فيه مشكلة محدش اتكلم فيها يا جماعة
احنا عندنا فى بلدنا تعريف سطحى واهبل وعبيط ومتخلف لأنواع مسارات العربيات وسرعتها ينقسم الى ثلاثة انواع فقط،
1- داخل المدينة
2-طرق سريعة
3- طرق حرة وحاليا الطريق الوحيد الذى ينتمى لهذة الفئة هو طريق القاهرة-السخنة
وطبقا لهذا التعريف فإن شارع طلعت حرب وشارع شريف وشارع عدلى بوسط البلد يتنمى الى نفس فئة السرعة التى ينتمى لها الاتوستراد وطريق العروبة ومحور N-A وكوبرى اكتوبر وطريق البحر فى الإسكندرية والشارع الرئيسى بمدينة شرم الشيخ ولكها تنتمى لفئة السرعة 60 كيلومتر فى الساعة(جرب كدة تمشى 60 على كوبرى اكتوبر لما يكون فاضى وحاول تحتفظ بثبات اعصابك من الرعب اللى هتشوفه فى المراية الخلفية)
، وقمة الكوميديا ، 50 فى نفق الأزهر، وطبعا اللى فيكم معتاد نفق الأزهر عارف المسخرة اللى بتحصل فى النفق لما واحد من كبار السن يقرر انه يلتزم بسرعة ال50
مافيش اى بلد فى العالم ماشبة بالنظام المتخلف ده، داخل المدينة فى اى حته فى العالم هو وسط المدينة والشوارع القصير، اما المحاور الرئيسية فلها فئة سرعة تانية، يعنى مثلا حد يقوللى إيه الفرق بين الأوتوستراد ومحور 26 يوليو والدائرى علشان يكون الأوتوستراد 60 والدائرى 90، صحيح ان نادرا ما تراقب هذة الطرق بالرادار لكن كلنا عارفين اللى بيحصل لما الميزانية تخسع ، وياللا النهاردة رادار على شارع النزهة او الأوتوستراد او شارع جوزيف تيتو (اللى فيه السندباد)، واللى ماشى 62 تجيبوا رخصه
وبالتالى نظرا لأانه قانون لا يمكن تنفيذه فالناس بتنسى وجوده اصلا (فيه حد فى الدنيا يقدر يمشى 60 فى شارع جوزيف تيتو؟) لحد ما نخبة مختارة من التعساء يوقعهم سوء حظهم فى قبضة الجباه باسم قانون غير قابل للتنفيذ، وليت الامر يقتصر على الجباية ولكن الوقت الطويل حتى وصول الرخص للمرور والمعاملة المهينة من عسكرى لو رايته فى الشارع مجردا من زى السلطة لطبقت يدك فى جوز جنيهات تديهاله يفطر بيها شفقة عليه
وعلى ذلك فالمنطقى ان تكون حدود السرعة كالآتى
1- داخل المدينة 60 كيلومتر
2- طرق 3 حارات 80 كيلومتر (مثل شارع يوسف عباس وشارع الفنجرى وشارع الطيران وجسر السويس وشارع الحجاز مثلا)
3- المحاور الريئيسية 90 كيلومتر( وتشمل كل ما هو على شاكلة كوبرىاكتوبر وطريق صلاح سلام وجزء الأوتوستراد من المقطم وحتى النادى الأهلى وجزء محور 26 يوليو من ميدان لبنان وحتى الصحرواى)
4- طرق طوالى حول المدينة او بين المدن مثل الدائرى بالقاهرة والدائرى بالإسكندرية ومحور التعمير والأوتوستراد خارج الكتلة السكانية بمدينة نصر والمعادى والقاهرة اسكندرية الزراعى وتكون حدود السرعة فيها 100 كيلومتر
5- طرق خارج الكتلة السكانية مثل القاهرة اسكندرية او اسماعيلية او السويس الصحراوى 120
6- طرق حرة لما تبقى تتنفذ وتكون السرعة فيها 140
مع العلم انه يمكن ان تكون هناك اجزاء معينة من اى طريق تخفض فيها السرعة الى حدود ادنى حسب حالة الكثافة المرورية او السكانية (مثلا تكون السرعة على الأوتوستراد من ميدان رابعة العدوية وحتى النادى الأهلى 60) وهذا يتم بلافتات واضحة وهو متبع فى كل دول كوكب الأرض ما عدا بلدنا العزيز