الموضوع: -:{ تقرير عن صيانه ال80,000 لبروتون واجا بأسعار قطع الغيار و الخامات }:-

السلام عليكم و رحمة الله و بركاته
حانت ساعة الصيانه

و الحقيقه هى بتبقى ساعه مزعجه و مستنزفه للاموال , لكن لابد منها .
الحمد لله عملتها انهارده و الموضوع خد وقت من الساعة 1 و نص : الساعه 6 و نص .
الموضوع بدأ معايا من حوالى اسبوع ... قرائه العداد كانت 79000 الف

و عملت خطه للصيانه : حشترى قطع الغيار منين , حجيب انهى نوع زيوت , و حعمل الصيانه فين , الموضوع حيتكلف كام " و طبعا الميزانيه باظط " .

و قبل اى حاجه ظبط الزوايا من يومين فى مركز بريدجستون مدينه نصر .
غسلت الموتور " جاف " و الشاسيه فى الوطنيه . علاشان اسهل على الى حيشتغل فى العربيه و يبقى الموتور نضيف قدامه .

بالنسبه لقطع الغيار :-
سير الكاتينه و بليه الشداد :
انا فضلت اجيب سير الكاتينه و بليه الشداد ميتسوبيشى من مركز بيع قطع الغيار فى شارع السودان اولا لانهم اكتر مكان مضمون , ثانيا لان سعرهم كان معقول جدا ." و طبعا كل الشكر للمهندس طارق زويل ربنا يباركله لانه عرفنى الاسعار و عنوان و تلفون المركز و كل التفاصبل الى كنت محتاجها " .

تيل الفرامل :
الحقيقه ديه الحاجه الوحيده الى جبتها من توكيل بروتون عز العرب لان تيل الفرامل بالذات فى منه انواع كتير مضروبه و بيصفر و بيخلص بسرعه .و اضمن حاجه تيل الفرامل الاصلى " و بالمناسبه هو مش زى بتاع الانسر " .

السيور الخارجيه و الفلاتر :
جبتهم من محل المدينه " مصطفى على " فى شارع دمشق لانى اتعاملت معاه كذا مره و هو الحقيقه انسان محترم جدا .

الزيوت و سائل التبريد :
انا دايما بثق فى منتجات شل و على هذا الاساس قولت اجيب كل الزيوت من شل " زيت موتور - فتيس - فرامل - باور " و سائل التبريد كمان شل .

البوجيهات :
جبتها من فرع بيع معتمد ل شركة التوفيق وكيل NGK فى السيده زينب و هما من نوعيه ايريديوم اى اكس و المفروض انهم بيعيشو 80,000 كيلو


اسعار قطع الغيار و الخامات و المصنعيات :-

1- غسيل موتور + شاسيه 40 جنيه
2- ظبط زوايا امامى - خلفى 50 جنيه
3- سير كاتينه ميتسوبيشى " Gates Unitta "- كود -1145a051- . بـ 217 جنيه
4- بليه شداد كاتينه ميتسوبيشى كود -MD356509- بـ 261 جنيه .
5- سير تكيف - باور صن يابانى 45 جنيه .
6- سير دينامو صن يابانى 35 جنيه .
7- فلتر بنزين Alco بـ 40 جنيه .
8- فلتر زيت ميتسوبيشى 30 جنيه .
9- تيل فرامل امامى اصلى " Mintye " بـ200 جنيه .
10-بوجيهات NGK ايريديوم 150 جنيه .
11- زيت موتور شيل هيلكس الترا 230 جنيه .
12 - 3 لتر زيت فتيس شيل سبايركس 37,5 جنيه .
13- 1 لتر زيت باور شيل دوناكس تى جى 24 جنيه .
14- نص لتر زيت فرامل شيل دوت 4 بـ 13,5 جنيه .
15- سائل تبريد شيل كولنت 5 لتر 45 جنيه .
16- مصنعيه تركيب 250 جنيه بالفصال بعد 300 جنيه و طبعا الراجل عمل معايا واجب لانه فعلا عمل مجهود كبير و الشغل خد وقت كتير .

الاجمالى = 1668 جنيه و طبعا الميزانيه ضربت منى جدا .

* مغيرتش فلتر الهواء لان الموجود كان حالته جيده و اصلى " عليه بادج بروتون " و تمنه فى التوكيل 180 جنيه .. و كان فى منه نوع كورى زى الاصلى ب 60 جنيه فى محل المدينه .بس طلاما حالته كويسه استحرمت اغيره خصوصا انه اصلى و حالته كويسه .

*الحاجات الى لحظتها بعد الصيانه ..

- سير الكاتينه الى طالع من الموتور ماشاء الله زى الفل و ممكن يستحمل ل120,000 كيلو مش 100,000 بس . حــــــرام حد يغيره على 60,000 يبقى بيرمى فلوس فى الارض ." ححاول اصوره و ارفع الصوره علاشان تحكمو بنفسكو " .

- بليه الشداد نفس الوضع بحاله جيده جدا و مفهاش صوت دأر او خشونه

- تيل الفرامل الامامى بالمقارنه مع التيل الجديد كان لسه فيه تقريبا 35 % و كان ممكن يمشى كمان 5,000 كيلو .

- سير الدينامو كان مش اصلى و مضروب !!! صاحب السياره الى قبلى غيره و تقريبا مخدش باله من النقطه ديه سير الباور كان دينسو و عليه بادج بروتون "متغيرش من الزيرو " و كان حالته جيده .

- للاسف خرطوم الفايظ بتاع تنك البنزين باظ و بيسرب بنزين " و طبعا ديه مشكله خطيره و اتعكننت بسببها جدا " لاحظت الموضوع بعد مافولت العربيه بعد ما خلصت الشغل لقيت البنزين بيتدلدق من تحت العربيه فى منظر مؤسف و اتضح ان الخرطوم بايظ و محتاج يتغير و مش موجود الى فى التوكيل و الله اعلم بتمنه كام .

- فرش الباب الشمال اتوسخ و اضطريت اشترى منظف للفرش ب 30 جنيه و لسه منظفتوش .

بس الحمد لله اليوم خلص على خير بعد ماكنت مقلق احسن يحصل حاجه او حاجه تبوظ , الحمد لله .

و لو حد عنده استفسار مايترددش .

المشاركة الأصلية كتبت بواسطة Abouelela

طب قللي يابرنس .. أنا فحصت 80000 في التوكيل في عز العرب ودفعت تقريبا المبلغ إللي انت قلت عليه أو حوالي 2000 من غير تيل الفرامل ولا فلتر التكييف .. لكن أنا دلوقتي داخل علي 90000 .. وعندى مشكلة أن في ورة في العجلة الأمامية اليمني .. وقالولي بلية السرة .. ومش ناوى أعملها في التوكيل بصراحة فجبت البلية من أولاد منصور بشارع المحطة عملت 120 جنيه وتيل الفرامل الأمامي عمل حوالي 120 جنيه تقريبا علي ما أتذكر .. الفكرة إني لو حبي أعمل الكلام ده بره التوكيل أعمله فين .. ومين إللي ممكن يبقي مضمون .. فهل ممكن ترد عليه .. وكل سنة وأنتم طيبين .. وبرضه بأعتذر علي التعليق المتأخر ..

فى ورشه فى اخر فيصل بتشتغل فى بروتون بكل موديلاتها وده رقم م كريم 0105885638 كلمه و حيشرحلك المكان بالظبط .

بس قبل ماتفتح فى العجله اتأكد ان المشكله مشكله بليه اكشف على كل العجل الاول .... علاشان انا غيرت البليه الشمال و العيب مكانش منها.

المشاركة الأصلية كتبت بواسطة Abouelela

وعلي فكرة في حاجه أسمها جوانات علبة الدريكسيون أو أفيز علبة الدريكسيون بيتغير من تحت العربية .. وإلا الراجل الميكانيكي بيسرح بي زى ماقالولي في التوكيل بعد ما سألتهم ..

لا كلام الميكانيكى مظبوط .... اساسا قفايز الدركسيون فى الواجا بتبوظ بسرعه بسبب الجنط العريض ... انا غيرتهم فى عربيتى من فتره ... هاتهم من التوكيل لانك مش حتلاقيهم بره .

القفايز السليمه بيفرقو جدا فى ثبات العربيه فى الملفات ... لانهم لما بيبوظو بيخلو علبه الدركسيون مش ثابته والعربيه تروح و تيجى فى الملفات خصوصا لو فى عالى و واطى فى الطريق .

و ماتسمعش كلام اى حد انه يزود حته كاوتش فوق الافيز .... الكلام ده غلط .

و اسأل عليهم بره " محلات ميتسوبيشى " لانها نفس افايز لانسر بومه .


* عندى ليك سؤال . بعد 90 الف كيلو ايه رأيك فى العربيه بشكل عام ... ايه الحاجه الى عاجبك / مش عجباك .

و كل سنه و انت طيب يا باشا

المشاركة الأصلية كتبت بواسطة meramor81

الف مبروك الصيانه يامهاب
ومعلشى العربيات اى حاجه صغيره فيها بتكلف المهم انها تكون كويسه معاك ان شاء الله .
وتقرير وافى من رجل له خبره واسعه فى مجال السيارات عموما
انا شخصيا باستفاد جداااااا منك ربنا يحميك ويحمى عربيتك
وعقبال مانحتفل بالصيانه المليونيه

ربنا يخليكى يا ميرامورا متشكر جدا على كلامك الجميل

انا خبرتى على قدى مهياش كبيره ولا حاجه " بجد مش تواضع يعنى.. " بس لو فى حاجه جربتها او عرفتها بشارك بيها باقى الناس علاشان يستفيدو بيها زى ما استفد منهم .

مره تانيه بشكرك على الكلام الجميل , ربنا يباركلك فى عربيتك و يحفظهالك

كل عام و انت و الاسره الكريمه بخير .