استطلاع : بتحط بنزين 90 / 92 / 95 ؟

**ahmed_h_g** · 06-12-2009 05:28 PM

نسترجع الموضوع رغم انه قديم لكن مهم ..

**tutankhamoun** · 08-12-2009 09:26 AM

موديل عربيتك :.............................. جين 2
سنة الصنع :.............................. 2007 - العربية عاملة دلوقتي 30 ألف كم .
نوع البنزين : ................................ 92
تقريبا البنزين بيعمل كام كيلو في الصفيحة : ............................... داخلي 200 إلى 220 كم لكل 20 لتر .... طوالي من 250 إلى 300 كم و أحيانا أكتر
ملاحظاتك في صوت الموتور و سحب العربية : ............................. صوت الموتور عندي هو الصوت الأصلي بتاع الجين 2 مش مواتير iafm الجديدة !!! ...... الموتور صوته عالي خصوصا في الحرق .
هل غيرت من نوع لنوع ولا ثابت على نوع واحد : ........................ غيرت بنزين 95 قبل كدا و محستش بفرق تقريبا .

بالمناسبة الأرقام الخاصة بالبنزين عندي علشان أنا لما بسوق بطريقة هادية بوفر جامد جامد ... و تكون أعلى سرعة 90 كم على الغيار الخامس .... بتعمل أرقام خيالية في التوفير .

و بستعمل منظف رشاشات ( ليس منظف دورة وقود - علشان هناك فرق كبير ) كل تقريبا من 1000 إلى 3000 .... كل لما أحس أن فيه حاجة في السحب .

**momopersona** · 08-12-2009 09:41 AM

موديل العربيه : برسونا
سنة الصنع : 2009
الفتيس : مانوال
نوع البنزين : 92
استهلاك البنزين : 6.8 لتر لكل 100 كم يعنى حوالى 310 كم فى ال20 لتر جوه وبره المدينه يعنى من ده على ده
سحب العربية كويس بس لما جربت ال 95 كان احسن بس مش مستاهل فرق الفلوس الصراحة
انا عايز انظف الرشاشات هل هى بتتعمل تلقائيا فى الصيانة ولا لازم اقولهم ؟؟؟

**tutankhamoun** · 08-12-2009 02:46 PM

المشاركة الأصلية كتبت بواسطة momopersona

انا عايز انظف الرشاشات هل هى بتتعمل تلقائيا فى الصيانة ولا لازم اقولهم ؟؟؟

مُنظف الرشاشات أنت يا باشا تشتريه من أي بنزينة أو من كارفور و تحطه مع التفويله
فيه نوع أسمه رابيدو أو سبيدوا و ده مصري الصناعة و هو ده اللي أنا بستتخدمه على طول و ممتاز و ثمنه تقريبا 9 جنيه مصري .
فيه أنواع تانية و لكن موجودة أساسا في البنزينة و دي بتبقى صناعة أمريكية صهيونية و بيكون ثمنها حوالي 25 إلى 35 جنيه مصري و برضه بتستعملها بنفس الطريقة .

تخلي العربية تفضي البنزين و تيجي عند الربع الأخير تشتري ازازة الرابيدو أو الأسبيدو منظف الرشاشات و تحطها قبل التفويل و بعدين تفول ( بتعمل كدا و أنت في لبنزينة ) .

و خلي بالك ........ أشتري منظف رشاشات ز ليس منظف دورة وقود
لأن منظف دورة الوقود بيتم أستخدامه كل 10 الاف كم تقريبا علشان المواد الكيمائية اللي فيه مضرة بخراطيم دورة الوقود و كمان هو بيستخدم كل فترة كبيرة
بعكس منظف الرشاشات .
و بالتوفيق

**momopersona** · 09-12-2009 05:17 PM

شكرا جدا يا استاذ توت
هاجرب وابئا اقولك النتيجة ان شاء الله بس انا لسه مفول من يومين
وايه الفرق بين منظف الوقود ومنظف الرشاشات ؟؟
يعنى هل استخدم الاتنين لان العربية ماشية 12000 وماعملتش حاجة من الحاجات دى واذا كده اعمل انهى قبل التانى يعنى انهى التفويله الجايه وانهى اللى بعديها مثلا ؟؟؟؟؟؟