الموضوع: حوادث السيارات

معلش انا مش بعرف ارفق الصور مع الموضوع اصلي جديد في موضوع المنتدات ده.. يا ريت لو حد يديني الطريقة
اختصاراً للوقت انا رفعت الصور على الموقع ده...
الصور دي مهمة لأنها لأشهر السيارات في العالم..

http://betterlife.myartsonline.com/Crash.htm

يا جماعة بجد محدش يستهتر ب السرعات العالية مهما كانت درجة مهارتك فى القيادة وثبات السيارة الخ
انا عملت حادث فى شهر خامسة اللى فات على الدائرة عند التجمع الخامس وعملتها على سرعة 140 واتقلبت ب العربية وهحكلكم الحادثة عشان تتعظوا
الساعة وقتها قبل الحادثة بدقائق شايفها 7.50 دقيقة مساء ماشى على سرعة 140 واخد الحارة الشمال وعلى اليمين امامى مقطور وسيارة نص نقل فى المنتصف وريا مرسيدس شغال كلاكسات ويقلب نور عايزنى اعدية وانا كبرت دماغى مستنى الطريق يفتح ويعد هوة من جمبى المهم ملقاش منى رجاء راح ورا النص نقل وعمل نفس الكلام نور وكلاكسات معرفش الراجل خاف يطلع حد مهم ولا حاجة وسعلة شوية عشان يعدى من بينى وبينة فتنزق بتاع النص نقل وخاف من المقطورة راح راجع تانى طبعا بتاع المرسيدس كان دخل لاقى بيرمى علية رح مفادية ونسى انا جمبة راح رامى علية بفادية خبط بس بفرد الكاوتش الشمال فى رصيف الجزيرة انفجر الكاوتش واتقلبت العربية على جمبها اليمين ومشيت على جمبها وفى اتجهاة انها تنزل من على الدائرى خالص خبط فى السور ورجعت عكس الاتجاة خبطنى بتاع دايوة طالب فى كلية الشرطة وكل دة انا عمال اتشقلب جوة العربية مش فاهم حاجة كل دة حصل فى اقل من عشر ثوانى فوقت الساعة 9.43 دقيقة وحواليا ظباط وشرطة ورتب وناس لا حصر لها كنت على الشزلونج بتاع الاسعاف بيربطونى فية ومطلعنى الاسعاف وجمبى بتاع الدايو متغطى
رحت مستشفى السلام وفقدت الوعى تانى فوقت بعدها بشوية وانا فى غرفة الاشاعة اتعمل اشعة على الجسم كلة وكان الخسائر البشرية اللى حصلت ب النسبة ليا انا خلع فى الكتف اليمين كسر فى ضلعين من الصدر جروح بكامل الراس والصدر والزراعين من الازار جروح متحتجش خياطة والخياطة فى الايد اليمين من الكوع لتحت 6 غرز والشمال من بهد الكف لفوق 12 غرزة طبعا دة كووووم واللى حصل فى العمود الفقرى كوم تانى من الخبطة فقرات العمود اتحركت من مكانها بشدة مش عارف قلى ضغطت على اية كدة مش فاكر عملتلى شلل مؤقت هيروح مع العلاج والكدمات اللى فى عضم جسمى كلة قسما ب الله انا كنت بسرخ زى الحريم لو حد بيحركنى عشان اروح الحمام بس من شدة الالم اللى انا فية والحمد لله شهر والكدمات دى راحت وضهرى اتحسن بنسبة 50% وابتديت حد يسندنى وانا بتعدلى من نومتى او عشان اقوم وانا قاعد لحد مع الوقت بقيت اعتمد على نفسى وراح الالم الا نى لسة بحس بية من وقت لتانى فى ضهرى لما بكون تعبان دة ب النسبة ليا انا
الكاااارثة بقة
الطالب بتاع الدايو مااات
عشان خاطر ربنا واهلينا اللى بيتعزبوا بسببنا بلاش سرعات عالية انا ولدتى كانت هتموت وانا داخل عليها متشال
انا اسف طولت عليكوا

ربنا يسترها معانا سترا جميلا حقا الفلك المشحون برحمتة بس بتعدى على خير .السرعة فعلا بهدلة من كل النواحى ربنا يهدينا جميعا
ربنا يوفق

موضوع بجد جميل جدا ومهم جدا, السرعة والغرز مش شطارة, ممكن في ثانية تتقلب بكارثة, لو الواحد واثق من نفسه 100000% بردوا ده مش امان, الحادثة بتحصل في كسر من الثانية ومش شرط تكون انت اللي غلطان, بس بردوا لازم ناخد في الاعتبار اخطاء الغير.

الالتزام بالسرعات المحددة وقواعد المرور مهم جدا علشان سلامتنا كلنا.

يا ريت كل الاعضاء في المنتدي يدخلوا يشاركونا برايهمم بجد موضوع مهم جدا.

اشكرك على موضوعك ,
الحقيقة أحياناً بلاقي نفسي عايز أجري و أوصل بسرعة للجهة اللي انا رايحها خاصة لو الطريق يديني شوية و أحياناً بقول لنفسي انها مش هتفرق في 5 دقائق و امشي معقول ,
يا جماعة لازم نفكر دائماً في إنه لو حصل حاجة لا قدر الله الواحد هيندم وقت مش هينفع الندم و ذي ما قلت في موضوعك إنه مفيش بداية تانية أو بمعنى آخر إنه بعد الحادثة لا قدر الله الواحد ممكن ميرجعش ذي الاول ,
أعرف واحد بقى بيمشي على عكاز و ميقدرش يسوق تاني و حياته كلها اتغيرت بعد حادثة عملها ,
ربنا يستر طريقنا كلنا.