن تكون ظاهرة في العربية تعرفني إن كان جايبها من التوكيل و لا من برة (تسجيل/كاوتش/....) ؟؟؟؟

ردا علي أخي العزيز حسام طبعا من غير المجدي شراء عربية من الخليج و تنزلها في نفس العام مصر لأن السعر بالطبع حيكون لصالح المصري أولا لأن كما ذكرت إن السعر بيكون شامل مميزات أخري غير سعر العربية الأساسي مثل التأمين و الترخيص و الصيانة للعربية لمدة تتراوح من 3 إلي5 سنوات لذلك للأفراد غير مجدي الشراء من الخليج و لكن بالنسبة للتجار الأمر مختلف لأنه السعر بيكون ثمن السيارة بدون كل المميزات و أعتقد ده بيحصل مع اللانسر أما بالنسبة للشحن فأنا كنت سألت هذا العام من دبي إلي مصر شحن بري تكلف 250 ريال حوالي 4000 جنية مصري المهم أنا لا أشجع تنزيل عربية من الخليج لمصر و معلومة أخري الألنترا المصر فيها أختيارات و مواصفات أعلي من الألنترا العماني و الأختيارات الوحيدة هناك إنه يوجد 1600 و2000 و لكن الكل GL و حتي لايوجد زرار في الباب بتاع السنتر لوك و الكاسيت LG ,CD, MP3 و كاسيت ولكن في DIN ,واحد أنا آسف إني طولت و لكن حبيت أضيف معلومة قد تفيد أحد و بالنسبة للون أنا أفضل الرمادي الغامق عن الأسود بسبب نظافة الجو عندنا و عموما عربيتي شامبين و التراب مش بيبان فيها و مبروك مرة أخري

أخواتي الإثنين شغالين في دبي يا أ/صلاح و كل مرة يفكروا ينزلوا عربيات ليهم مصر ، يحسبوها يلاقوا إنهم يجيبوها من مصر أفضل أو أقل حاجة بسيطة لا تستحق العناء
بس كنت سمعت إن أو في إحتمال إنهم يسمحوا للمصري اللي بيعمل في الخارج ينزل عربية واحدة لإستخدامه الشخصي بدون جمارك و الله أعلم

يعني رأيكم يا جماعة لو إتأكدت إنها مش خليجي و معاها الضمان إني أتوكل على الله و أشتريها من عند الراجل دة؟؟؟؟؟؟؟؟؟؟؟؟؟

يا جماعة رحت للراجل و لاما الكلام دخل في الجد ......غير رأية و كلامة تماما !!!!!!!!!
و فعلا زود على تمن العربية
بصراحة انا إدايقت و قررت إني مش هتعامل معاة أصلا !!!!!!!!

طبعا لا تتعامل معاه و كما قلت لك عليك بموزع معتمد و هم كثيرين و لكن مضمونين