ممكا حد يدلنى اروح إزاى شرم الشيخ بالعربية؟

**Ahmed Sharaf** · 14-01-2009 02:55 PM

اولا كل سنة وانتم طيبين جميعاً.
من فضلكم انا هاروح إن شاء اللة شرم الشيخ بالعربية, ودة اول مرة اسافر شرم , هل فية حد من الاخوة الافاضل ممكن يشرحلى الطريق اروح إزاى من ميدان الرماية , واية الاماكن الكويسة اللى الواحد ممكن يروحها هناك لانى رايح انا ومراتى والاولاد.
شكراً

**Islam_galal** · 14-01-2009 03:09 PM

علي قد معلوماتي (اسكندراني) و المصراويه أكيد حايصلحوا

- من ميدان الرماية إلي الدائري
- ثم طريق السويس لنفق أحمد حمدي
- تاخد يمين لغاية شرم الشيخ (380 كم تقريبا)
حضرتك مقلتش نازل في أي فندق و في أي منطقة في شرم

**Ahmed Sharaf** · 14-01-2009 03:30 PM

شكرا إسلام , انا عارف لغاية طريق السويس ومش عارف بعد كدة امشى ازاى , انا هنزل فى سلطان جاردينز

**ecybrarian** · 14-01-2009 03:34 PM

انا كمان مهتم جدا بالموضوع ده...ياريت حد كمان يقول لنا برضه فين المقالب في الطريق. مثلا مفترق طرق بدون علامات. او بنزينة لازم نمون عندها علشان إللي وراها بعيده جدا. مطب بدون علامات! منحدرات وملفات حول الجبال واخيرا اللجان والرادار.. إلخ من مقالب الطرق المصرية..
وبعدين انا اعرف إن في طريق من الطور اسمه طريق سانت كاترين بيختصر الطريق إلى شرم، الكلام صح ولا اشتغاله؟؟؟

وهل الطريق (طريق السويس، نفق احمد حمدي، رأس سدر-الطور موازي للبحر، طريق سانت كاترين وسط الجبال، ثم إلى شرم) كده يبقى صح ولا غلط؟؟؟؟؟

**Islam_galal** · 14-01-2009 04:11 PM

الطريق من النفق لشرم مفيهوش افتكاسات و لا مفارق بس بتخللي بالك عند المدن لان الطريق ضيق و ممكن متاخدش بالك و تلاقي نفسك جوه المدينة

قبل كل مدينة بحوالي 20كم تخللي بالك لأن أحيانا في رادار بالذات قبل الطور و طبعا شرم الشيخ

البنزين أفضل انك تمون من قبل دخول سيناء للأمان لكن في بنزينات حوالي 2 أو تلاتة في الطريق وفي بنزين 92 في شرم و بنزينات محترمة

بصراحة معرفش سلطان جاردينز فين بس في واحد في شرم البلد اسمه نجمة سيناء -مطعم أسماك أكله ممتاز و سعره مقبول
و طبعا ماك و بيتزا هت و وأخوانهم و خللي بالك من مطاعم الأسماك في نعمه . . . نااااااااار

**د.أحمد سمير** · 15-01-2009 01:30 AM

الطريق اللي حضرتك ذكرته صعب ، وطريق سانت كاترين شرم الشيخ طريق جبلي حوالي 70كم فوق الجبال ..
الطريق المعتاد هو السويس ، الطور ، شرم الشيخ
تسير بمحاذاة خليج السويس ثم رأس محمد ثم خليج العقبة ..
يفضل إنك تريح في ...
عيون موسى وفيها نصب تذكاري واستراحة محترمة ، وزيارة للدوشمة الإسرائيلية وتشوف كمان عيون موسى المذكورة في القرآن الكريم ، والموقع على بعد حوالي 30 كم من مخرج نفق أحمد حمدي .

وبعدها تريح في مدينة الطور وهي عاصمة المحافظة ..

وفي الطريق إشارة صغيرة لحمام فرعون ، وهو عبارة عن كهف في الجبل يطل على خليج السويس به نبع ماء ساخن كبريتي له فوائده الصحية والكهف كله عبارة عن ساونا ربانية ..
بس لو هاتقف هناك تأكد إن في أتوبيسات سياح واقفة لأن المنطقة مش آمنة كفاية وأنا آخر مرة زرتها من حوالي 5 سنين يعني ممكن يكون الوضع اتغير دلوقتي
ورحلة سعيدة

**Ahmed Sharaf** · 15-01-2009 09:23 AM

استاذ إسلام / دكتور أحمد
أشكركم جداً على إهتمامكم بالرد . تحياتى لكم

**محمد عز** · 15-01-2009 09:31 AM

تاخد طريق السويس
وبعد الكمين بالظبط عند الكليو 104 هتلاقى مدخل للنفق

هتمشي فيه وهتكمل على طول ولا يمين ولا شمال لحد ما تدخل النفق
قبل النفق مباشره هتلاقى محطة بنزين وطنيه ممكن تمون منها

اول ما تخرج من النفق هتلاقى يافطة شرم الشيخ 380 كم زى ما الاخوة الافاضل ذكروا

هتمر على

راس سدر
ابو رديس
ابو زنيمه
عيون موسي
الطور
واخيرا شرم الشيخ

الطريق طوالى على طول مافيش اى مداخل
يعيبه انه طريق مفرد ( حارة رايح وحارة جاى)
ويفضل انك تسافر فى ضوء النهار

غير كده الطريق كويس

**Ahmed Sharaf** · 15-01-2009 10:44 AM

أشكرك جداً أ/محمد واشكر كل من اهتم بالرد على موضوعى

**Islam_galal** · 15-01-2009 12:21 PM

تروح و تيجي بالسلامة و متنساش تروح راس محمد و تركب قارب زجاجي (glass boat) و تعمل سفاري قبل الشروق

الموضوع: ممكا حد يدلنى اروح إزاى شرم الشيخ بالعربية؟

LinkBack

أدوات الموضوع

عرض

-

-

المواضيع المتشابهه

استفسار بخصوص السفر لشرم الشيخ بالعربية.

إزاى أسافر للسعودية بالعربية؟

إزاى اروح مدينة العبور من وسط البلد ومن الزيتون بالمواصلات

عايز اروح الحسين بالعربية لكن المشكله اركن فين

اروح مرسى مطروح بالعربية ولا اتوبيس

الكلمات الدلالية لهذا الموضوع

المفضلات

المفضلات

ضوابط المشاركة