خبطت الرفرف الشمال و فانوس الأشاره :(

السلام عليكم ياشباب عاملين ايه ؟ يارب يكون كله تمام

الحقيقه ونا ماشى امبارح واحد ابن ناس (عربيه نص نقل بوكس من بتاعت المواصلات ) فرمل فى نص الشارع فجأه و مفيش نور فرامل و لا غيره حاولت اخده من ع اليمين (عارف انه غلط بس كان الحل الوحيد ساعتها ) فلقيت 3 بنات طلعو مره واحده عاليمين و لبست فيه

اللى حصل الفانوس بتاع الأشاره اللى قدام الشمال اتكسر والرفرف اتنى و الباب مبقاش يتفتح منه (الباب الشمال )

طبعا انا غلطان لأنى مكنتش سايب مسافه كفايه بينا بس اللى حصل بقى

عديت على سمكرى سامع عنه كلام كويس و سبتها معاه امبارح و قالى على النهرده و كلمته من شويه قالى هتجهز ع العصر كده ,

الموضوع عاوز اسأل حاجه زى كده تتكلف كام مع السمكرى ؟؟ وايه الشغل المتوقع يعمله عشان قالى ممكن تكون الخبطه أثرت ع الحوض و بتاع ؟ وسعر فانوس الأشاره كام ؟

انا قلت اسالكو الأول عشان ميتضحكش عليا

و شكرا ليكو مقدما و ربنا يكفينا شر الطريق جميعا ان شاء الله

انا رحت و جبت منه العربيه خلاص

اللى حصل كالتالى

اضطر يعمل فيها حتتين ع السخن ,, الأولى مكان التنيه بتاعت الرفرف كان طالع لبره جامد,, و التانيه فوق مكان فانوس الأشاره كانت بقت شكل تجويف دايره (واخده شكل عمود العربيه لما لزقت فيه )

خلص على 150 ,, بس العربيه كانت الخبطه مأثره عليها من جوه الحوض و عمل شغل جوه و فى الأكصدام و ظبط حجات تانيه

معقول اللى اتدفع ده ولا ايه ؟ هو كان عاوز 200 + تمن شويه حجات تانيه عملها

ايه الأراء ؟

ألف سلامة يا باشا
معلش ما تزعلش نفسك و سلامتك بالدنيا
انا اعتقد لو كانت الخبطة زي ما انت بتقول 200 جنيه مش كتيير
تحياتي
و ربنا يحافظلك عليها يا باشا

الحمد لله ياباشا على كل حاجه الحمد لله على انها جت على اد كده والحمد لله على رجوعك لينا بالسلامة على خير وربنا يكفيك شرها وبالنسبة للتكلفة معقوله بالنسبة لفهمى تقريبا للخبطة بس العربيه دى 2009 ؟؟؟

حمدا الله على سلامتك
وفداك كل شىء

متشكر يا zalpany و يا اسلام و يا اوزى على ردودكو و يكفينا جميعا شر الطريق ,,,

ااه يا اوزى العربيه 2009