السلام عليكم
اعرفكم بنفسي عالماشي كدة
انا سندريللا ( مشوها كدة )
خريجة اكتوبر 2008 ( معلش بقى ظروف )
تجارة عين شمس شعبة محاسبة ( اجدع ناس )

مشكلتي بقى كالتالي :

انا من ساعة ما اتخرجت و اتحالت على المعاش و انا بعاني من فراغ قاااااااااااتل
طبعا هموت و اشتغل في مجالي
عشان انا اصلا بعشق مجال المحاسبة و الحسابات و الارقام
هتقولوا مفيش شغل و هو حد لاقي ؟.
اقول لكم مش دي المشكله
لما ابقى ادور ومالاقيش يبقى يفرجها ربنا
المشكله بقى اني مكتوب كتابي
و البيه جوزي مش عايزني اشتغل ولا اتعامل مع العالم الخارجي
و انا اقسم بالله قرفت على اخري و حاسة انى هيجرالي حاجة من الفراغ اللي انا فيه
و نسيت اقوللكم اني سيادتي كنت بشتغل مصممة مواقع web designer على النت
عندي موقع بسوق منه تصاميمي بس زهقت جداااااااااااا و مليت موضوع التصميم ده
فعلا مش عايزة اعمل اي حاجة في حياتي غير انى اشتغل في المحاسبة
و عملت مشاكل كتيرة اوى مع البيه في الموضوع ده و كانت هتوصل ل.......
بس اتنازلت لانى مقدرش اخسره
قلت يا بت يا سندريللا خليكي انتى العاقله
ففكرت انى احضر اعمل دبلومة او اي حاجة و خلاص تتعلق بالمحاسبة
برضه سعادته مرضيش
قلت طب اروح اتعلم السواقه و احجز في مكان تكون المدربة فيه واحدة ست
برضه مرضييييييييييش
طب اخرج مع اصحابي ؟
ده انا ممكن يعدي عليا اسبوعين مشوفش الشارع
كل ما نتفق انا و اصحابي لازم حد يخلف وعده و منتقابلش ( ده لو البيه بتاعي وافق اصلا )
لانه اغلب الاوقات مبيرضاش
حاسه انى بقيت عندي 70 سنة
و هو اصلا سايبني و مسافر بره مصر بيشتغل
و عندي حالة فراغ غير عاااااااااااااااااااااادي
و انا خايفة على نفسي من الفراغ ده
و مش لاقيه اي حل
بس الله يخليكوا بلاش موضوع اصبري .. استحمليه .. ده بيخاف عليكي .. ده بيحافظ عليكي .. ............... الخ
انا عايزة حل جذري

شوروا عليا اعمل ايه قبل ما ارتكب جناية