ح أحكي لكم ازاي دوخت السبع دوخات علشان أطلع رخصة دولية.
وعلى فكرة لسه ما خلصتش الخطوات كلها بس ح أحكيلكوا علشان تعيشوا التجربة وتأخذوا فكرة يمكن تحتاجولها..
دي مش أول مرة أطلع رخصة دولية بس الموضوع كل مرة بيصعب..
زمان كنت تأخذ بعضك وتروح نادي السيارات الصبح بدريفي ش قصر النيل بالرخصة المصري وتسيبهلهم مع صورتين وتدفع 40 ج تقريبا وترجع على الظهر تأخذ الرخصة الدولية..
بس كان زمان.. من فترة 7 أو 8 سنين غيروا النظام وبقى لازم تروح مرور مدينة نصر الأول، ومرور مدينة نصر بس ما ينفعش أي مرور تاني تروح هناك والموضوع ما بياخدش أكتر من ربع ساعة في المروربيدوك شهادة من عندهم انك رخصتك صالحة ان تطللع عليها رخصة دولية وتأخذ الشهادة ورخصتك والصورك الشخصية وتروح نادي السيارات علشان تطلع الرخصة الدولية وبيسلموهالك تاني يوم..
امس ذهبت لمرور مدينة نصر لأستخراج الشهادة.. رخصتي من النوع القديم اللي عاملة زي ودن الفيل (قصدي قد كف اليد) المهم أول ما العسكري اللي بيكتب الشهادة شافها بص فيها وقالي ما ينفعش الرخصة دي لازم الرخصة الجديدة الصغيرة، استأذن البيه الظابط وشوف ح يقولك ايه؟
طبعا الظابط ما وافقش وقالي لازم تجيب شهادة بيانات للرخصة من المرور اللي أصدرها.. لأن الرخص القديمة دي من السهل انها تتزور فعلشان كده عملوا الخطوة دي..
عموما لو كانت رخصتكوا الجديدة يبقى الخطوة الجاية دي مش لازم..
المهم رحت المرور اللي انا مطلع منه الرخصة النهاردة الصبح..
حوالي 5 شبابيك وكلها فاضية ما فيش حد غيري.. وكلهم ستات هما واللي قعدين جوه المكتب..
اديت الأنسة الرخصة قالتلي معاك صورة شخصية ..
قلتلها لأ.. قالتلي اتصور وتعالى وجيب معاك دوسيه فاضي وإشتري طلب استخراج شهادة بيانات..
طبعا دوخت عقبال ما لقيت مصوراتي فاتح وبعدين من الكشك اللي جوه المرور اشتريت الدوسيه والطلب ب 2.50 جنيه بس ..
وصورت البطاقة ب نص جنيه..
ورجعت الشباك ف بعتتني لمكتب مباحث المرور يكشفوا على اسمي.. طبعا بيشوفوا اذا كان الواحد عليه أحكام وأي حاجة تانية..
وبعدين خلتني اروح الخزنة أدفع 8 جنيه وبعدين كتبت الشهادة بخط الإيد ودخلت وقعتها وختمتها من مدير وحدة المرور ورجعت للشباك تاني .. غلفوهالي..
ويوم الأحد ان شاء الله أحكيلكو عملت ايه في مرور مدينة نصر..
:36_6_3[1]: