الموضوع: بركولى لقيت مكان فى الجراج

المشاركة الأصلية كتبت بواسطة magedm2007

لقيتة قال لى فية مكان بس بـ 70 جنية قلتلة ماشى هعمل اية طيب

يابختك ياعم انا كنت دايخ على جراج عندنا والاسعار عندا بقي من 200 لغايه 350 ويمكن اكتر

والحمدلله في الاخر لاقيت جراج في الاول قلي بارضو 200 اقعدت افاصل معاه نزلتها ل 130 غير الاكراميات

الف مبروووووووك وربنا يحفظهالك ياباشا وفعلا احسن حاجه انك تحطها فى جراج على الاقل هاتنام وانت مطمن عليها

المشاركة الأصلية كتبت بواسطة magedm2007

صباح الفل انا عندى عربية 127 باب واحد وكنت كتبت كذا موضوع عن خسائر الركن فى الشارع بتاعى بسبب العيال ربنا يهديهم واخر خسارة كانت لجارى عندة بردة 127 توب العيال طلعت على الكابوت والعربية القواطيش بتاعة البطارية لمست فى الكابوت وولعت العربية لولة كان فى مصنع كبير كان فية طفاية حريق انقظت العربية قبل لما تنفجر ومن بعدها رحت للجاراج اللى فى اخر الشارع بتاعى وسألتة على مكان اركن فية على طول لقيتة قال لى فية مكان بس بـ 70 جنية قلتلة ماشى هعمل اية طيب ومن ساعتها وانا بالى مرتاح عشان بعدتها عن ايد العيال وربنا يستر :k48:

الف مبروك يا باشا بس خلى بالك متسبلهمش المفتاح علشان لسه عندنا امبارح واحد من الجراج الى جنبى فى الشارع ولد صغير من الى شغلين هناك كان بغسل العربيه وطلعت فى دماغو تجربها كانت متسوبيشى لانسر وخبط بيها عربيه 128 بتاعت صحبى وطلعت فوق الرصيف واتبهدلت طبعا والكاوتش بتاع الانسر من شده الخبطه انفجر فخلى بالك

أحنا بقي حصلت لنا حكاية غريبة و هي اننا أنطردنا من الجراج و ده حصل من كام يوم و مش أحنا بس لا ده ناس كتير زينا و اللي حصل كالآتي.........
أني أنا كنت بركن برة الجراج مش جوة و تتغسل مرة في الأسبوع و كل ما أطلع تتروق بالفوطة الزفرة و بكام بـ 95 جنيه و في الشارع زي ما قلت لكم و الرايح و الجاي بيخبط فيها و الجناب بتاعة العربية باظت من الجراج ده بس كنت مريح دماغي من عيال المدارس و الشباب الخفاف اللي بيحبوا التلطيع علي العربيات و كمان من بعض جيراننا الأعزاء اللي محتلين الشارع و كمان منساش ساعة ما سبتها تحت البيت ساعتين و والدي نزل لقي البربريز الأمامي متدشدش بطوبة رماها عيل صغير قال ايه بيهرج مع صاحبه سفالة و قلة أدب المهم يعني اني كنت مريح دماغي من الكلام ده كله.
المهم جت حملة من البوليس و قالوا لصاحب الجراج متخليش حد يركن برة في الشارع و الراجل مغلوباً علي أمره قال لهم حاضر, أصلي بقي الظاهر أني الموضوع جاي من فوق شوية و الحكاية دخل فيها عند أو تحدي أو خلاف مع حد من الناس المهمين يجعل كلامنا خفيف عليهم عشان كدة المغرز ده أتعمل, ده تقريبا السيناريو اللي حصل يعني, المهم مطولش عليكم سحبتها و جبتها في الشارع عندنا بس مكنتش مرتاح برضه و بقالها يومين تلاتة بس الحمد لله اتفقت مع جراج تاني في الشارع برضه لأني ملقتش أماكن جوة بس بـ 100 جنيه 80 لصاحب الجراج و 20 للعمال و بكرة أول يوم في الجراج الجديد بس قلقان لأنهم طلبوا مني المفتاح بس كل العمال ناس كبيرة في السن أو شباب بس مش صغيرين برضه فعشان كدة مطمن شوية و ربنا يسترها.