عربية 128 موديل 83

عرض للطباعة

14-01-2009, 02:18 AM
mido01050

عربية 128 موديل 83

معروض عليا عربية 128 موديل 83 1100 فربريقة دواخل(حالة الدواخل نضيفة جدا مشفتش زيها خالص طول المدة اللي لفيتها في السوق) و رشة خارج بالكامل فرن لسه جديد مخليها زي متكون من المصنع و كوتش تيوبلس جديد من شهر و كاسيت جديد , الصالون حالته جيدة جدا , مفيش برومة في الشنطة , كبالن جديدة و العفشة متظبطة حديثا يعني العربية مشدودة من الأخر صح في حاجة كمان رقمها مميز لأن أنا مش من القاهرة و العربية 3 أرقام و ده مميز عندنا
صاحبها أعتقد مبالغ أوي في تمنها لأنه طالب 19 و ممكن أخلصها منه على 18 ايه رأيكم كده كويس و لا غالي , أتكل على الله و أخلص و لا ايه أنا محتار جدا يريت حد يفيدني بسرعة
14-01-2009, 02:28 AM
tawfic

انا عن نفسى عندى عربيه موديل 82 وعارضها على 20 الف وتقريبأ نفس الحاله اضافه عليها انها فيها انذار وسنتر وجنوط وفرش جديد اعتقد انك تخلص وماتحسبش ان السوق عامل ايه الفرق بسيط ده لو هيه تستاهل
14-01-2009, 02:34 AM
mido01050

متشكر على الرد لكن هل فيه فرق كبير بين الموتور ال 1100 و ال 1300 خاصة من جانب الصوت الصادر عنه و العزم
14-01-2009, 02:41 AM
tawfic

العفو وواضح انك ركبت العربيه وحسيت بالعزم اقولك الفرق بيبان بس لما تكون محمل فيها كتير وطالع بيها كوبرى طبعا 1100 غير 1300 علشان كده انا لما جيت اعمل عمره للمتورعدلت المتور ل1500 وانته ممكن تعمل كده بس صدقنى الفرق مش كبير
14-01-2009, 02:49 AM
mido01050

طاب من جهة الصوت مين فيهم أوطى و لا الأتنين زي بعض؟؟؟؟
متشكر ليك على الرد السريع أخيرا لقيت حد أكلمه عشان أخلص من الحيرة اللي أنا فيها
معلش فيه سؤال كمان هيه التنك بتاعها أد ايه و يعمل كام كيلو في التفويلة؟
14-01-2009, 03:32 AM
tawfic

الصوت بيرجع لحجات كتير نوع الشكمان جوده المتور نوع زيت المتور ضبط الكهرباء بأختصار الموضوع ملوش علاقه بالفئه اللتريه اما التنك 26 ليتر وبيعمل معايا جوها البلد حوالى 320 كيلو وده برده بيرجع لاسلوب السواقه والمتور وظبط العربيه كلها
14-01-2009, 04:30 AM
mido01050

متشكر لحضرتك جدا
مفيش أي حد تاني عنده تعليق على السعر أرجو الأفادة من الناس الخبرة في المنتدى
14-01-2009, 05:24 AM
yaskhl

لو 18 اتكل على الله وخلص مافيش حاجة نضيفة بالسعر ده. واللى بيقولوا فيه 128 بـ 13 و 15 الف دى بتبقى موش نمرة 1
14-01-2009, 05:44 PM
mohsen128

اتكل على الله والحاجه النضيفة بتكون لقطة بجد هتفرق معاك كتير بعد كده ،، ومبروك مقدماً:S_thum1[1]
14-01-2009, 05:51 PM
casper1500

لا بلاش 1100 بجد عن تجربة سحبها مش حلو .. مبتجريش معايا غير بالقرص و طبعا انت مش جايب عربية عشان تقرص عليها
14-01-2009, 08:13 PM
ahmed1981

أنا عندي سيارتين 128 إحداهما 1100 والأخرى 1300
في فرق بين الموتورين في السحب والتسارع
لكن في رأيي الموتور ال 1100 حنين أكثر على السيارة ولو حالته كويسه هيكون كويس

لكن السعر مبالغ فيه
ولو السيارة حالتها نظيفة حاول تنزل بالسعر شوية وتوكل على الله
ولا تنسى صلاة الإستخارة
15-01-2009, 12:22 AM
yaskhl

كان معايا 128 موديل 80 وكنت باجيب بيها 120 مستريح وكانت ثابتة بنسبة 80%. بس اهم حاجة تكون مظبوطه.
15-01-2009, 03:03 AM
mido01050

متشكر للجميع على الردود بس عندي سؤال هو الموتور ال 1300 تمنه أد ايه لو حبيت بدل العمرة أغير الموتور و خلاص ؟
15-01-2009, 01:58 PM
ahmed1981

اقتباس:

المشاركة الأصلية كتبت بواسطة mido01050

متشكر للجميع على الردود بس عندي سؤال هو الموتور ال 1300 تمنه أد ايه لو حبيت بدل العمرة أغير الموتور و خلاص ؟

يتراوح ما بين 1700 إلى 2000 جنيه حسب حالته
16-01-2009, 01:52 AM
ezzatfox

لو 1100 و العربية مظبوطة صح يعنى كهرباء و كربراتير و مجموعة الدبرياج بتبقى طلقة .. انا معايا مو 80 و الله بشد بيها مع الزيرو و استهلاكها فى البنزين قليل جدا .. بس لازم تجربها عشان تعرف بنفسك .
و على فكرة السعر دة مش غالى و لا حاجة لو فعلا كويسة اتكل على الله .. انا عارض عربيتى على 18500 بس زيادة سنتر و انذار و تارة اسبور و صالون جديد