الموضوع: احذروا توكيل كلاريون فرع مصر الجديدة

السلام عليكم ورحمة الله وبركاتة
اخوتى وزملائى فى المنتدى الكرام , طبعا حرصا على راحة زملائى كنت عايز اقول على موقف حصلى وانا بركب انذار جديد .
احذروا التركيب بفرع توكيل كلاريون مصر الجديدة
انا روحت زى ما سمعت من اخوتى فى المنتدى ان اذهب الى كلاريون او السجان علشان اركب انذار علشان انا كنت لسا جايب عربية جديدة لانوس وقالولى ركبة فى توكيل كلاريون علشان ضمان الكاسيت وروحت فعلا وركبتة وكل حاجة زى الفل ومشيت بس كان صوت السرينة ضعيف اوى وقولت لتوكيل كلاريون مصر الجديدة ان صوت السرينة ضعيف بس هو قالى لا هو كويس بس علشان صوت الشارع زحمة المهم قولت لنفسى اهو اجرب زى ماهو قالى ولو الصوت برضة واطى ابقى ارجعلة واكيد حيريحنى على اساس انة توكييييل كلاريون يعنى (خدمة ما بعد البيع ) ودة اللى اساسا خلانى ارولهم زانا مطمن سمعة مكان بقى وكدة ,المهم قعدت حوالى ثلاث ايام متعكنن بسبب صوت الانذار الذى يكاد ان يكون معدوم لدرجة انى كنت جبت غطاء للسياة جديد والكلاب بالمنطقة فرتكتة والظاهر كدة انهم كانوا منسجمين مع صوت الانذار الهادىء الجميل ,
المهم روحت بقى وانا عشماااااااااان ان التوكيل الفاضل كلاريوووون لما يعرف ان العميل غير مرضى بالمرة حيجبولى بقى كباية شاى ويقولولى اتفضل اقعد حضرتك واحنا حنعمل الازم ,وحدث ماهو غير متوقع روحت ولسا بحكى القصة لقيت مدير الفرع كلاريون مصر الجديدة وعلى ما اعتقد ان اسمة الاستاذ المبجل (محمد سمير ) اتشنج وخد نفس عميق وقالى يا بية انا طالما ركبت ومشيت خلاص يبقى انسى قولتلة يعنى اية انسى قالى تعالى بكرة قولتلوا دة الموضوع مش حياخد اكتر من 3 دقائق قالى لااااا وقعد بقى يزعق وينعر كأنة صاحب الكون قولتلوا دة انا مخصوص جى توكيل كلاريون علشان سمعة ما بعد البيع زاد وماج اكتر ,الصراحة مشيت بعد طبعا ما كنت حمسك حاجة واجيبلوا عاهة بس ربنا هدانى ومشيت ,روحت للسجان الصراحة ناس فى غاية الادب وقالولى فعلا دة عيب سرينة بس انا فى الاخر ركبتة عند واحد غلبان فى مدينة نصر ودفعت تانى .
فاحترسوا يا جماعة من هذا الفخ وعقدة ان المحلات الكبيرة والشهيرة ذو سمعة طيبة فى ما بعد البيع

انا اسف لو كنت طولت على اى حد بس دة علشان محدش يقع نفس وقعتى
وشكرا

يا سيدى ربنا يعوضك و شكرا على النصيحة
ملحوظة:هو اللى فى ميدان الحجاز جنب جاد صح كدة

هو اللى انا قصدى علية اللى عند ميدان سانتا فاتيما امام فرغلى بتاع العصير بالظبط
معرفش والله يا كريم بس الظاهر ان مدير الفرع اتغير او اللى كان هناك دة مبيعات هو شاب عادى زينا بس اتم قوى ومبيعرفش يتعامل مع الناس اساسا هو عموما انا معرفش هل دة مدير الفرع ولا لا وهل دة اسمة ولا لا بس اللى انا متأكد منة انة بيمسك الشفت كلة كل يوم وبيقعد غالبا على ادارة المحل وهو اللى مضاة لى الضمان فى الاول بس الفنيين قالولى انة مش هو صاحب المحل وهو مجرد ماسك الفرع هو من الاخر لما تشوفة تحس انة اتم.
عموما انا يا جماعة سيبت حقى اة بس سيبتة لربنا وربنا قادر يظهر سمعتة الحقيقية للناس.وياريت لو التوكيل يعرف الناس اللى بيشغلهم لازم يعرفوا ازاى يعاملوا العملاء وخصوصا بعد البيع لانها سمعة وفعلا يا جماعة انا بفكر انى اوصل شكوتى دية الى ابو الفتوح وان لزم الامر الى كلاريون فى بلدها الاصلية اشتكيهم فيها ان اللى مسكين توكيلها مش بروفيشنال ,بس حكاية انى اقدم شكوى فى توكيل بداخل بلدى ويسيئها امام العالم اعتقد ان دة عمرى ما حعمل كدة فى بلدى ,
عموما منه لله

هو اللى انا قصدى علية اللى عند ميدان سانتا فاتيما امام فرغلى بتاع العصير بالظبط

عرفتة

لو معاك فاتورة مختومة قدم شكوى لحماية المستهلك و متتنازلش عن حقك و حق غيرك لانة كدة هيسوق فيها لان مفيش حد يوقفلة

شوف موقع المصنع بتاع جهاز الإنذار و ابعتلهم e_mailشكوي ، و الحاجات دي بتعمل دوشة جامدة للتجار ،
عشان ده حقك ، أقل حاجة تاخد إعتذار

كويس انك قولتلي عشان ماركبش الانذار هناك