ممكن اعرف مميزات وعيوب الفيات 132

**تامر الزلاباني** · 13-01-2009 05:41 PM

السلام عليكم ورحمة الله وبركاته
ممكن الاخوة الافاضل الخبراء يفيدوني في معرفة مميزات وعيوب السيارة فيات 132 سواء 2000 cc او 1600cc ومتشكر ليكم ورجاء الايضاح :k49:

**تامر الزلاباني** · 14-01-2009 11:26 AM

كل دي ردود انا متشكر جدا لتعبكم معايا يا اخوه انا مش عارف ان الناس كلها جامدة كدة

**abdelmessih67** · 14-01-2009 01:07 PM

أهلا يا أخ تامر

ماتزعلش من قلة الردود أو أنعدامها بمعنى أدق لان أغلب شباب
المنتدى مركز على السيارات الجديدة .

أنا من العواجيز بعض الشئ و لدي سيارة 125 بولندي ورثتها عن والدي و كان رحمه الله شاريها زيرو سنة 1977 و كان عمري ساعتها عشرة أعوام , ما أطولش عليك ال فيات 132 هي أجمل و أروع ما انتجته شركة فيات ( برأيي الخاص ) هي بحق مرسيدس الفيات و عن نفسي بأعشق الجر الخلفي لانه أبسط .

على حسب علمي ال 132 ال 200سي سي بلاعة بنزين و ال 1600 سي سي أقل شوية منها في استهلاك البنزين

لكن المشكلة الكبيرة بالنسبة لل132 و هي تمنعني من أقتنائها هي قدم عمرها فعمرها حاليا حوالي 30 سنة و هي في نفس عمر سيارتي لكن بالنسبة لي فأن عربيتنا أول يد و توارثتها عن والدي و كان استعماله لها استعمال طبيب بالمعاش و أقودها منذ 1990 و عارف كل ما بها أما بالنسبة لل 132 فطول عمرها يجعل من الصعب أن تجد واحدة منها اول يد أو استعمال خفيف و نسبة الفابريكا فيها ستكون أقل من مثيلاتها الاحدث .

لو كنت تفكر في شرائها فتأني كثيرا و حاول تجد واحدة أول يد أو بكثيره ثاني يد و حاول تجعل نسبة الفابريكا فيها عالية خاصة الدواخل

**ahmedzizo131** · 14-01-2009 02:07 PM

على ما اعتقد ان من عيوب 132 انها بتقطم من ورا من ناحية الشنطة و الرافارف الى ورا
ثانيا قطاع غيارة بالنسبة للصاج غالية من حيث طقم الابواب و ما شبة ذلك .

**Abo.Omar** · 14-01-2009 02:59 PM

انا شايف انها عربيه فعلا جامده جامده ومتفق مع الاستاذ عبد المسيح انها مرسيدس الفيات موتور جامد وعضم ناشف وصالون واسع وهى مع ابن عمى(1800) وشغاله معاه ومبسوط بيها يعنى مع شويه حاجات بسيطه تنافس كتيير من العربيات الجديده فى الاسود هو المشكله انا وعلى حسب معلوماتى انها كده مرشوشه لان مفيش 132 سودا .... لو غلطت حد يصححلى

**mtageldeen** · 14-01-2009 03:12 PM

فيات 132

- عربية جميلة جداً وقوية وتستحمل البهدلة
- إنتاج 1972-حتي 1985
- من 1981 حتي 1985 تسمي أرجينتا.

مواتيرها:
- 1600 سي سي (98 حصان)
- 1800 سي سي (107 حصان)
-2000 سي سي (112 حصان)
- المواتير كلها 2 كامة علوية
- السيارة لم تصنع مكونتها خارج إيطاليا

مميزات و عيوب السيارة:
أنا دمجت العنوانين لأن هناك نقاط يعتبرها البعض ميزة والأخر يعتبرها عيب

- الموتور 2 كامة علوية يعني يتحمل الخدمة الشاقة ولكن يعيبه إستهلاك البنزين العالي
- وطبعاً بتقبل بنزين 80.
- العربية دفع خلفي
-في حالة تلف الكرونة لا تقبل الكرونة الخاصة 131 أو الشاهين
-قطع غيارها غير متوفرة لأنها لا تشترك مع أي سيارة أخري تقريباً في قطع الغيار الخارجية أو الميكانيكية
-قطع الغيار أسعارها عالية
- مزرعة خصبة للبارومة.
-إرتفاع سعر الضريبة وفقاً للماتور وقانون المرور الجديدة
- العربية تقييلة في بيعها.
-نظراً لعمرها المديد فنادراً أن تجد منها حالة نضيفة

**تامر الزلاباني** · 17-01-2009 10:16 AM

مليوووووووووون شكر للكل والله المفق لينا

**matrix4arabs** · 18-01-2009 02:48 PM

اسمحوا لي اعلق علي الكلام اللي اتقال:
وانا كان معايا 132 الماني موديل 74. 1800
ودي صورتها.

الموتور 2 كامة علوية يعني يتحمل الخدمة الشاقة ولكن يعيبه إستهلاك البنزين العالي

انا كان معايا قبل كده 128 وكانت بتعمل 180 كيلو في الصفيحه.
وفعلا لما جبت ال 132 كان استهلاكها عالي في البنزين... وده من 3 سنين.
بس لما ظبطها ( وكان ده في اول شهر )-- ( ظبطت تاكيهات وغيرت فلاتر وطقم بوجيهات .... ) بجد بسم الله ما شاء الله.
اقسم بالله... كل اللي بيتقال ده اشاعات...
استهلاكها معايا حاليآ 220 كيلو في الصفيحه
وعلي فكرة ده بيكون تقديري حسب المشي في البلد او السفر.
و 200 كيلو / 20 لتر ده كان تقييم في مشوار 420 كيلو منهم 320 كيلو سفر طوالي و حوالي 100 كيلو داخل المحروسه.

قطع غيارها غير متوفرة لأنها لا تشترك مع أي سيارة أخري تقريباً في قطع الغيار الخارجية أو الميكانيكية

لم تقابلني ابدآ مشكلة قطع الغيار سواء الاستيراد او الجديد...

قطع الغيار أسعارها عالية

واسعاره مش عاليه ولا حاجه. بل بالعكس.
فمثلآ: 2 تيل خلفي جديد 70 جنيه...
2 تيل امامي جديد 32 جنيه.

إرتفاع سعر الضريبة وفقاً للماتور وقانون المرور الجديدة

ال 2000 هي اللي ضريبتها عاليه.
لكن ال 1600 و ال 1800 لأ طبعآ.
انا لسه مرخص من شهر الضريبه كانت في رينج 200 : 230 تقريبآ.
بالمقارنه ب ال28 ضريبتها 130 جنيه.
بيتهيأ لي الفرق 100 جنيه مش حاجه.

العربية تقييلة في بيعها

الكلام ده غلط... انا اول ما اشتريت ال 132 وده من 3 سنين تقريبآ. فضلت لمدة سنه بييجي ناس علشان يشتروها وانا اللي كنت بارفض.
واخر عرض جالي كان في شهر 4 اللي فات من 8 شهور تقريبآ وكان 25.000
ورفضت لاني ماكنتش بافكر في البيع وقتها.
بالمقارنة حاليآ انا عارضها للبيع ب 20 الف واكثر سعر اتفصلت بيه كان 18.500
بس انا مش ناوي ابيع بالسعر ده وخصوصآ اني معايا عربيه تانيه حاليآ (لانوس 2002)
لكن حاليآ صدقوني مش تقييم لسعر عربيه نهائي لان الشتاء مش موسم بيع وشراء. بالاضافه للقلق اللي في السوق ( الناس مش عارفه الاسعار حتريسي علي ايه ^ ؟؟؟ )

مزرعة خصبة للبارومة

حرام اننا نستثني ال 132 بالوصف ده. ده بيكون اهمال وكتر غسيل... انا ليا واحد صاحبي كان معاه اكسيل 97 تاني يد فابريكه جوه لكن البرومه وصلت للقايم من كثرة الغسيل.
واخدين بالكم باقول القايم. ما بالك الفجاوي و الاعتاب. هو تقريبآ كان بيغسلها كل يوم.

السيارة لم تصنع مكونتها خارج إيطاليا

ازاي وانا العربيه اللي معايا الماني ( وعلي فكره بيميزها عن الايطالي عمة الزيت ) واغلب مكوناتها مكتوب عليها Made In Germany

انا شايف انها عربيه فعلا جامده جامده

هي فعلآ كده وده اقل وصف يتقال عنها.
1- عربيه عاليه
2- صاجها اقل ما يقال عنه انه حديد.
3- الاكصدامات المعدن بتحميها.

ولي واقعتين بهذا الخصوص:
- في زفة واحد صاحبي. عربيه هيونداي اكسينت خبطت عربيتي في الاكصدام الخلفي... نتيجة فرملة مفاجئه وهو ما اخدش باله.
اللي حصل عنده ( فانوس امامي يمين + اكصدام + كبوت + رفرف يمين )
وانا كل اللي حصل في عربيتي ( فانوس استوب صغير اسفل الاكصدام - والخبطه كلها جت في الاكصدام والمرايا اللي تحت الاكصدام من ورا دخلت لجوه شويه ) وقسمآ بالله ماراحت لسمكري... كل اللي عملته شلت بقية الفانوس اللي اتكسر.

- الواقعه التانيه والعربيه واقفه جت عربيه لانوس خبطتها في الرفرف الشمال من قدام. عملت فيه تطبيقه داخله لجوه. والله العظيم واحد صاحبي حاول يطرها لبره بشاكوش ماعرف من تخانة الصاج . رحت للسمكري دقها علي البارد ورجعت زي الاول... وبالمناسبة كمان ما اخدش فلوس لانه معرفه.

على ما اعتقد ان من عيوب 132 انها بتقطم من ورا من ناحية الشنطة و الرافارف الى ورا

انا مش فاهم النقطه دي...

لكن المشكلة الكبيرة بالنسبة لل132 و هي تمنعني من أقتنائها هي قدم عمرها فعمرها حاليا حوالي 30 سنة

فعلا هي قدمت بس لما تقارنها بفئتها السعريه والزمنيه طبعآ تكسب بعد البيجو ال 504

انا علقت علي الكلام اللي اتقال.
ولكن الحق يقال:
انا اللي خلاني افكر في التغيير هو عافشة ال 132
بصم.
هي حوت علي الطريق. وبجد ماليهاش زي ماتقوليش بقي 504 ولا غيره.
انا كنت باقفل بيها ال 140 وانا مستريح. واكتر حاجه جبت بيها 185 ك/س وده كان اول ما اشتريت العربيه وكنت باجرب عزمها... وانا عارف انه في ناس مش حتصدق 185ك/س.

ثباتها عالي جدآ ما تحت 135 لو العافشه متظبطه وجنوط وكاوتش عريض(مع وزن العربيه )... وبعد كده العربيه صعب تتحكم فيها . لانها من العربيات العاليه.

مميزاتها : مرسيدس الفيات.
عيوبها : التقادم - العافشة.

**mtageldeen** · 18-01-2009 04:05 PM

أولا أنا بحب العربية دي جداً وإلا لما علمت عنها هذه المعلومات.

المشاركة الأصلية كتبت بواسطة matrix4arabs

ال 2000 هي اللي ضريبتها عاليه.
لكن ال 1600 و ال 1800 لأ طبعآ.

طبعاً اللي يركب عربية محترمة كده المفروض متفرقش معاه الضريبة
وبالمناسبة 1800 و 2000 نفس الشريحة (من 1630 إلي 2030)

المشاركة الأصلية كتبت بواسطة matrix4arabs

الكلام ده غلط... انا اول ما اشتريت ال 132 وده من 3 سنين تقريبآ. فضلت لمدة سنه بييجي ناس علشان يشتروها وانا اللي كنت بارفض.

يا أخي العربية النضيفة لها زبونها وحالة عربيتك ما شاء الله هي اللي كانت هتخليها تتباع لكن عامة العربية مش بياعة بلغت السوق وهذا لا يعيب السيارة ذاتها وإنما هذا هو قانون السوق
وعندما تقارنها بالبيجو 504 فمنذ عام أو أقل كان سعر البيجو 45 ألف جنيه يعني تقريباً ضعف ال 132 وهذا ليس بسبب فارق كبير بين السيارتين بقدر أنه عرض وطلب

المشاركة الأصلية كتبت بواسطة matrix4arabs

حرام اننا نستثني ال 132 بالوصف ده.

طبعاً الكلام مظبوط ولكني كنت أجيب عن السؤال حول هذه السيارة

المشاركة الأصلية كتبت بواسطة matrix4arabs

ازاي وانا العربيه اللي معايا الماني ( وعلي فكره بيميزها عن الايطالي عمة الزيت ) واغلب مكوناتها مكتوب عليها Made In Germany

الحقيقة موقع http://wikipedia.org/ هو اللي قال إن مكوناتها لم تصنع خارج إيطاليا ولكنه أشار إلي تجميعها خارج إيطاليا

The 132 was never adapted for manufacture outside Italy

The 132 was also assembled from CKD kits in Poland where the model was designated the 132P: in Poland the car was a favorite with the security services.

والعربية فعلاً ممتازة بس النضيف منها
وربنا ييسرلك بيع عربيتك الرائعة.