الأفيو المجمعة محليا هل سعرها مبالغ فيه ؟؟؟
النهاردة نزل إعلانات في الأهرام و الوسيط عن الأفيو المجمعة محلية
في خبر حلو أوي في الإعلان إنهم هينزلوا منها أتوماتيك و دي ميزة جامدة كانت تنقص تلك السيارة و حاجة بقت هامة جدا لمعظم المستهلكين حاليا ( الأتوماتيك)
و الخبر الوحش إنهم منزلوش سعرها عن سعر اللي كانت كوري ، مش عارف بقه ده استهبال و لا نصاحة و لا جس نبض و بعدين هينزلوا سعرها ، الأفيو المانيوال المستوردة فول أوبشن كانت 74000 و دلوقت برده اللي مجمعة في مصر بنفس السعر يبقي إيه بقه فايدة التجميع المحلي ما كانوا يستوردوها أحسن ؟؟؟
و ايه هيبقي اثر ده علي السوق ، خصوصا إن الفئة السعرية دي هي أكثر فئة شعبية في السوق و فيها اللانوس و الفيرنا و الإسبرانزا ، يعني كلها عربيات مجمعة محليا ، بس بتهيألي إن الأفيو كان لازم ينزلوا في سعرها خمستلاف جنيه علي الأقل عشان تكون منافسة للسيارات دي لأن الألف جنية بتفرق في الفئة دي جامد ، طبعا ألأفيو فيها ميزات عن العربيات دي ألإسبرانزا صيني و تجميع مصري يعني اللي يشتريها واحد قلبه جامد قوي والفيرنا واللانوس موديلات توقف إنتاجها في بلادها من زمان غير إن في ناس كتير ليهم مآخذ عليها
أتوقع إن غبور هينزل سعر الفيرنا لأنه ناصح و مبيسمحش بمنافسة خاصة في الفئة دي ،
ويا تري بقه هيدخلونا في مشاكل التجميع المحلي ، قوائم الإنتظار ، عيوب التقفيل ، الدهان المصري اللي مش قد كده إطلاقا و لا هما دارسين الموضوع كويس و هينتجوا حاجة كويسة خصوصا إن جنرال موتورز من أوائل مصنعي السيارات في مصر خصوصا سيارات النقل اللي مكتسحة السوق.
أتوقع أيضا إن في عربيات هتتأثر جامد زي السيريون اللي كان ناس كتير بيشتروها عشان الأتوماتيك بس
و أتمني بعد كده إنهم يعلنوا عن الخطوات دي قبلها بشوية عشان أنا لسه شاري فيرنا 1600 أتوماتيك رغم إني كنت معجب جدا بالأفيو و مجبتهاش عشان بس الأتوماتيك
و النبي يا جماعة محدش يرد و يقول الأفيو لانوس متنكرة عشان الكلام ده مش منطقي و حتي لو كده يبقي دي ميزة للأفيو مش عيب إنها وريثة سيارة ناجحة نجاح باهر في مصر مع شكل جديد و صالون حكاية و علامة تجارية زي شيفرولية
أتوقع الخطوة الجاية إنهم هيجمعوا الأوبترا في مصر و لو ضبطوا سعر العربيتين دول منصور هيكتسح السوق