أنا بيضحك عليا يا رجالة

**tananybasha** · 20-01-2009 10:21 PM

النهاردة يا رجالة العربية نتشت قوى
قلت عادى:k30:
ابتدت تقطع
قلت وساخة بنزين و هاينضف عادى:k30:
لقيت الأر بى أم بيلعب قلت كدة مش حلو
طلعت على الميكانيكى اللى اعرفه فى المهندسين فى شارع شهاب و انا طبيعى عشان كنت فى احمد عرابى قلت اتكل على الله اروحلة برغم انه مغلوانى:k26:
عموماً رحته و قلبى فى رجلى
قللى سلك البوجيهات تعيش انت يا حاج - قلتله لأجل البخت انا جبت طقم المانى النهاردة اسمة بى تى تى من سرور اللى فى شامبليون ب 175 جنية و رشحه ليا بردة بتاع امريكات ستارز بس قللى 200 جنية إلا بريزة لأ
ركبناه التنتيشة هديت - قلت الحمد لله - خير بس فى السحب فية تنتيشة
قللى البوجيهات البوش اللى انا مركبها من شهر هببت عشان السلوك كانت بايظة و عايز بوجيهات جى ام - عموماً جبتهم بالعافية ب 115 جنية
ركبناها العربية ظبطت أكتر بس بردة منتشة
راح بجلالة قدرة فتح الماف و قعد يلعب فية بمفك العربية ظبطت 90%
قلت اهو رضا - ايه الأخبار يا أسطى - راح مدينى الصدمة الكبيرة
يا بيه العربية دى عايزة طقم رشاشات و على فكرة عندى واحد على 400 جنية بس كفاءة
و المصيبة الكبيرة عايزة ماف لأحسن الموتور كدة هيضيع و بردة بالصدفة البحته عندة واحد بحالة الزيرو بكام يا اخوانا ب 1000 جنية :k48:
قلتله اقفل يا اسطى انا كدة على الحميد المجيد - حسابك كام - عشان خاطرك يابية نقول 50 جنيه:k26:
جاتلى جلطة - رحت مطلع 20 جنية و قلتله كدة عسل قوى و سكر و 20 جنية دى تربية ليا
رحت مكلم المحترم الشديد الأدب / محمد قشطة قاللى الراجل دة مش تمام و بيشتغلك و استحالة الأثنين يبوظوا مع بعض و طقم الرشاشات اخرة لو فلة 250 جنية و الماف - لا قدر الله - اخرة لو اتنطط من 800 - 900 بالتظبيط
و طلب منى انى اعدى عليه و هو هايشوف العربية و يوديها كمان لميكانيكى يثق فية يقولى الكلام الصح بكره من 6 - 7 باليل
اسجل شكرى و كامل تقديرى للأستاذ / محمد قشطة
طولت عليكم بس انا دمى محروق على ال 400 جنية اللى مش عارف مصيرهم ايه
ملحوظة اخيرة البية و هو بيركب سلوك البوجيهات بنفسه كسرالموتور بتاع المساحات - و انا ما بقبلش عوض جبتة والله العظيم عشان فيبى المانى مش الصينى بالعافية ب 80 جنية
يرضيكو كده

**tananybasha** · 20-01-2009 11:25 PM

بالنسبة للرنة اللى فى المطبات قاللك حلها لأن الوحيد اللى بأثق فيه بتاع العفشة بتاعنا عشان ابن عم ابويا
الرنة دى بسبب ان السوست بترن فى المطبات عشان هربت من الأبزيم اللى مثبتها فى مكانها - لفت يعنى - و حلها سهل - مفتاح فرنساوى و يرفع الجنب و يلف السوستة لحد ما يسمع رنة
نقول فضلت الرنة تعمل ايه
متر خرطوم مياه ابيض اللى جواه خيط و تلف 1/3 السوستة من تحت
و ادعيلى
سوست الأوبل ما بتبوظيش عم يحى قاللى انا بقالى 45 سنة بتاع عفشة و ماغيرتش سوستة اوبل
و لو عايز تعملها من العين دى قبل العين دى
و ادعيلى ربنا يكرمنى

**tananybasha** · 20-01-2009 11:29 PM

فين احمد علاوى و محمد مختار و ابو زهرة و كل الباشوات الكبار لحسن و رحمة خالتى هاولع فى العربية و الميكانيكى جواها

**M.Mokhtar** · 20-01-2009 11:42 PM

المشاركة الأصلية كتبت بواسطة tananybasha

فين احمد علاوى و محمد مختار و ابو زهرة و كل الباشوات الكبار لحسن و رحمة خالتى هاولع فى العربية و الميكانيكى جواها

هههههههههه
اهدى بس ياراجل واحنا معاك اهو
قولنا بس انت بتفكر فى ايه دلوقوت واحنا ان شاء الله نساعدك

**tananybasha** · 20-01-2009 11:48 PM

1. السوستة عكس اتجاة الساعة يعنى تلف من جوة لبرة مش العكس
2. يا باشا تليفونى 0105454207 وقت ما انت عايز انا فى الجيزة
3. قرار نهائى بالبيع

**tananybasha** · 21-01-2009 12:10 AM

اللى معايا انا تانى مالك ليها بعد الدكتور صاحبها 2000 سى سى سبورت مانيوال بجنوطنها و الأسبويلر بتاعها - فابريكة جوه و بره
صعبانة عليا بس شكلها مليش حظ معاها
و اللى فيه الخير يقدمة ربنا