احذروا السيارات المسروقة والسيارات اللي مالهاش ورق...
...
اترددت كتير قبل ما اعرض الموضوع ده...
بس لاقيتني واجب انبه الاخوة في المنتدي.
الاسبوع اللي فات حصلت حادثتين اغرب من بعض.
الأولي:
واحد سايق عربيته ويفاجأ قدامه عربيه نفس موديل عربيته ونفس اللون... وكمان نفس الرقم.
هيونداي اكسيل. اللون احمر ونفس الرقم ( ملاكي دقهلية. ؟؟؟؟؟ )
الموقف ده حصل فعلآ مع شخص معرفه... و تخيلوا بقي انه تاجر عربيات.
المهم وقف العربيه اللي قدامه وساله في استغراب عن اللي بيحصل... وتطور الامر انهم اتانقوا وراحو القسم. والعربيتين اتحجزوا علشان يتحولوا تاني يوم فحص في المرور.
طلعت عربيه منهم سليمه. والعربيه التانيه سقطت في الفحص وطلع انه مالهاش دوسيه في المرور تبعآ لرقم الشاسيه وبصمة الماكينه... واتصادرت العربية.
التانية:
برده مع تاجر معروف :
اشتري عربيه من شهر من سوق مدينة نصر.
وعمل توكيل من البائع...
وبعد اسبوعين باعها بتوكيل...
المهم الاخير اللي اشتراها فضل ماشي بالتوكيل... لان العربيه فيها رخصة 3 سنين...
وفي طريق دمياط المنصورة فوجئ بالكمين اللي في كفر سعد بيطلب منه الرخص... وقاله اركن علي جنب.
ولما نزل يتكلم مع الظابط ... الظابط قاله العربيه دي مسرقة... واتحول علي القسم والعربية اتحجزت... واتحول للنيابة.
خلاصة القول:
اتضح ان العربيه مسروقه من فترة.
واتباعت بتوكيل مزور ( اول مرة )... الرخص سليمة بس التوكيل مضروب.
طبعآ اتعمل تصالح... بسالفلوس ضاعت... والبطاقه الاولي اللي اتعمل بيها التوكيل الاول طلعت مضروبة.
يا جماعه اللي بيشتري عربيه يتأكد من رقم الشاسية... مطابق للي في الرخصة. ويتأكد ان ليها دوسيه في المرور.
اللهم اني بلغت اللهم فاشهد.
