السير عكس الاتجاه و الحضانة !!!!!!

**Islam_galal** · 13-01-2009 02:04 PM

استكمالا لحلقات المرور

يتم الآن في الاسكندرية تطبيق مخالفة عكس الاتجاه بحجز السائق في القسم و عرضه علي نيابة المرور و تأميم العربية إلي الحضانة و الغرامة ألف جنية و ألف حنيه للحضانة، يبقي الاجمالي 2000 جنيه غير البهدلة و احتمال ان العربية يتسرق منها حاجات

الكلام ده ساري للميكروباص و الأجرة و التوكتوك و الملاكي كمان

و لا يوجد تصالح فوري و علي المتضرر اللجوء لله ، عسي أن يرحمنا من هذا البلد السعيد

**Shiref_mohamed** · 13-01-2009 02:11 PM

وكمان لسه واحد صاحبي عربيته اتكلبشت في باب اللوق قالى انه دفع 230 جنيه لفك الكلابش

**Terrible_DaRsH** · 13-01-2009 02:29 PM

يا رب بس يتطبق على ولاد البهوات اللى مانتخين فيها جامد ...
فى الاول ممكن العسكرى يتحرى ضده مخالفة وخلاص لكن اعتقد انها هتكون صعبه على العسكرى او الظابط انه يسمك ابن البيه ويوديه القسم كمان ..

**amir** · 13-01-2009 02:39 PM

يا جماعه بعيدا عن كافه الاساليب الملتويه المصريه الحكوميه لجني الاموال من شعبنا المظلوم

اول حاجه مهمه في اي قانون انه يكون في صالح الشعب و انه يطبق علي الجميع بلا استثناءات

يسموها حضانه او مدرسه حتي مش ده اللي هيصلح الحال
لازم يكون في حمله قوميه للانضباط و الاصلاح و يصاحبها حمله اعلانيه موجهه و محترفه و ضخمه
و يصاحبها اعاده النظر في جميع القوانين
و لو في يوم تأكدت انا و انت ان القانون معمول لصالحنا و بيطق علي الجميع اكيد مش كل واحد هيحاول التحايل علي القانون بحجه انه ظالم ولا يطبق علي الجميع
صح ولا ايه؟

**Islam_galal** · 13-01-2009 02:49 PM

الغرض تحصيل الأموال و ليس النظام و إلا لما تقف اللجان في الأماكن المتأكدين من عدم وضوح الاتجاهات فيها

الباشا بياخد نسبة من المخالفات فمصلحتة انه يوقع الناس في الغلط مش النظام و الأمان و الكلام الكبير بتاع أوروبا

مصلحة الباشا دايما بتتظبط عكس مصلحة المواطن و ذلك للمصلحة العليا

بالمناسبة الرقم المتسلسل لفواتير الحضانة كان حوالي 35000

في حوالي 2000 جم يبقي 7 مليون جم في 5 أشهر

**Islam_galal** · 13-01-2009 03:03 PM

اللي قصدك عليه ده يمثل 5% من سائقي الملاكي اللي بيدفعوا المخالفة

أما الجبابرة فكلنا بنشوفهم و محدش بيكلمهم

بالمناسبة الموضوح حصل لواحد معرفة و كان معاه مجموعه (3 ملاكي و 3 ميكروباص و و احد تاكسي) و اللي بات في القسم في الآخر واحد تاكسي وواحد ميكروباص

**nabaster** · 13-01-2009 03:05 PM

amir
يسموها حضانه او مدرسه حتي مش ده اللي هيصلح الحال

استاذ امير اسمها حضانه بتشدييييييد الضاد
وده المكان الي بتتجمع فيه العربيات الي مثلا راكنه غلط وشالها الونش بيسلمها هناك

**matrix4arabs** · 13-01-2009 03:44 PM

يا جماعه احنا متفين علي الكلام ده... بس فعلا لو القانون بيتطبق صح.

انا حصل لي موقف من شهر في المنصورة في شارع الجلاء مع عسكري مرور...
الاتجاهات كلها اتغيرت في منطقة الجلاء...
وكنت جاي من عند استاد الجامعه... حدخل شارع الترعه ومنه للجلاء. تبعا للتعديل المروري اللي افتكسوه من شهر ومالوش سبب. ( واعدش حد عارف يمشي ازاي )

لاقيت موتوسيكل مرور راكن وجنبه عسكري بيوقف عربيه.
مشيت في طريقي عادي.
لاقيته بينادي. يا ملاكي.
وقفت ورجعت مرشليه مع اننا كنا 3 او 4 عربيات معديين.

ولما نزلت له لاقيته واخد رقم العربيه وبيقوللي ده كده عكس الاتجاه.
عكس ازاي يا عم انا كنت هنا اول امبارح. وطالما عكس الاتجاه حطوا قراطيس تبين لنا.
قاللي وانا مش مالي عينك
قلت له يا عم انت علي عيني وراسي. بس انا حاشم علي ظهر ايدي. عاوز تحاسبني حول الطريق. مش تقف تشاور.

واقسم بالله وانا واقف معاه الدقيقتين دول لايقل عن 10 او 15 عربيه بيعدوا ولما يحسوا ان الاتجاه اتغير بياخدوا اول يمين بعد العسكري. وهو قاعد يسجل في ارقام.
والمنظر اللي يضحك فعلآ وهو بيحلق علي موتوسيكلات الدليفري وبيقولوا حجيبك حجيبك.

دي حاجه مهزله.

وبعد ماكنت خلاص شيلت التفييم. وحطيت الطفايه تحت كرسي السواق. وشيلت الزينون. وحطيت المثلث... وكمان كنت باكد علي اللي جنبي علشان حزام الامان.
وقلت اخيرا مش حاحتاج اعمل تليفون ولا احتاج وسايط... وخللي كله سليم علشان اللبش.

رجعت العربيه وجبت الموبايل.
ورحت للعسكري.
قلت له بص حضرتك. خلاصة الكلا انا ماشوفتكش. ومع احترامي ده مش اسلوب تحول بيه الطريق. وبدون واسطه ولا تليفونات مالهاش لازمة. ناوي تسجل مخالفه قوللي. مش ناوي سيبني اروح اشوف اشغالي واسيبك انت كمان تحلق علي العربيات براحتك...
قاللي ماتتكلم عدل يا استاذ...
المهم اتعصبت وقمت ماسك الموبايل علشان اعمل تليفون ب (س) من الناس ( في مديرية الامن ) حيحل المشكلة في دقيقة... وانا فعلا مشمئز من اللي انا باعمله.
ليه اشيل جمايل من حد وانا اصلا مش غلطان.

المهم كان معايا اتنين اصحابي. واحد هداني والتاني راح اتكلم مع العسكري قالله خلاص يا استاذ ما حصلش حاجه.

مشيت وانا شاكك انه حيحرر مخالفه.
ورغم كده عملت تليفون ل (س) قاللي ماتقلقش. وحتي لو اتحررت مخالف طالما ما اخدش الرخص واداك وصل برقم مسلسل...
حتي لو اخد رقم العربية وحرر المخالف. حاجيبها هالك قبل ما تتثبت في الدفتر...

يا شباب مع احترامي...

احنا في بلد مش فالحه الا في نص القوانين... وتطبيقها علي هواهم