الااااااان موعدكم مع تقرير ال 20000 كلم للجين 2 اوتوماتيك 2008 من تويتي

**ahmad alshaaer** · 20-01-2009 01:24 AM

السلام عليكم ورحمة الله وبركاته
تكملة للموضوع اللي حبيت اني اشوقكم له والذي بعنوان انتظروا هذا التقرير
وفيت بوعدي لكم لأني من الاعضاء اللي مش بقول الا الحاجه اللي جربتها شخصيا وحصلت معايا يعني مش بفتي ولا أالف لاني بكره الحكايه دي
والاااااااااان مع التقرير
بسم الله الرحمن الرحيم
اخوتي احب اولا اعرفكم اسلوب قيادتي لان في ناس عاوزه تعرف ده وتاثيره
انا اكتر مشاويري سفر على سرعات عاليه بداية من 140 وعمري مامشيت اقل من كده الا اذا طبعا كان في رادار ببقى قمة الاخلاق وامشي 90 واحيانا بليل بمشي على 170 او 160 باستمرار لفتره 100 كلم
والان طبعا السياره معايا بداية من تقرير ال10000 كلم لو فاكرين زي الفل واستهلاك البنزين معايا كمان تمام لو مشيت على سرعة 90 دي يبقى السياره هتعمل في اللتر 12 كلم
ولكن مع السرعات العاليه 160 هتعمل في اللتر 8.5
طبعا ده الطبيعي
وكتير اوي على الطريق طبعا بشد وبحرق على الغيارات - كيك داون- لاني بتزنق كتير على السرعان دي
وعموما انا بخلي الار بي ام يغير على ال4000 بالكتير لو في الطبيعي
السياره حاليا كان قبل الصيانه فيها عيوب خفيفه وده اللي قلته للانسه نرمين لما اتصلت احجز الصيانه قبلها بيومين واعطتني ميعا 9.15 صباحا
والعيوب دي هي
الجلده بتاع الباب الخلقي شمال كانت بتقع كل شويه ولمبة الصالون السويتش بتاعها اللي في الباب كمان كان بيستهبل
وقلتلها عاوز اعمل طبعا صيانة ال20000 كلم
وقلتلها الفرامل بتوطى وبتعلى بمزاجها ولكن بتمسك تمااااام
المهم
ذهبت التوكيل يوم الاحد صباحا 9 تماما
فعلا استلموا العربيه مني وكان في ناس جايه قبلي ولكن هما استلموها عادي جدا وقالولي ان العربيه هتخلص 4 عصرا
قلت ماشي
وقعدت مع واحد حبيبي هناك في التوكيل وهو مدير الضمان
المهم جات الساعه 2 قالولي ان تيل الفرامل اللي قدام خلص نغيروا؟
قلت طبعا غيروه
وقلتلهم بالمناسبه حطولي زيت 10000 مش 5000
قالوا تمام
المهم خلصت العربيه الساعه 4 تماما
وقلتلهم نغسلها بقه
غسلوها وجيت بقه للدفع وده تفصيل الفاتوره
بوجيهات= 116
فلتر زيت= 55.25
فلتر بنزين=133
زيت توتال 9000=266
ودي حاجات بتتغير في صيانة ال20000كلم غصب عنك طبعا
تيل فرامل امامي=248
ضريبة مبيعات=79
مصنعيات =234
ضريبة مبيعات على المصنعيات=23.4
الاجمالي1131.70 جنيه

طبعا انا كنت واخد معايا 2000 جنيه
الحمد لله
طلعت بقه جربت العربيه ماشاء الله هتنط على الاسفلت
في فرق فعلاااا
لازم يكون في فرق 1200 جنيه ومش هحس بفرق اعتقد ان الفرق جه منين بقه ؟
ان جيوبي خفت فالحمل بتاع العربيه خف وبقت تجري
بجد كان في فرق الموتور عزمه شد في السحب
والعربيه نعمت كده
والحمد لله
واتمنى من الله ان العربيه تفضل كده على طووووول
وعقبالكم لما تعملوا صيانات ال150000 كلم على خير وماتنسوش التقارير لانها بتفيد ياجماعه بجد حتى لو حد عارف كل حاجه عن العربيه
المهم رجعت بقه وكان في رادار بس نفضتله لاني كنت عارف مين اللي واقف
وكنت ماشي كالعاده 160 ودخلت على ال 180 وكنت طبعا بعدي على العربيت اللي كانت ماشيه 90 كأنها واقفه والحمد لله
أخيرا احب اقولكم
اللهم بارك لنا في سياراتنا واحرسها وحافظ لنا عليها

ملحوظه وانا قاعد مع حبيبي في التوكيل اللي هو مدير الضمان سألته على ضمان العربيه كام كلم
قاللي انه 60000 كلم
شااامل كل السياره
فقلتله الموتور والفتيس مش 100000 كلم
قاللي دي كانت اشاعه والماليزيين قالوا لا
مع ان الاستاذ توت امبارح في موضوع كده ورانا البروشور بتاع ال 2009 مكتوب فيه ان الضمان على الموتور والفتيس 100000 كلم
والسلام عليكم ورحمة الله وبركاته

**M.Nabil** · 20-01-2009 01:26 AM

انا قاعد مستني الموضوع علشان حبيت ابقى اول واحد يرد عالموضوع اللي انتظرو الكثيرون.
الف شكر عالتقرير الجامد ده, وان شاء الله عقبال كل تقرير.

**ahmad alshaaer** · 20-01-2009 01:29 AM

ربنا يخليك يااستاذ نبيل وده من زوقك

**M.Nabil** · 20-01-2009 01:34 AM

بس في سؤال معلش, ليه حضرتك مغيرتش بزيت شيل هيلكس , على حسب كلام الاعضاء انه زيت تخليقي وافضل للعربية.

**mahmoud_magdy** · 20-01-2009 01:39 AM

شكرا على التقرير
جزاك الله كل خير

**ahmad alshaaer** · 20-01-2009 01:41 AM

حبيبي انا كنت ناوي فعلا على زيت شيل هيليكس وكان نفسي احطه فعلا ولكن
لما سألت مدير الضمان وقلتله اني هجيبه من بره وانتوا تغيروه قاللي بلااااااش لانه لو حصلت حاجه في الموتور هيبقى تلكيكه
وده اللي خلاني استسلم للامر الواقع

**M.Nabil** · 20-01-2009 01:45 AM

لا خلينا في الامان احسن, علشان الشعب ده اكتر شعب يحب يتلكك ويرمي المشكلة على اي حاجة تانية.

**MohabSaeed** · 20-01-2009 02:29 AM

الف مبروك يا باشا على الصيانه ال20,000 و عقبال ال200,000 .

فرق نعومه الموتور و فرق السحب نتيجه لتغير البوجيهات و الزيت " الزيت الجديد بيفرق جامد فعلا فى صوت الموتور عن تجربه " , و طبعا زى ماحضرتك ذكرت لان حمل جيبك خف :-) فا العربيه بقت اسرع من الاول , 1131 جنيه المفترين فى صيانه 20 . دول مش سايبين اى حاجه الى مغلين فيها البوجيهات و الفلاتر حتى الزيت مطلعين فيه حوالى 40 جنيه " مصلحه " .
حاول تهدى السرعه شويه . 170 ديه مش سرعه عاديه ديه مجازفه .
ربنا يباركلك فى عربيتك و يكفيك شرها .

**ahmad alshaaer** · 20-01-2009 02:35 AM

شكرا للاستاذ مهاب
وشكرا على النصيحه
وعلى فكره كل توكيلات السيارات في مصر اسعارها ناااااااااااار
حتى الافيو في منصور شيفروليه
تخيل اني جايب لوحة العدادات - اللوحه فقط العدادين للأفيو 2008
بكاااااام
1226 جنيه
ومثلا تغير الزيت في فولكس فاجن لجيتا 2008 بكاااام
486 جنيه
موبيل 1 وفلتر
ومصنعيه
الحمد لله