أزاى تتصرف إذا وقعت حادثة لعربيتك؟

**خالد** · 09-01-2009 11:44 AM

أزاى تتصرف إذا وقعت حادثة لعربيتك؟
أمبارح خبطتين فى العربية واحدة تحت البيت لقيت الأكصدام مخبوط خبطة جامدة سألت الجيران قالوا كانوا بيزقوا عربية وخبطت فى عربيتك
قلت الحمد لله بسيطة ، وبالليل خرجت لواجب عزاء وعند مزلقان عين شمس عربية ميكروباص رمسيس دخلت غلط وكسرت الإشارة، كان سايقها ولد صغير حالى 16 سنة طبعاً من غير رخصة وقاعد جنب منه قريبه ، كان ماشى فى أتجاهه لمحه فرد الشرطة زعقله أرجع أرجع الولد من الخضة رجع بسرعة لورا من غير مايبص وراه راح مدمر الباب بتاعى
نزلت من العربية ، وبسرعة البرق فردين الشرطة أمين وعريف شرطة كانوا جوة العربية الميكروباص نزلوا منها وبيشيلوا فى جيوبهم الفلوس اللى خدوها من السواق
لقيتهم بيقولو أركن على جنب علشان الطريق ركنت
بعد كده هما أصبحوا ملهمش دعوة بأى حاجة خالص أكلمهم مايردوش عليا وعملوا أنهم مشغولين فى تنظيم المرور
وبدأت المفاوضاتبينى وبين السواق اللى أنكر طبعاً أن الولد الصغير هوه اللى كان سايق برغم أعتراف الولد نفسه
أنتهت المفاوضات أن نوديها لسمكرى يصلحها ويتمن القيمة
وطبعاً حوارات وكلام من السواق الكبير الذى يبدو أنه متعلم ومؤهل عالى ولكن طبيعة بعض الأشخاص الكدب والمراوغة والكلام الكتير وقلة الضمير
وفى النهاية دفع 50 جنيه بالعافية

السؤال : أزاى أـصرف فى المواقف دى وأعمل أيه هل أتصل بالشرطة وعلى رقم كام من الموبيل ولا أعمل محضر؟ هأتجنن مأخدش حقى صح
السؤال التانى:
العربية متأمن عليها ، أعمل أيه علشان أصلحها
وحسبى الله ونعم الوكيل فى كل الشرطة والسواقين فى مصر

**sasatony** · 09-01-2009 12:14 PM

الحادثة الاولانية قدر الله وماشاء فعل
اما التانية دي انا بجد لو مكانك كنت اخليه يصلحها علي حسابه يااما اعمله محضر في الشرطة عشان التامين يصلحها علي حسابه وكفاية انك تقول حسبي الله ونعمة الوكيل علي الراجل بس
وعلي العموم الحمدلله انها جت في العربية وانت محصلكش حاجة

**R A N A** · 09-01-2009 03:22 PM

ربنا يعوض عليك
اصلا زلقان عين شمس ده لعنة بجد .
خصوصا بعد القرف اللي بيعملوه فيه والحجارة اللي حاطينها دي انا مش فاهمة هما بيصلحوه وهايعدلوا اتجاهاته فعلا ولا حاطين الحجارة دي عشان يزودوا مشاكله اكتر ولا ايه بس؟
بجد اكتر مكان كنت بعاني من السواقة فيه هو المكان ده عايز يتدمر ويتشال ويتم ازالته تماما ويتعمل من اول وجديد بجد.
انا مش هاقدر افيدك بصراحة في موضوع الشرطة لان حضرتك بتقول امين الشرطة كان واقف ومعملش حاجة يبقي لو اتصلت بالشرطة تفتكر هاييجوا ولا يعملوا حاجة اصلا
منهم لله بجد وربنا يعوض عليك وتصلحها على حساب التأمين وترجع احسن من الأول ان شاء الله.
عموما الخبطة لو بسيطة ومش هاتتكلف يبقي التأمين المفروض يعملها على حسابه من غير محضر لاني اسمع انهم بيحتاجوا المحضر بس في حالة لو الخبطة هاتتكلف اكتر من 5 الاف جنيه لكن اقل من كده بيمشي عادي من غير محضر بس حضرتك كلمهم وخليهم يعملوا معاينة وقولنا ايه الأخبار.

**bassam266** · 09-01-2009 04:39 PM

اولا الحمد الله على سلامتك و كويس انها جت فى العربيه قدر الله و ما شاء فعل.

ثانيا لما تعمل حادثه بعربيتك اول حاجه لازم العربيات متتحركش من مكانها حتى لو حتوقف الصحراوى نفسه و بعدين تكلم النجده تقريبا 122 من اىتليفون و بعدين تقولهم اللى حصل حيبعتولك معاينه و دى عباره عن امين شرطه و عسكرى او ضابط و امين شرطه حيعملوامعاينه و يشوفوا مين اللى غلطان ويتعمل محضر و قضيه الخ بالنسبه للتأمين حتاخد رقم المحضر و صورته لو عرفت تجيبها و ترحلهم حيطلعوا معاك معاينه تصور العربيه و بعدين تصلحها على حسابك فى التوكيل و توديلهم الفاتوره و حسب التأمين بتاعك اما حيصرفولك شيك بالمبلغ كله او نسبه منه و يطلعوا معاك معاينه تانى تصور العربيه بعد التصليح.

و الحمد لله على سلامتك و اللى يجى فى الحديد فى داهيه.

**ringoo84** · 09-01-2009 04:44 PM

ربنا يعوض عليك والحمد لله ان حضرتك سليم والف حمد لله على السلامه ...........

**Noha-Esmat** · 09-01-2009 05:12 PM

المشاركة الأصلية كتبت بواسطة bassam266

اولا الحمد الله على سلامتك و كويس انها جت فى العربيه قدر الله و ما شاء فعل.

ثانيا لما تعمل حادثه بعربيتك اول حاجه لازم العربيات متتحركش من مكانها حتى لو حتوقف الصحراوى نفسه و بعدين تكلم النجده تقريبا 122 من اىتليفون و بعدين تقولهم اللى حصل حيبعتولك معاينه و دى عباره عن امين شرطه و عسكرى او ضابط و امين شرطه حيعملوامعاينه و يشوفوا مين اللى غلطان ويتعمل محضر و قضيه الخ بالنسبه للتأمين حتاخد رقم المحضر و صورته لو عرفت تجيبها و ترحلهم حيطلعوا معاك معاينه تصور العربيه و بعدين تصلحها على حسابك فى التوكيل و توديلهم الفاتوره و حسب التأمين بتاعك اما حيصرفولك شيك بالمبلغ كله او نسبه منه و يطلعوا معاك معاينه تانى تصور العربيه بعد التصليح.

و الحمد لله على سلامتك و اللى يجى فى الحديد فى داهيه.

طيب لو اللى خبط العربية سابنى و مشى ايه الحل ؟؟ اخد ساعتها نمرة العربية بتاعته و خلاص ؟؟؟

**bee** · 09-01-2009 05:41 PM

موضوع الحوادث ده التصرف فيه لازم تكون في بلد محترمة عشان تتصرف .. بالنسبة لبلدنا (المحترمة):

لو مأمن طبعا تتصل بالنجدة وتعمل محضر وهتدفع 50 جنيه وهو 50 جنيه زيهم وتاخد صورة المحضر عشان التأمين يصلح ..

غير كده رأيي الشخصي ترجع مارشيدير وتدخل فيه تضيعه وبس على كده على الاقل لما تصلح تكون خليته هو كمان هيصلح لان للاسف الشعب ده باررررررررد مش كله طبعا بس اغلب سواقين الميكروباصات كده
وربنا ما يجيب لحد حاجة وحشة

**Mohamed_Ibiza** · 09-01-2009 06:00 PM

محدش بياخد ولا حق ولا باطل في موضوع الحوادث ده

احمد ربنا انك اخدت 50 جنيه

احسن حاجة ان الشعب المصري اغلبه بيتعامل مع الحوادث انها قضاء وقدر

انا عارف طبعا ان كل حاجة قضاء وقدر لكن لو كل واحد احترم نفسه على الاقل نسبة الحوادث هتقل

عموما حسبي الله ونعم الوكيل وحمد الله على سلامتك ياباشا كويس انها بتيجي في الحديد

**خالد** · 09-01-2009 10:06 PM

بجد ألف ألف شكر ياجماعة والله خففتوا عليا اللى حصل أنا حاسس أنكم أخواتى بجد ربنا يبارك فيكم كلكم ويحفظكم من كل سوء
إن شاء الله هاأروح شركة التأمين بكره ( الجمعية المصرية للتأمين التعاونى) فى العباسية ونشوف هايقولوا أيه وأحكيلكم على اللى حصل
على فكرة أنا ممكن أعملها على حسابى وأخلص وهية بسيطة إن شاء الله بس عايز أشوف وأجرب مواضيع التأمين وأخد فكرة عن الإجراءات واهى تبقى تجربة فعلية

**Samir Elshahawy** · 10-01-2009 01:26 AM

ثانيا لما تعمل حادثه بعربيتك اول حاجه لازم العربيات متتحركش من مكانها حتى لو حتوقف الصحراوى نفسه و بعدين تكلم النجده تقريبا 122 من اىتليفون و بعدين تقولهم اللى حصل حيبعتولك معاينه و دى عباره عن امين شرطه و عسكرى او ضابط و امين شرطه حيعملوامعاينه و يشوفوا مين اللى غلطان ويتعمل محضر و قضيه الخ بالنسبه للتأمين حتاخد رقم المحضر و صورته لو عرفت تجيبها و ترحلهم حيطلعوا معاك معاينه تصور العربيه و بعدين تصلحها على حسابك فى التوكيل و توديلهم الفاتوره و حسب التأمين بتاعك اما حيصرفولك شيك بالمبلغ كله او نسبه منه و يطلعوا معاك معاينه تانى تصور العربيه بعد التصليح.

الكلام ده ممكن يكون في دولة شوكوبونجو مش في مصر

ياسيدي انا عملت حادثة من حوالي شهر علي طريق السويس أمام الكمين و العربية النقل اللي تسببت في الحادثة هربت بسرعة اكتر من 120 كم/ساعة و مع ذلك :
- السادة الظباط و الامناء اللي في الكمين أنكروا رؤيتهم للحادث كله
- رفضوا يعملوا محضر و معاينة

و لكني أصريت علي أن يأتي معي أمين شرطة الي أقرب قسم أو نقطة شرطة لعمل محضر و معاينة لتسليمها في شركة التأمين

ياسيدي الفاضل حمد لله علي سلامتك و ربنا يعوض عليك و يسترها معاك و معانا