تعليقاً على حملة "خليها تصدى" و الأزمة الاقتصادية
بدايةً أنا عايز أعتذر عن غيابى عن المشاركة فى المنتدى لفترة طويلة للغاية لعدة أسباب منها الانشغال الشديد و منها احساس بالاحباط من أحوال البلد و فقدان الرغبة فى الكلام لأنه غير مجدى ... و أسباب أخرى مش دة موضوعها. لكن أنا دايماً متابع المنتدى بشكل شبه يومى و عايز أعتذر بشدة عن قلة المشاركات.
لكن بما أن حملة "خليها تصدى" من الحاجات اللى فتحت نفس الواحد شوية فدة دفعنى لفتح الموضوع دة للمشاركة ببعض التعليقات و الأفكار.
1- أول ملاحظة ان فى تعتيم اعلامى جامد (صحافة و تليفزيون) على هذه الحملة رغم انتشارها فى مصر و السعودية (على الأقل بين مستخدمى الانترنت) و طبعاً السبب الرئيسى فيه هو سيطرة الوكلاء على الاعلام بنفوذهم و تهديداتهم بأموال الدعاية ... لكن الحاجة اللى الناس دى مش قادرة تفهمها ان نسبة كبيرة لا يستهان بها من الطبقة الوسطى المصرية بقت بتستخدم الانترنت كمصدر رئيسى للأخبار و تكوين الرأى العام ... التغيير الجوهرى ان الاعلام الموجه بيتم تدريجياً تحييده كسلاح لتوجيه الرأى العام و لأول مرة بقى الناس هم اللى بيتحكموا فى صناعة الرأى العام مش الصحافة و التليفزيون.
2. طيب الاعلام بيتعامل ازاى مع الحملة؟ الواضح انه بيعتبر ان ضعف مبيعات العربيات سببه الرئيسى "الشائعات" ... و بيرفض الاعتراف ان الموضوع أكبر من الشائعات بكتير و انه شعور عام و الى حد ما منظم بإن تجار العربيات تعاملوا مع المستهلك بجشع شديد للغاية على مدار سنوات عديدة و ان الحملة دى رد فعل مباشر للجشع دة. الناس كلها عارفة و متابعة اسعار العربيات بيحصل فيها ايه فى العالم كله و السوق مش حيتحرك الا لو الناس حست ان فى تخفيضات حقيقية بتواكب التخفيضات العالمية ... و مهما اتكتب فى الجرايد من كلام، الناس مش حتصدقه لأن كل صحفيو السيارات تقريباً فقدوا ثقة المستهلك من زمان لما باعوا أقلامهم للتجار و التوكيلات.
3. هل المقاطعة أثرت على التجار؟ طبعاً و محدش يقدر يشكك فى كدة ... و أكبر دليل كلنا شايفينه: من 4 شهور فاتوا كنت بتقابل كل يوم كام عربية فى الشارع معلقة نمر تجارية أو مؤقتة؟ النهاردة نادراً جداً لما تشوف عربية معلقة نمر تجارية ... دليل كمان يلاحظه كل الناس اللى ساكنين جنب أو قريب من أجانسات السيارات ... المعارض كانت لحد وقت قريب بتلاقى كل يومين تلاتة عربيات جديدة محطوطة فيها ... النهاردة نفس العربيات محطوطة فى المعرض مبتتغيرش و أنا مثلاً تحت بيتى معرض كبير كان بيبقى راكن 10 عربيات فى المتوسط ... و حالياً مش حاطط غير 3 عربيات بقالهم عنده اكتر من 3 أو 4 اسابيع محطوطين فى نفس مكانهم.
4. اللى متابع الحملة على الانترنت حيحس ان المستهلك عنده سيولة كبيرة لكن مش عايز يطلعها الا لما الأسعار تنزل لمستوى مناسب ... لكن هل دة صحيح؟ هل فعلاً المستهلك عنده سيولة كبيرة لكن مش عايز يطلعها؟ الحقيقة ان لو الكلام دة صحيح فأعتقد انه بيدى أمل للتوكيلات بالصمود أمام الأزمة لإحساسهم انها أزمة مصطنعة و مسيرها تخلص ... لكن الحقيقة ان الواقع و الشواهد بتؤكد ان الأزمة دى مش مصطنعة و لا حاجة و انه فعلاً فى نقص فى السيولة فى البلد ... و دة يقودنا للنقطة الخامسة ...
5. هل مصر إتأثرت بالأزمة العالمية أم لا؟؟ طبعاً اتأثرت و اللى بينكر كدة بأقوله مش أنا اللى بأقول كدة دى التصريحات الرسمية لرشيد محمد رشيد و لوزير المالية و غيرهم (بعد ما كانوا فى الأول بينكروا تأثر مصر بالأزمة) ... و الشواهد على كدة كتيرة جداً:
* مجال السياحة: بشهادة العديد ممن يعملون فى مجال السياحة أو مجالات ذات صلة حجوزات و اشغالات الفنادق قلت جداُ و حتى السياح اللى بييجوا معدلات انفاقهم قلت جداً ... نسبة مخيفة من عمال الفنادق تم تسريحها أو لم متعينين أخدوا اجازات اجبارية بدون مرتب أو بالراتب الأساسى من غير حوافز
* قناة السويس: رغم ان عام 2008 اتحقق فيه رقم قياسى جديد لدخل القناة (5 مليار) لكن أواخر نوفمبر و شهر ديسمبر كله شهدوا تراجع كبير فى الحركة الملاحية و طبعاً دة مأثرش على الدخل السنوى لعام 2008 لكن مع استمرار الأزمة العالمية و الانخفاض الشديد فى التبادل التجارى بين آسيا و أوروبا حيبان التأثير فى دخل القناة لعام 2009 بوضوح
* التصدير: مصانع كتير جداً بتعانى بشدة من انخفاض التعاقدات ... أقرب مثال لكدة كنت من يومين مع صديق ليا مهندس فى أحد المصانع الكبرى اللى بتشتغل فى مجال الصناعات المغذية للسيارات و بيصدروا معظم انتاجهم لأوروبا و بيأكدلى ان المصنع بيشتغل بنسبة بسيطة جداً من طاقته الانتاجية بعد ما كانوا بيشتغلوا ورديتين فى اليوم ... بعد شوية جاتله مكالمة من زميل له فى المصنع بيقوله فيها "متجيش بكرة عشان مفيش شغل فبكرة أجازة" ...
* تحويلات العاملين بالخارج: بما ان دول الخليج و خاصة الامارات تأثرت بشدة بالأزمة خاصةً فى مجال الاستثمار العقارى فمن المتوقع انه يحصل انخفاض فى تحويلات العاملين بالخارج و كلنا بنسمع عن شركات خليجية كبرى بتسرح نسب كبيرة من العمالة ... و تأثير الموضوع دة حيبان جداً فى موسم الأجازات فى الصيف لأن الناس اللى راجعة من الخليج حتبقى حريصة جداً فى نفقاتها تحسباً لما هو آت
* الاستثمار العقارى: فى ناس كتير فى الفترة اللى فاتت جمدوا فلوسهم فى شقق و عقارات نتيجة ارتفاعها المستمر و تعاملوا معاها كنوع من الاستثمار المضمون ... لكن حالياً السوق العقارى فيه جمود ملحوظ لأن المشترى عايز يشترى بأسعار أقل و البائع مش عايز يتنازل عن الأسعار اللى اشترى بيها أو أعلى منها و بالتالى مفيش بيع و لا شرا فى عدد كبير من المناطق و طبعاً دة معناه فلوس مجمدة على هيئة عقارات.
* كل ما سبق حيؤدى لنقص السيولة فى السوق المصرى بشدة و بالتالى فحتى المجالات اللى مش متأثرة بالأزمة حالياً حتتأثر بصورة غير مباشرة تدريجياً.
* المحصلة النهائية ان تأثير الأزمة العالمية علينا مش مجرد اننا حنفرح بانخفاض الأسعار، لأ أنا و انت و كلنا حنتأثر فعلاً بانخفاض الدخل عاجلاً أو آجلاً
* خلاصة ما سبق ان حضرتك لو معاك حالياً سيولة و مستنى أسعار العربيات تنزل أنصحك بتقليل فئة العربية اللى ناوى تشتريها ... يعنى لو كنت ناوى تجيب عربية بـ 100 ألف قللها لـ 80 أو 70 و احتفظ بباقى المبلغ تحسباً للظروف مع العلم ان الكثير من الخبراء الاقتصاديين فى العالم بيتوقعوا استمرار الأزمة دى لعدة سنوات و بيعتبروها أسوأ حتى من الكساد الكبير اللى عانى منه العالم فى الثلاثينيات
و ربنا يستر علينا جميعاً