أى سؤال أو استشارة فى طب العيون

**elhdry2000** · 18-01-2009 03:23 AM

الف شكر يا دكتور على ردك الواضح و اللى اكتر من رائع

**Dr.SherifMansy** · 18-01-2009 08:32 AM

المشاركة الأصلية كتبت بواسطة mostafabakry

كنت احتاجها في اثناء المحاضرات عشان اشوف الكتابة علي السبورة

المهم في خلال ال 3 سنوات الأخيرة النظر بدا يتدهور بطريقة كبيرة و ظهر عندي ما يسمي بالإستيجماتيزم وحاليا انا لا استطيع ان استغني عن النظارة و كنت كشفت في الدولي للعيون و طلبوا مني طبوغرافية قرنية عشان فيه شك في القرنية المخروطية

المهم انا دلوقتي مستوي الرؤية مع النظارة مش كويس خصوصا بالليل و فيه زغلله و ازدواج في رؤية الأشياء بالليل

درجات الإستيجماتيزم عندي 4.5 للعين الشمال و 5 للعين اليمين طبعا مع قصر نظر تقريبا بنفس الدرجات

علي فكرة انا كنت بعاني من رمد ربيعي في فترة طفولتي حتي سن 16 سنة و عمري حاليا 27 سنه يعني بالشكل دا علي ما وصلت ل 40 سنه هكون في الباي باي

اسف علي الإطاله و شكرا مرة تاني لحضرتك

بداية الشكوى واضح انها استجماتيزم بدرجة صغيرة علشان كده كنت بتلبس النظارة عند اللزوم
و بعدين الأمر تطور و زاد و بصراحة مع درجات زى 4.5 و 5.00 و الرؤية مش واضحة بالنظارة يبقى لازم اشك فى قرنية مخروطية "Keratoconus" و اللى يخلينى اشك اكتر فيها انك ذكرت انك كان عندك رمد ربيعى كتير و انت صغير و معروف ان فيه نظرية من نظريات حدوث القرنية المخروطية بتربطها بالرمد الربيعى العنيف لأنهم بيقولوا فى النظرية انه بيضعف النسيج الداخلى للقرنية فتتمدد تحت تأثير ضغط العين و تعمل القرنية المخروطية.
عموما ، لازم تعمل طبوغرافية القرنية علشان نحدد مجرد استجماتيزم و لا قرنية مخروطية
انسى العدسات اللاصقة ، مقاسك كبير فى الأستجماتيزم ، صحيح هتلاقى قريب منه و لكن مش هاتبقى مريحة و لا واضحة فى حالتك
لو الأمر مجرد استجماتيزم عادة بيثبت بسرعة و لكن لو قرنية مخروطية فالأمر مختلف و عادة بتزيد و لها سكة تانية
مستنى ردك عن الطبوغرافية للقرنية
و تحياتى

**Dr.SherifMansy** · 18-01-2009 08:40 AM

المشاركة الأصلية كتبت بواسطة toteman

يا دكتور شريف حضرتك جتلى من السما اولا ميرسى اووووووووى على العرض ده وربنا يخليك للمنتدى ياااااااااااااارب
اولا. انا عندى نظرى ضعيف من وانا صغير خااااااااااااااااالص يعنى تقريبا بلبس النظاره من وانا عندى 3 سنين او 4 مولود كده وعندى العين اليمين 7- والشمال 8- كنت عاوز اعمل عدسات علشان النظاره تخينه اوووووى بس بردو كنت هبدل فيها مع النظاره يعنى مثلا الصبح فى الشغل بالعدسات ولما اجى اللبس النظاره كده
تانى حااااااااااااااااجه انا كنت عاوز اعرف انا كده هخش الجيش ولا لاءء
وهو كده انا نظرى ضعيف اوى ولا اييييه

لو مافيش استجماتيزم عالى (او مافيش خالص) ممكن تعمل عدسات ، و تفكيرك سليم فى لبسها فى الخروج و النظارة فى البيت ، انا دايما انصح بكده للى عايز يلبس عدسات
مع الألتزام بعدد ساعات لبسها اليومى و عدم تخطيه و تغييرها فى مواعيدها عند انتهاء عمرها الأفتراضى و اختيار ماركة كويسة من عيادة محترمة (بلاش اعلانات السوق) و عدم لبسها و الرجوع للنظارة ايام التراب او لو العين التهبت (و طبعا تعالجها)
كده تبقى عدسات مريحة ان شاء الله
بالنسبة للجيش فالخروج الطبى للنظر بيدأ من 4.00- فما فوق (حسب معلوماتى

)
فى تصنيف المقاس انت كده آخر المتوسط و بداية المقاسات العالية و ده مش مهم ، المهم انك بالنظارة تجيب 6/6 لكل عين
و تحياتى

**D . a .\ AYMAN** · 18-01-2009 09:00 PM

المشاركة الأصلية كتبت بواسطة lancer92

بالنسبة للجيش فالخروج الطبى للنظر بيدأ من 4.00- فما فوق (حسب معلوماتى

)

ده صحيح وأنا بالفعل غير لائق طبي لأني -4

والف شكر ليك يادكتور على الموضوع الرائع ده
ربنا يجعله في ميزان حسناتك

**ABDULLAH AHMED** · 19-01-2009 12:22 AM

مشكور يا دكتور على مضوعك المهم
انا باستخدم النظاارة وانا عندي 8 سنين
ودلوقت تقريبا 18
ايه الحل الامثل اللي انت تنصح بيه عشان اقلع النظارة وما استخدمهاش تاني
انا ممكن اقرا واكتب من غير النظارة بس بعد مدة عيوني بتوجعني

يا ريت الحل عشان انا مش مصدق امتى اقلع النظارة والف شكر مقدما

**Dr.SherifMansy** · 19-01-2009 01:48 PM

المشاركة الأصلية كتبت بواسطة ringoo84

ربنا يجازيك خير يادكتور وفعلا موضوع مهم جدااااااااا .......ان احنا لازم نفيد بعض ..........
وانا عندي سؤال لحضرتك ان انا اول مبصحى من النوم عيني بتكون كان في شبوره قدام عيني لمده ربع ساعه مثلا ؟؟؟؟ ومعرفش ايه السبب وده موش علطول احيانا وبتكون عيني اليمين بس ؟؟؟؟؟؟؟؟؟
وشاكر لحضرتك .............

للأسف الشكوى مش واضحة قوى ، ممكن يكون فيه مقاس فى العين دى بتاخد وقت على ما تضبطه بعد الصحيان ، ممكن يكون فيه التهاب يسيط مزمن (حساسية مثلا) و اكتر فى اليمين فتعمل شوية افرازات تتجمع مع النوم و لما تصحى بتاخد وقت على ما تروح ، ممكن تكون العين بتبقى مفتوحة شوية و انت نايم فبيحصل جفاف و تبقى مزغللة لغاية ما تصحى و تبتدى ترمش و الدموع تتفرد تانى على سطح العين ، ممكن حاجات كتير فأحسن حل هو الفحص لتحديد سبب الشكوى

المشاركة الأصلية كتبت بواسطة Sharky

جزاك الله خيرا على هذه الخدمة

أنا فى الفترة الأخيرة لما أجى أقرأ الجريدة أو أى ورقة فيها كلام صغير الافى عينيه بعد فترة بتزغلل و لازم أدعك فيها علشان اشوف من غير زغلله :(

شكرا ليك ، لو السن قرب من او وصل 45 سنة فده شئ طبيعى و لابد من نظارة قراءة
و عادة المشكلة دى (اسمها Presbyopia) بتبدأ اعراضها من حوالى 35 و تزداد لحد ال 45 فتبقى نظارة القراءة ضرورية
اما لو كنت صغير و لكن بتقرأ كتير

فده بيكون شد فى عضلة العين الداخلية و له تمارين لتجنبه
فى انتظار التوضيح
و تحياتى

**Dr.SherifMansy** · 19-01-2009 02:48 PM

المشاركة الأصلية كتبت بواسطة Mar!am

الف شكر لحضرتك
كان عندي سؤال
انا من فترة كدة ظهر لي كيس دهني بالعين وبعدين عدي الجفن العلوي وفضلت اخد في علاجات ولكن مفيش فايدة مش رضي يروح خالص بس صغر حجمه واستقر علي كدة . في الاخر رحت مستشفي الدولي للعيون والدكتور قررلي عملية ازالة الاكياس الدهنية وعملتها فعلا ببنج General المشكلة بقي ان ان الورم لسة موجود صحيح هو خفيف بس برده موجود انا مش عارفة هو ده معناه ان الاكياس لسة موجودة ولا هو بياخد وقت علي مايروح خالص وياتري اعمل ايه عشان اتجنب تكرار حدوثه مرة تانية مع العلم ان انا معرفش هو طلع ليه اصلا .
العلاجات كانت
كمادات مياه دافئة
Tobradex دهان وقطرة
tobrex قطرة
ايزو مفنيكول
ايزوبتو فينيكول
شامبو جونسون للاطفال
وغيرها

كمان بحس اني مش بشوف التفاصيل الدقيقة اوي في الاشياء وسألت قالولي اني مش محتاجة نظارة فهل ده عادي ولا النظر ممكن يضعف ان مالبستش نظارة

وشكرا بجد

كلنا عندنا كمية غدد بتفرز مادة دهنية هى جزء من فيلم الدموع و دى فتحاتها بتكون عند حافة الجفن ، و لو حصل حاجة تقفل فتحة الغدة (مثلا بشره دهنية بتلم التراب و الخلايا الميتة او محتاج البس نظارة و مش بالبسها الخ) تتكوم الأفرازات بداخلها و تعمل كيس دهنى ، و مشكلته الكبيرة انه فندق 5 نجوم للباكتيريا (مادة دهنية فى درجة حرارة الجسم و شبه معزولة عن الدورة الدوية بجدار ليفى) و بالتالى يلتهب و يكبر و ناخد له علاج فالالتهاب يروح و يكش و لكن مايضيعش (3% فقط تروح مع العلاج و 97% لازم تتفتح)
طبعا العلاج مضبوط ما عدا
ايزو مفنيكول
ايزوبتو فينيكول
ما احبش اكتبهم لأن عادة بيعملوا للعيان حساسية
و على فكرة الكمادات الدافئة 50% من العلاج
اللى انا مستغرب له بنج عمومى (General Anaesthesia) ليه ؟؟ هو انتى خوافة قوى للدرجة دى
طبعا الكلام الأخير بيخلينى اشك ان سبب المشكلة هو الأحتياج للنظارة و لو محتاجينها فلابد من الألتزام و الا اهلا بمحاصيل الأكياس الدهنية و لو النظر سليم نفكر فى الأسباب الأخرى
بالنسبة للزغللة و الكلام الصغير فلو متأكدين فعلا ان مافيش مقاس فلابد نفكر فى الضغط المنخفض و/أو الأنيميا (فقر الدم) لأن دى اشهر اسباب زغللة غير النظارة
انصح بكشف دقيق و بالذات لتحديد الحاجة للنظارة من عدمه مع قياس ضغط الدم و عمل تحليل صورة دم كاملة
و تحياتى

-

lancer92 -

الموضوع: أى سؤال أو استشارة فى طب العيون

LinkBack

أدوات الموضوع

عرض

-

-

-

-

-

-

المواضيع المتشابهه

استشارة بيع سيارة والدتي و سؤال حد يعرف شهر عقاري فيه كمبيوتر ؟؟

سعر موتور العيون ؟؟؟

العيون الناعسة !!!

سؤال ليه تويوتا 1993-1997 اغلى من الموديل العيون اللى بعده ؟

قصه تدمع لها العيون

الكلمات الدلالية لهذا الموضوع

المفضلات

المفضلات

ضوابط المشاركة