الموضوع: حكاية غربية حصلت معايا

طب انا من فترة بسيطة حوالي شهر سمعت حاجة غريبة من سواق تاكسي شوفت التاكسي بتاعه قديم برده واكيد موديله قبل التمانيات كمان فسألته اخبار مشروع احلال التاكسي ايه؟ قاللي لا القرار اتأجل والفترة اتمدت من 3 سنين ل 10 سنين بسبب الازمة العالمية قلتله حضرتك متأكد ياحاج من الكلام ده انا اعرف ان المده 3 سنين وبس قاللي ايوة متأكد وانا ماشي بالتاكسي بتاعي اهوه واللي جدد وعمل احلال للتاكسي بتاعه بيندم دلوقتي عشان مستناش شوية لو كان استني شوية مكنش هايضطر يكهنه.
مش عارفة بقي الموضوع ده صح ولا غلط ولا ايه بالضبط؟
بس الحكومة لو عملت قرار الإحلال ده علي الملاكي تبقي ادت الشعب بمبة جامدة قوي بعد مالتاكسيات اللي حصللها احلال اتحولت لملاكي وفلوسهم طبعا تبقي راحت في الهوا .
بس اعتقد ان القرار ده مينفعش يتعمل فعلا نتيجة لانه ملكية خاصة وكمان في اسباب اقتصادية تانية تمنعهم من الحركة دي هو الشعب ناقص يعني؟

أنا شايف أن ده هيحصل عاجلا أو أجلا هى بس المسءلة مسئلة وقت لا أكتر ولا أقل وهما غالبا مش هينزعوا ملكية هما بس ممكن يمنعوا ترخيصها ويفتحوا باب توريدها إلى دول أفريقية

وجهة نظري لو الواحد حسبها صح هيلاقي ان المستعمل بمصاريفه والوقت الضايع عند الميكانيكي وأعوانه بالاضافة للمواقف البايخة والعطلة في الشارع وياسلام كمان لو معاك حد ورايح مشوار والعربية مش راضية تروح المشواردا وكل دة هتلاقي ان الزيرو ان شاء الله ماروتي(أرخص عربية) بقسط 500 أو 600 جم أرحم من البهدلة دي ومش أغلى بكتير من مصاريف المستعمل ومش لازم الزيرو تكون 1600سي سي وثابتة على 180كم/الساعة وفيها ايرباج ومثبت سرعة!!!!

يعني الراجل السواق التاكسي بعد ما قلبها ملاكي علشان القرار ده
هايفضل وراة ويقلبها تاني بعد ما تتنفذ علي الملاكي !
وهايودها فين العربيات القديمة دي ...

أنا كنت في أسوان لقيت إن هناك أكتر من 90% من التاكسيات بيجو ستيشن موديل السبعينات ,
و لما سألتهم حاتعملوا إيه في القانون الجديد بتاع التاكسي قالولي إنه مش حايطبق عندهم ده في القاهرة بس !!!
بصراحة حاتبقى مشكلة جامدة جدا عندهم لو القانون ده إتطبق

الموضوع مطبق على التاكسى لان القانون يفترض ان التاكسى بيشتغل 24 ساعة يوماً

اما الملاكى ده وضع تانى خالص

بدليل انه لم يقل بتهكين التاكسى - بل تحويله الى ملاكى