التفاوت فى اسعار بيع و شراء السيارات

**diesel** · 11-01-2009 03:07 PM

يا اخوانا التفاوت ده فعلا موجود فى السوق
فى ناس بتبيع على اسعار عاليه و ناس بتبيع على اسعار قليله
و دول موجودين فعلا و دول موجودين
و فى ناس بتطلب سعر فوق و بتلاقى برضه اللى بيشترى
و فى ناس بتعرض تشترى على سعر قليل و تلاقى البياع موافق
ده مش بخس للسعر

اهم حاجه هى شطاره البايع او الشارى
الموضوع مش نصب لان مفيش حد بيغمى عين حد و ياخد منه الفلوس
لكن هو فى الاخر رضاء من الطرفين
يعنى البايع راضى عن الفلوس اللى هياخدها لعده اسباب كتير ( ميعرفش ثمنها فى السوق - شايف ان ده سعرها الحقيقى - فى حاجات تعباه فى السياره و عايز يبيع باى تمن و يخلص - محتاج الفلوس - .... إلخ )
او الطرف اللى شارى عجبته العربيه و مصمم انه ياخدها برضه لاسباب كتير ( ميعرفش ثمنها الحقيقى فى السوق - اول مره يشترى عربيه و فاكر انها اخر عربيه ممكن يشتريها و لو مخدهاش مش هيعرف يشترى تانى - محتاج سياره بسرعه و مش قادر يصبر - .... إلخ )

و دايما الشارى بيدور على الاخ المكتوب بين الاقواس و كذلك البايع بيدور على الاخ المكتوب بين الاقواس

علشان كده واضح التفاوت فى الاسعار
و ارجو من الجميع عدم الخروج عن الالفاظ اللائقه
علشان اللى بيعرض عربيته دايما عايز اعلى سعر
و اللى عايز يشترى دايما عايز اقل سعر
و لما يكون الطبيعى مثلا
سياره متوسط سعرها حاليا بالسوق من 35 الى 40
و تلاقى واحد عامل اعلان عايز يبيع سياره زيها ب 45
الطبيعى ان اللى عايز يشترى يقول 30
تلاقى الناس كلها داخله تقوله و لا تبخسوا الاشياء
و ايه الاسعار دى و هاتلى عربيه بالسعر ده
انتوا ليه نسيتوا ان هو لما كتب كده كتبه علشان الاتى
1- الاستاذ اللى عايز يبيع طالب 45 علشان فى حاله الخساره النهائيه فى التفاوض يبيع باعلى سعر لهذه العربيه و هو 40 الف
2- الاستاذ اللى كتب انه عايز يشترى على 30 طتب كده علشان لما يتفاوض مع البائع يشترى على 35 الف او اعلى شويه
يعنى فى النهايه وصلنا لسعر السوق

لكن للأسف الواضح هنا ان كل واحد عايز يبيع
مش عايز حد بيفهم - لو طلع حد بيفهم او بيحاول يتفاوض يبقى عالطول تاجر - و يتقلب المنتدى كله عليه و على التجار و احنا مش بنحب التجار
ايه يا عم فيه ايه مالهم التجار ناس بتبيع و تشترى عايز تبيع قول على سعرك و هما يقولوا سعرهم و لو اتفقتوا خير و بركه
لكن تلاقى واحد يقول انا مش هبيع لتاجر علشان هيكسب من ورايا
انا خلال 10 سنوات غيرت 3 عربيات لحسن تفتكروا انى تاجر و لا حاجه
و على فكره اللى اشتروا الثلاثه عربيات تجار
بس ادونى السعر اللى انا عاوزه
ايه بقه المشكله
اقولكم انا - تاجر يعنى هيكسب من ورايا 500 جنيه و لا الف جنيه - انا اخدهم انا احسن
خلاص سيب شغلك و خليك قاعد جنب عربيتك لحد ما تبعها و كفايه القلق اللى هتبقى فيه و لخبطه حياتك
و كفايه كده
واحد بيقول شويه كلام كتير من كتر الكبت اللى عنده

**kasnermo** · 11-01-2009 04:01 PM

كلامك صح وحقيقى وللاسف الاعضاء اللى بيعلقوا بالردود اللى حضرتك ذكرتها ما مروش بتجارب البيع والشراء المزعجه ، وناسيين ان احنا فى مصر ومافيش حاجه اسمها ( fixed price ) او سعر نهائى واحنا كمصريين بنستمتع بالفصال وفاكرينه شطارة وبننسى او بنعمل مش واخدين بالنا ان اللى عاوز يبيع او مش عاجبه السعر مش بينزل معاك علشان انت شاطر او علشان سواد عيونك .. بل هو راضى والا ما كانش باع اصلا .

**A.Saad** · 11-01-2009 06:10 PM

اللى اكتشفته ان اى حاجة فى مصر فيها فصال
حتى الكتب فى المكتبات المشهورة وعن تجربة

**ahmed2304** · 11-01-2009 06:53 PM

يا جماعه كل كلامكم صح بس الحرام بخس السعر ، انما البيع و شراء احنا فى مصر مبنعرفش غير الفهلوة فى الاتنين و فكل حاجة

**MohabSaeed** · 11-01-2009 11:54 PM

طيب ممكن اشارك برأيى المتواضع .

واحد طالب رقم مبالغ فيه فى عربيته ... من الاساس ارد عليه ليه ؟؟
و لو هو طالب 45 و انا قولتله 30 هل حيوافق مثلا ؟؟ او من الاساس بقى فى مجال للتفواض " التفاوض بيبقى فى حدود المعقول بالنسبه لمبلغ المطلوب " يعنى واحد طالب 50,000 التفاوض بيكون من 1 : 5000 جنيه بالكتير ... مش انزل 15 .. 20الف جنيه و اقول اصلى بأتفاوض
كلو كوم و الناس الى بترد و تقول ... اشترى منك ب 25 و هو مثلا يكون طالب 50 الف

يا جماعه الى عاوز يشترى عربيه بجد و هو اساسا مش تاجر " و شايف ان التمن المطلوب فى العربيه مبالغ " ميردش فى الموضوع " و خلوها لصاحبها
لكن بلاش الاسلوب المتبع بتاع السوق ده " انا حدفع كذا تخلص !! , انا حدفع 20 و ال50 حقسطهم , انا مستعد اجيبلك عربيه بنص التمن الى انتا عارضه " , (( الحوارات ديه مابتكلش دلوقتى ))

الى عاوز يبيع بجد اكيد حيطلب تمن السوق " مش اقل " , و لو طلب تمن مبالغ يبقى هو مش عاوز يبيع . فخلاص سبوله عربيته و ريحوه و ريحونا و ريحو نفسكو !!!!!! بلاش الردود الاستفزازيه و ردود تجار سوق الجمعه .

و الى عاوز يشترى بجد اكيد لو شايف ان العربيه تستاهل حيتفاوض بالذوق و الادب مع صاحب الاعلان فى حدود السعر الى هو طالبه .. مش يقلل 15 الف جنيه عن المبلغ المطلوب و يتوقع ردود اجابيه !!!

الموضوع واضح . و طريقه الرد بتبان اذا كان الى بيتكلم عاوز يشترى بجد او يبيع بجد ولا بيهظر .

عموما فى اعلانات عن سيارات و بأسعار مبالغ فيها جــــدا و طبعا العربيات ديه ولا حتتباع ابدا بالاسعار ديه . و من الاساس ماينفعش ان حد يرد فى الاعلانات ديه لان الاسعار فعلا مبالغ فيها .
انا مش مع حد ولا ضد حد انا بقول الى شايفه .

حاجه اخيره حابب اوضحها : المنتدى مش مكان للتجاره و التجار .و مهواش باب رزق اى حد يدخل يسمسر و ياخد عموله . ديه خدمه مجانيه معموله للبائع و الشارى بدون وسيط .

ياريت " نلتزم " بأسلوب الحوار فى البيع و الشراء . بدل ما القسم كله يتقفل و محدش حيستفيد .

**kaboo4** · 12-01-2009 11:54 AM

الكلام دة حقيقى بس بجد اليموين دول الاسعار نازلة و ان كانت مش جامد اوى يعنى و انا حسيتة علشان لسه شارى عربيه بس بجد على حسب نوع العربيه يعنى العربيه الى سعرها فى حدود 30000 انت بتكلم فى تخفيض 2000 جنيه بالكتير و العربيه الى فى حدود 45000 ممكن يوصل ل3500 الى 4000 بالكتير اما فوق ال60000 فدة كلام تانى و بنزل سعات لارقام خياليه يعنى 8000 اقل و دة لان فيه حجات زيرو فى الحدود دى و الى عايز يدفع مبلغ فوق ال 60000 فى مستعمل عارف هو عايز يشترى ايه مستعمل خصوصا الموديلات الى من 98 الى 2004 و بيقع سعرها جامد
من واقع خبرة 4 شهور فى السوق اقدر اقولكم ان اكتر عربيات سعرها واقع اليومين دول سيران مش لعامة الشعب يعنى برضوا مش الغلبان الى مستفيد
عندكم مثلا البى ام الحديث الى فوق 95 و الاوبل فيكترا من 94 الى 2004 ( الالمانى عمتا )
الرينو و الستروين اعادة بيع زى الزفت مع ان انا شايف ان الرينو سيارة محترمة جدا و فى من دة كتير
الفيات الجديد بس الحجات دى الى واضحة
المتسوبيشى و الدايوا فى نظرى اكتر حاجة ماسك نفسه و التيوتا و الهيونداى طبعا الى هى المفروض عربيات شعبيه او سعر اعاد ة بيعها فى المستعمل اقل من 100000

**hatemahmed75** · 12-01-2009 02:22 PM

السلام عليكم ورحمة الله وبركاتة

فعلاً جزاك الله خيراً يا اخ ديزل

السوق اليومين دول مش مظبوط وفى حالة ركود شديدة
ودة نتيجة عوامل كثيرة منها :
1- الازمة المالية العالمية
2- الشائعات المنتشرة فى السوق
3- بعض الاشخاص لا يستطيع بيع عربيتة باسعار اليوم.
وعلى فكرة انا من حوالى شهر كنت عارض عربيتى للبيع (سيات ابيزا 2001) وكنت طالب 54000 فى الاول وبعد كدة نزلت السعر ل 52000 والحمد لله اتباعت من 10 ايام .
وزى فعلاً ما بعض الاعضاء ذكروا فى ناس كانت تتصل وتقول يا عم دة فى زيها ب 45000 - دة متجبش 48000 وغيره وغيره وغيره
بس الحمد لله انا صبرت لحد ربنا مارزقنى بواحد كان بيفهم فى شراء العربيات وقالى فى فعلاً فى السوق عربيات نفس الموديل وب 45000 ويمكن اقل بس ،
لما تروح تتفرج على العربية تعرف ان المطلوب فيها كتير جداً ،منها عايز سمكرة ودكو ومنهم عايز كاربراتير ب مبلغ وقدرة ومنهم الى مفهاش تكييف وغيرة وغيرة وغيرة.
والحمد لله اشترى العربية ب52000 وسجل العقد عشان هو قالى الفلوس الى هتتوفر فى الرخيص هدفع اكثر منها فى التلصليح والصيانة.
وانا بنفسى نزلت السوق من غير عربتى قبل البيع وقولت اتقرج على الموجود والله العظيم السوق مليان (كنب كنب كنب) مش عربيات .
المهم فى النهاية ربنا يوفق الجميع للخير
اسف للاطالة