الموضوع: أى سؤال أو استشارة فى طب العيون

المشاركة الأصلية كتبت بواسطة emo_ayman

د\شريف: مشكور جدا لخدماتك وكان ليا استفسار.

انا بستخدم الاب توب من 8 ل 10 ساعات يوميا-وفى بعض الاوقات يعنى مثلا كل اسبوعين لشهر بحس بضغط فى عينى الشمال وانها مزغللة.وحصلتلى مرة وانا سايق من حوالى اسبوع ولما بتحصلى الاعراض ديه بقفل عينى الشمال لحوالى 5-10 دقائق وبترجع عادية.وساعات بحس ان فى ترابة فى عينى وبغسلها بتخف وساعات استعمل القطرة تروح الترابة.

ايه راى حضرتك.ولا اجى العيادة علطول

حضرتك تشرف و تنور ضيف عزيز

طبعا الكشف افضل ، نشوف العين فيها مقاس ولا لأ (محتاج نظارة او لأ) ؟؟ ، هل ده مجرد اجهاد ؟؟ ، هل فيه التهاب او حساسية فى العين ؟؟

هابعت لحضرتك التفاصيل على الخاص

و تحياتى

المشاركة الأصلية كتبت بواسطة miXo

شكرا على تعاونك يا دكتور شريف،،

أنا كان عندي إستفسار صغير، أنا كنت عملت و أنا صغير، عملية كاتاركت و تغيير عدسة في عين واحدة، بس الرؤية ما إتحسنتش بعد العملية، بعدين قريب كده كنت عند دكتور بغير كشف النضارة فحكيتله عالعملية و سألته هو ليه النظر ما إتحسنش و هل في حاجة أو عملية ممكن تصلح النظر في العين دي، قاللي لأ العين كسلانة!

أنا بصراحة مافهمتش و سكت :)

لو عند حضرتك تفسير ممكن توضحلي الموضوع

شكرا يا دكتور شريف

الموضوع شرحه بسيط

مركز الأبصار فى المخ هو المسئول عن استقبال الأشارة اللى بتيجى من العين عن طريق العصب البصرى و تفسيرها الى الصورة اللى بنشوفها

مركز الأبصار ده (موجود فى الفص الخلفى من المخ فى النصفين) بيتكون من بعد الولادة و يكتمل نموه فى الفترة مابين 5 - 7 سنوات من العمر

خلال هذه الفترة لابد من وصول صورة سليمة له من العينين لكى يكتمل نموه بطريقة سليمة ، و لما نموه بيتم يبقى خلاص مافيش حاجة تانية تضاف له.. أو زى ما بنقول .. قفل على كده

و بالتالى اذا اكتمل نموه و كل عين سليمة ، فان هذا الشخص تظل قدرته على الرؤية السليمة محفوظة ، حتى لو تغير مقاس العين فيما بعد و اصبح البصر ضعيفا ، فانه يعود كما كان بمجرد لبس النظارة ،..

و لكن اذا تم النمو و هناك عين بها ضعف فيبقى الحال على ما هو عليه ، اى ان هذه العين مهما حاولنا تصحيح النظر فيها (نظارات او عدسات .. الخ الخ الخ) فلن يتحسن الأبصار بها ابدا عما كانت عليه وقت اكتمال نمو مركز الأبصار بالمخ

و اسمح لى اوضح بأمثلة

طفل نظره سليم و تم 7 سنوات و نظره سليم ، بيشوف 6/6 بكل عين ، و لما كبر فى اعدادى مثلا نظره ضعف ، هنا لما يلبس نظارة لازم يرجع يشوف 6/6 تانى

طفل نظره ضعيف و لابس نظارة مخلياه 6/6 و تم 7 سنوات ، نفس الحكاية ، هايفضل 6/6 طول ماهو لابس النظارة

طفل عنده عين ضعيفة 6/18 و عين 6/6 و تم 7 سنوات و لما كبر عايز يلبس نظارة لأن نظره ضعف و بقى 6/24 و 6/12 ، هنا هايرجع زى ما كان .. اللى هو 6/18 و 6/6 لأن دى آخر قدرة لمركز الأبصار وصل لها قبل ما يقفل النمو على كده

فالأحتمال الغالب ان عين حضرتك اللى كان فيها مياه بيضاء قعدت فترة لحد مركز الأبصار بالمخ ما قفل ، و بالتالى بتفضل العين ضعيفة ، او زى ما بنقول كسلانة ، و ممكن برضه تسمع كلمات وصف ليها زى lazy eye او amblyopic eye ... كلهم نفس المعنى.

و للأسف حتى الآن مافيش طريقة نحسن بيها العين اللى حالتها كدة. (قيه ابحاث شغالة على الحكاية دى و ان شاء الله خير)

بالأضافة ان العين دة مفيدة برضه برغم ضعف ابصارها و لكنها تغطى مجال ابصار ، و بالتالى اذا جاء شئ من ناحيتها ، و ان لم تميزه و لكن هانلفت ناحيته ، يبقى ما زالت مفيدة.

آسف للأطالة و لكن ارجو أكون وضحت الأمر

و تحياتى